(Ушодксось газетань 23-це номерсэнть).
Доноронь тевесь алкукс пек эрявикс. Лездамс лиятненень – покш тев. А эряви стувтнемс, минек тынк марто эрьванть эйстэ ашти кинь-бути эрямо. Ды бути вийсэнк максомс истямо лезкс, мекс бу тень а теемс?
Ютазь номерсэнть минь ёвтнинек сетнеде, кить кармасть донорокс. Веренть донортнэ максызь, мезе жо седе тов? А седе тов эштёяк покш робота. Кода ёвтнесь «Мордовская республиканская станция переливания крови» МР-нь ГБУЗ-нь врачось-трансфузиологось, верень ды сонзэ компоненттнэнь анокстамонь отделэнь прявтось Людмила Николаевна Фомина, саемадо мейле вересь кирдеви 2 часонь перть комнатань температурасо. Теде мейле нолдави лейкофильтратнень пачк, ванськавтови а эрявикс лейкоциттнэнь эйстэ ды чудевтеви лия пакетс, конась седе тов путови центрифугас, центробежной вийсэнть клеткатне явовить верень вецана пельксстэнть ды фракционатортнэсэ тееви плазманть ды клеткатнень явомась. Тесэ жо теить биологической пробатнень туртов образецтнэнь. Истяттнэде вете. Сынь эрявить седе тов больницятнень туртов, штобу теемс анализт, ваномс верень группанть. Весе системась стерильной.
Явозь плазмась седе тов часонь перть кельмевтеви шоковой кельмевтематнесэ – 45-50 градуссо. Теде мейле сон юты неопробированной продукциянь складов, косо учи лабораторной ванноматнень. Зярдо лабораториясто кучовить весе даннойтне, плазмась максови ванстомань отделс. Ванстови плазмась 3 иеть.
Нама, ванстови плазмась кельмевтема таркатнесэ. Ды зярдо сы яволявтома лецямонь учреждениятнень пельде, сонзэ анокстыть пачтямонтень, лиякс меремс, экспедицияв.
– Медучреждениятнес максомадо икеле плазмась юты карантинизациянь лувонть, – ёвтни Наталья Асанова. – Мезе те истямось? Васняяк ванкшносызь доноронть верензэ, мейле одс теевить анализтнэ. Бути сон шумбра, арасть кодаткак вируст, плазмась туи больницяв. Верденть ды эрявикс компоненттнэде минек сатышка. Эрицятне донорствантень мель явить.
Истя жо Наталья Асанова ёвтнесь ловажаудемень донорствадонть. Неень шкасто «Мордовская республиканская станция переливания крови» МР-нь ГБУЗ-сь вейкине аккредитованной учреждения Мордовиясо, конантень мереви пурнамс верь типированиянть туртов.
– Минек донортнэнь, бути сынь анокт, верень максома шкастонть саеви эштё верь, конась кучови Кировонь научной гематологической центрав типированиянть туртов. Тосо те веренть типировить ды совавтыть ловажаудемень донортнэнь федеральной регистрантень. Минек икеле ашти аравтлув, седе ламолгавтомс те регистранть. Ды тень коряс ветяви покш важодема, – корты Наталья Викторовна. – Неень шкане Мордовиясто кучозь 600 ламо образецт. Нама, те аламо. Ды вейке минек донорось, сон эри Рузаевкасо, апрелень 4-це чистэ кармась гемопоэтической стволовой клеткань донорокс. Сон ардтнесь Кировов. Ёвтнесь процедурадонть. Тешкстызе, кодамояк стакачи арась, вересь саеви верьсантнэстэ, ансяк ламо шка явови – 6 чассто ламо. Тенень эряви улемс анококс.
Верень максомасо варчамс эсь прянть мереви весенень, кинь арасть кодаткак мелявкст шумбрачинь коряс. Илядо тално. Улемс донорокс – покш ды эрявикс тев!
* * *
Ютазь недлясто, июнень 14-це чистэ, тешкставсь Доноронь масторлангонь чись. Тень коряс «Мордовская республиканская станция переливания крови» МР-нь ГБУЗ-со ютавтовсь кенярксчинь мероприятия. Донортнэнень поздоровонь ёвтамо сакшнось Мордовия Республикань Здравоохранениянь министрась Олег Валентинович Маркин.
– Верь ды сонзэ компоненттнэнь Мордовиясо эрьва чистэ максыть малав 200 ломанть, штобу лездамс ды идемс эрямост стака орма марто майсицятненень, пешксесэ аватнень ды ансяк чачозь эйкакштнень, ки лангонь зыянов тевтнесэ томбавозтнень.
Минь весе вейсэ вансттано минек эрицятнень шумбрачист ды покш сюкпря ёвтатано эрьва доноронтень.
2023 иенть ушодовомсто верень службась анокстась 6387 литрадо ламо доноронь верь, конась уш каязь 10832 сэредицятненень республикань больницятнесэ.
Течинь чинтень Мордовия Республикасо эрить 4788 Россиянь Почётной донорт. 30 донорт – специальной военной операциянь участникть.
Мордовиянь верень службась ней виевгавты од ёнкс – ламолгавтомс верень плазмань анокставкстнэнь лецямонь седе эрявикс препараттнэнь тееманть туртов. Миненек эряви седе валгстомс импортонть эйстэ аштеманть ды эстенек топавтомс эсь вешематнень. Неть аравтлувтнень топавтомга арсеви вадрялгавтомс верень службанть ды явовтомс седе ламо ломанень мельть донорствантень. Минь ушодынек тееме иммунной плазманть антителатнень марто, конат а нолдыть столбняконь, гепатитэнь ды лия орматнень сыргавтоманть. Икеле – важодеманть виевгавтомась.
Мордовия Республикань Здравоохранениянь министерствась ютавты покш робота донортнэнь туртов вадря условиятнень теемга, – кемекстызе Олег Валентинович.
Седе тов министрась «Россиянь Почётной донор» мештень знакт ды удостовереният явшесь Мордовиянь 15 донортнэнень, конатне верь макссть уш 40-де седе ламоксть. Истя жо тешкставсть сетне, кинь ульнесть сядодо ламо донацият.
Мордовия Республикань Од ломантнень тевест коряс государственной комитетэнь председателесь Анастасия Гришнёва республикань од ломанень политиканть виевгавтомасо путовксонть кисэ Благодарностьсэ тешкстынзе Россиянь Почётной од донортнэнь. Истяттнэнь ютксо Кирилл Тягушев. Сонензэ 26 иеть, Россиянь Почётной донор лемесь тензэ максозь 23 иесэ. Течинь чинтень сонзэ уш 58 донацият – 25-ксть макссь верь, 14-ксть – плазма ды 19-ксть ульнесь тромбоцитэнь донорокс. Истя жо казевсь Артём Панфилкин. Цёрантень 25 иеть, васенцеде верь макссь 18 иесэ, студенттнэнь ютксо доноронь акциянь ютавтома шкасто. Н. П. Огарёв лемсэ МГУ-со тонавтнемстэ ульнесь математикань ды информатикань факультетэнь донорской вейсэндявксонь ветицякс. Неень шкантень верь ды сонзэ компоненттнэнь макссь 44-ксть.
Теке марто, МР-нь Здравоохранениянь министерствань Благодарностьсэ тешкстазь партнёрской организациятне, конатне свал явить покш мель доноронь акциятненень, ды истя жо Мордовиянь РСПК-нь важодицятне.
Меельцекс кенярксчинтень весе пурнавозтненень музыкальной поздоровт казсть Саранск ошонь Культурань кудонь артисттнэ.
Юлия ЕРЕМИНА