Вторник, августа 11, 2020
Важное

Эйкакштне, ёвксонть кунсолозь эли ловнозь, «стувтсызь» весе сень, мезе моли перькаст, неить эсь пряст ёвксонь геройтнень ютксо. Сынь истя жо, кода ёвксонь геройтнеяк, эсест арсемасо тюрить видечинть, седеймарямонть, олячинть кисэ. Тень кувалма ёвксось тонавты а потамс, мезеяк лангс апак вано, топавтомс эсеть икелев аравтозь бажамотнень.


Теде башка, ёвксось – пек паро художественной произведения, кона эйкакшонть оймесэ вельмевти валдо мельть-арсемат, канды тензэ кеняркст, тонавты паронть явомо беряненть эйстэ. Тиринь кельсэ сёрмадозь ёвкстнэ седеяк малавикст ды чарькодевикст эйкакштнень туртов.

Косто ёвкстнэ саевить, кода сынь чачить? Кезэрень шкасто саезь, эрзятне ды мокшотне эрясть вирев таркатнесэ, конат сравтовсть Равонть, Оканть, Суранть, Мокшанть ды сынст эйс прыця лейтнень чирева. Ламо пингеть сыненст савкшнось кекшнемс сетнень эйстэ, кить бажасть теемс сынст урекс. Васня неть ульнесть ногаецтнэ, татаронь хантнэ, седе тов – инязоронь чиновниктне ды помещиктне, кить эрзятнень ды мокшотнень кедьстэ лутасть покштояк покш каявкс (дань): ярмакт, сюро, медь, вирень ракшань кедть ды истя седе тов. Весе те сынст кармавтынзеяк кадномс ташто эрямо таркаст, кекшнемс вирьга.

Седе мейлень шкастонть, ютазь кавто-колмо пингетнестэ, эрзятне ды мокшотне яксесть вирень ракшань кундсеме. Ковонь-ков эрясть вирь куншкасо теезь кудынетнесэ. Секеть кудынетнесэ эрясть вирень керицятнеяк. Вирень ракша мельга якицятне ды вирень керицятне эсест козяйкасткак эйкакшост марто сайнилизь вирев. «Истямо ладсо, телень неть кудынетне сеедьстэ тейневсть велинень кондямокс» (Гераклитов, 1927: 26).

Вирьсэ эрязь, чокшне ланга, зярдо прядовильть весе тевест, ракшань кундсицятне ды вирень керицятне пурнавкшность вейс кортнеме, оймсеме. Вейкест-вейкест туртов сеедьстэ ёвтнесть ёвксткак – вирень азоравадонть Вирявадо, эрьва кодамо ракшадо; ладсесть эрьва кодат ёвтамот охотав якамодост, мездеяк дивавтыцядо, эрямосо а эрсицядо.
Неть ёвкстнэ кунсолыцятнень туртов макссть аволь ансяк паро ёжо, теке марто сынст вельде ветявсть эрьва кодамо орожиямонь (магиянь) тевть. Истя, кода толкови мокшэрзянь ёвкстнэнь содыцясь А.И.Маскаев “Мордовская народная сказка” эсензэ монографиясонть (Саранск, 1947), седикеле вирев ракша мельга якицятне васня пуромкшныльть толбандянть перька ды ушодыльть ёвксонь ёвтнеме. Ёвтнесть сынст аволь эстест, ёвтнесть Вирявантень. Вирень азоравась, келя, пек вечксь ёвкст. Сынст кунсоломсто сон стувтылизе ракшань ды нармунень ванстома тевензэ, сеедьстэ натой матедевиль. Се шкастонть охотниктне ськамонь-ськамонь, киненьгак апак ёвта, удалов потазь, туильть толбандянть вакссто ды сыргильть ракшань-мезень кундамо, сенень кемезь, Вирявась а фати сынст туемантень, а карми ваномо эсензэ ракшатнень-нармунтнень мельга ды а карми стявтнеме пирявкст охотань ветицятнень кист лангсо.

Ёвкст вечкильть ёвтнеме аватнеяк. Сёксень ды телень кувака чокшнетнестэ пурнавильть сынь кодамояк вейке кудос: кить понат сэвтнильть, кить карть, цюлкат кодыльть, кить суре штердильть, кить панарт-руцят викшнильть. Мартост сайнилизь тейтерь эйкакшосткак. Одтнэ тонавтнесть седе покштнень пельде. Ды уш 10-12 иесэ тейтерькинетне маштыльть сурень штердемеяк, кодамояк, викшнемеяк. Пек ламо шка сайсь панаронь-руцянь викшнемась. Эрьва тейтересь, кинь сась мирденень лисема шказо, анокстась эстензэ ули-паронь парго – эрямонь парь. Тень туртов тейтерентень эрявсь викшнемс кеменде а седе аламо палят ды покайть-руцят. Эрьва руцянть лангсо савсь лиясто аштемс зярыя ковт. Шкась седе а марявозо, вете-сисем тейтерть пурнавильть вейс, вейке кудос. Сонензэ мерсть аштемкудо. Тевень теемстэ морыльть морот, ёвтнильть ёвкст. Юткозост сыльть од цёратнеяк: карень кодамо эли моронь, ёвксонь кунсоломо. Истят чокшнетнестэ моротне ды ёвкстнэ вейкень пельде ютасть лиятненень. Лиятне сынст ёвтнилизь таго киненьгак. Истя, ёвкстнэ кезэрень пингетнестэ пачкодсть минек шкас.

Эрзянь, мокшонь ёвкстнэнь пурнамо ды сёрмадомо кармасть XIX пингень омбоце пельксстэнть, ды ёвтамс, кодамокс сынь ульнесть икеле, пек стака. Секс ламо учёнойтне, сынст ютксо Казанень профессорось И.Н. Смирнов, рузонь академикесь А.А. Шахматов, ловсть, буто мокшэрзянь ламо ёвкстнэ саезь рузтнэнь пельде. Ёвкстнэнь ловномсто кой-кить алкукс сыть истямо мельс: седе ламотне саезь рузонь кельстэ. Ламотне эйстэст пек молить сетнень ёнов, конатнень минь марсинек эли ловнынек рузонь кельсэ. Саемс, «Мазый Дамай» ёвксось ледстни французонть Шарль Перронь «Кот в сапогах» ёвксонзо. «Кемгавтово ялакстнэ» ёвксось моли Пушкинэнь «Царь Салтан» ёвксонть ёнов. «Колесник» ды «Кудаж» эрзянь ёвкстнэ малавикст «О десяти безбородых» ды «Дровосек» туркань ёвкстнэнень. Тень коряс минек раськестэ лисезь рузонь кельсэ сёрмадыцясь С.В.Аникин вана мезе мерсь «О мордовском народе по поводу сказок» статьясонзо: “Лангс ванозь, паряк, маряви, нама, – сынь (ёвкстнэ) саезь рузонь литературасто.

Ансяк вана эрзятнень, мокшотнень эрямос сёрмас содамось ансяк-ансяк кармась совамо, ёвкстнэнь жо ёвтнить сыре ломантне, кить зярдояк эзть некшне книгат.
Теде башка, эрьва кодамо губерниясо эриця эрзятнень, мокшотнень юткова якить секеть ёвкстнэ. Ды неть ёвкстнэсэ ламо истят ёнкстнэде, конат ладить ансяк эрзятненень, мокшотненень, неть ёнкстнэнь тонавтнемаст ды эсь раськень койтнень коряс одс ладямост туртов эряви ламо шка. Лисни, каднови арсемс, неть ёвкстнэ, бути саезьгак кодамояк лия раськенть кедьстэ, те ульнесь пек умок. Минь содатано, невтеманзо кисэ, «Кемгавтово ялакстнэде» ёвксось вастневи ансяк аволь покш полавтома марто Атлантической иневеденть эйстэ саезь Великоенть видьс пачкодемс Европань ды Азиянь весе раськетнень эрямосост. Секенть мерьсак эрьва кодамо ракшадо ёвкстнэдеяк. «Мазый Дамайде» ёвксось финнтнэнень, паряк, сась видьстэ германецтнэнь пельде…” (Аникин, 1989: 242).

Седе тов С.В. Аникин, И.Н. Смирнов профессоронть валонзо ледстязь (Поволжьянь финнтнэнь лия раськень ломантнень: германецтнэнь, литовецтнэнь, арабтнень марто вастневемадост, сынст культуратнень вейкест-вейкест марто човорямодост), кемевти: «Ансяк сестэ бути, паряк, кандозельтькак эрзятненень, мокшотненень ломань раськень ёвкстнэ, истя жо кой-кодат викшневкстнэяк. Эрзянь, мокшонь викшневкстнэсэ вастневить истят ёнкст, кодат улить персидской ковёртнэсэ, арабонь ташто кшнинь ярмакось нейгак понгони эрзянь аватнень оршамосост». (Аникин, 1989, с.242).

Истямо ладсо Аникин сестэ уш, зярдо мокшэрзянь литературась ансяк-ансяк кармась максомо васенце лисевкст, содась ды лиятнененьгак бажась пачтямс эсензэ раськенть потмоёжонь (духовной) сюпавчинзэ, седе, зяро сонзэ эйсэль шумбра прев ды эрямонь вий.

Анокстызе Раиса ЩАНКИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».