Видемань тевтне «Сельхозтехника» ООО-сонть
Ушосонть азоравась – тундось. Неень шкантень республикань малав весе паксятнесэ моли сюронь видемась. Тень лувсо, минь содавтынек Ицялбуень Оброчное велень «Сельхозтехника» ламо профилень предприятиянть. Тешкстасынек, сон парсте содавикс весе республиканть келес. Эряви меремс, «Сельхозтехника» ООО-сь ловови велень хозяйстватнень ютксто покш предприятиятнестэ вейкекс. Машинань ды тракторонь двигательтнень витнемадо башка, те предприятиянть важодеманть лувс сови сюротнень, ламбамо якстерькаень ды тикшень кастомась, сюракшов ракшатнень трямось. «Сельхозтехника» ООО-сонть важодить кавто отделеният, конатне явозь кавто велева. Резоватовасо зярс ансяк паксят, а вана Ламбаськесэ, паксянь тевтнеде башка, трявить ракшатне. Резоватовань ды Ламбаськень ломантнень туртов улить важодема таркат, вадря зарплатат. Ды тень марто ванстови самай питнеесь – велесь, эдь ошов кияк а бажи, однэк-сыренек эрямонть ютавтыть тиринь моданть лангсо. Неень шкасто «Сельхозтехникасо» важодить 70 ломанть.
Хозяйстванть прявтсо уш ламо иень перть превей, ёроков, эсензэ тевенть вадрясто содыця ломанесь Фёдор Борисович Корнаухов. Предприятиясонть эрьва чистэ моли «пси» важодема. А ней, зярдо ушодовсь видемань шкась, оймсемс шка овсе арась. Кода тешкстась прявтось, тундонь видемантень весемесь анок, тевтне молить вадрясто. Ансяк валсто – тевс. Фёдор Борисович тердимизь эсенек сельмесэ варштамс, кода молить видематне, ды минь сыргинек килангов – вастовомо Ламбаське велень отделениянь паксясо важодицятнень марто.
Тешкстасынек, хозяйствань прявтось трудицянзо туртов теи ламо: паро зарплатань пандомадо башка, эрьва отделениясонть строязельть механизаторонь кудынеть, ярсамонь-пидемань ды андомань таркат, косо трудицятнень ули шкаст аламошкас оймсемс. Теде башка, Ф. Б. Корнаухов вельмевтизе Ламбаське веленть маласо кадозь лисьмапрянть. Неень шкантень сонзэ ванськавтызь, перьканзо тарканть мазылгавтызь, вакссонзо теезь сёлт, козонь нолдазь калт, ды пандонть прясо стявтозь чувтонь беседка. Ламбаськень ды маласо велетнень эрицятне ловить те лисьмапрянть оймень ды виень пурнамо таркакс.
Васенцекс, кинь марто содавтымизь Фёдор Борисович, ульнесь хозяйствань ветицясь (управляющеесь) Виктор Владимирович Назаров. Те хозяйствасонть сон важоди нилеце ие.
– Кадык важодян тесэ аволь умок, ансяк ёжонь коряс маряви, теке эрямон перть. Тей самодо икеле важодинь Саранскоень МВД-сэ. Эринь ськамон. Ды вана сонсь Пазось кучимим велев малавиксэнь мельга. Ней семиян марто эрятано теске. Монь вановтон ало важодить 17 ломанть, ютксост: механизаторт, комбайнёрт, ванстыцят ды вейке пидиця-паниця, – ёвтни Виктор Владимирович.
Пидицякс-паницякс Ламбаськень отделениясонть колмоце ие важоди чевте седей ды лембе вановт марто Наталья Александровна Кажаева. Авась ськамонзо три-касты кавто цёрат. Колмо иеде икеле сон эрясь ды важодсь Саранскойсэ.
– Эрямонь кинть лангсо эрьва мезе лисни. Вана эйкакшон марто сынек эрямо велев. Важодема чим ушодови валскень 5 чассто. Важодицятнень андтано кавксть. Сюкпря Фёдор Борисовичнень – монь истямо вадря важодема таркам. Кадык коллективсэнть аватнестэ ськамон, цёратне жо эйсэнь а покордыть, мелем ваныть, – мизолдозь корты авась.
Зярдо пачкодинек паксяв, тосо лаказь лакась важодемась. Минек ваксс, мерят ёндол кивчкадсь, эрязасто сась од ды ёроков агрономось Николай Васильевич Рузавин, конась важоди те хозяйствасонть кемень иеть. Те предприятиянтень сон сась К. И. Тимирязев лемсэ Московонь академиянть прядомадо мейле. Зярдо од цёрась ушодызе важодемань кинзэ, вадря тонавтыцякс тензэ ульнесь хозяйствань прявтось Фёдор Борисович. Неень шкасто цёранть ули семиязо, кавто эйкакшонзо. Кода велень хозяйствасо важодиця специалистэнтень, Николай Васильевичень семиянтень явсть субсидия кудонь стявтоманть лангс. Кудонть путызь Кемля велес, косо цёрась чачськак.
– Важодян кавто отделениява. Эрьва отделениясонть теезь важодицянь бригадат. Эрьва бригаданть марто кирдтяно покш сюлмавкс. Видеманть ушодынек апрелень 16-це чистэ. Тевтне молить парсте. Ладязь шкантень тевтнень прядсынек. Седе тов учотано вадря урожай, – ёвтни агрономось.
Мейле кортамонок поладынек техниканть лангсо «инязортнэнь» марто. Кода ёвтни Сергей Михайлович Куроедов, механизаторокс сон важоди эрямонзо перть. Важодемань стажозо – 37 иеть.
– Эсь прям лия профессиянь ёнкссо а неян. Велень хозяйствас сынь од цёрынекс. Эдь тетям-авам свал важодсть колхозсо. Мон поладыя тетянь тевензэ, васенце важодемань чистэ озынь тракторс. Ней монь цёрам полады те тевенть. Важоди механизаторокс Саранскоень покш предприятиясо, – ёвтни Сергей Михайлович.
Мейле кортынек Михаил Николаевич Прончатов марто. Цёрась важоди велень хозяйствасо малав 25 иеть.
– Армиядо мейле оймсинь вейке чи, омбоце чистэнть жо лисинь важодеме. Сеске озавтымизь тракторс, ды неень шкас те техникась вадря ялгам. Эрян Ламбаськесэ, ули семиям. Козяйкан марто чачтынек-кастынек колмо эйкакшт. Кадык минек важодемась стака, рудазов, ансяк тесэ котьмазь, монь оймем свал таркасонзо, – мельспаросо ёвтни Михаил Николаевич.
Истя жо тешкстасынек, те иестэнть «Сельхозтехникась» рамась ламо од техника. Кавто отделениятнень паксятнесэ, косо ютазь иестэ видезельть тикшеть, саемга, люцернась, важодить тракторт ротационной широкозахватной борона-мотыга марто, сынст тевест – кавшакавтомс моданть, штобу эйзэнзэ седе шождасто соваволь кислородось, штобу видьметне седе вадрясто касовольть. Ламбаськень отделениясо истямо техникасо важоди Алексей Иванович Письмаркин. Велень хозяйствасо Алексей Иванович малав 25 иеть. Трактористэсь поладызе тетянзо тевенть, кона весе пингензэ максызе механизаторокс важодемантень.
Эряви меремс, велень хозяйствасо важодемась а соды кодамояк пе. Тунда трудий ломантне кундыть паксянь тевтнес васенце письмаронть моронзо марто ды а содыть оймсема талай сёксес. А стяко эдь кортыть: «Тундонь чись ие анды!». Покш сюкпря эсь важодицятнень лемс ёвты Ф. Б. Корнаухов. Сон тешксты, тесэнь важодицятне шканть стяко ёмсевтеме а вечкить, свал бажить весементь топавтомс шкастонзо, вадрясто ды ливтемс эсь хозяйстванть икеле молицятнень юткс.
Алена Артемьева
Фототне Эдуард Ретунскиень