Лямбирень райононь Покш Елховкань куншкакурось нурька шкас теевсь строительной площадкакс. Тесэ одкстомтовить зярыя социальной объектт, конат пек седе шождалгавтсызь те велень ломантнень эрямост.
Тешкстасынек, республикасонок неть паро тевтнень топавтомс лездыть федеральной национальной проекттнэ, конатнень топавтомо вейсэндявсть муниципалитеттнэ. Покш Елховкасо сынст вельде одкстомтовить-витневить школась ды Культурань кудось, витневить эйдень кужосо кой-кона таркатне.
Неть читнестэ минь ульнинек Саранскоенть эйстэ аволь васоло аштиця те велесэнть ды, кода кортыть, эсь сельмсэ неинек, кода паролгавтови Покш Елховкань куншкакурось.
Васенце таркась, ков минь лотксинек, ульнесь школась. Ледстясынек, те зданиясь теезель эштё советской шкатнестэ. Васенце тонавтницятне сонзэ поровтонть эскельдякшнызь умонь 1981 иестэ.
– Ниленьгеменде ламо иень перть, конатнень мон важодинь тесэ, школань зданиясь эштё вестькак допрок витнезь арасель, – мерсь тенек вастовомсто Покш Елховкань средней школань прявтось Александр Афроськин. – Ды вана ней «Образование» национальной проектэнть вельде колмо этажсо школась допрок одкстомтови. Тень туртов явозь малав 89 млн целковойть федеральной бюджетстэ, 7,5 млн целковойтне эйстэст туить оборудованиянь ды мебелень рамамс.
Контрактонь коряс весе тевтнень прядомат те иень августонь 10-це чинтень. «Вектор» ООО-нь строительной компаниянь главной инженерэнть Олег Никитинэнь валонзо коряс, сынь арсить весе тевтнень теемс августонь 1-це чинтень.
Неень шкантень ладявсть инженерной весе коммуникациятне. Одкстомтови латось, фасадось, потсто артовить стенатне ды потолоктне. Коридортнэсэ чувтонь ташто киякстнэнь таркас карми улеме керамогранит, класстнэсэ – неень шкантень ладиця линолеум. Допрок одкстомтови актовой залось: одт кармить кияксонь вельтявксось, сценась, технической валдомтомась ды истя седе тов.
Вейсэ школань прявтонть марто минь ванкшнынек колмоце этажонть. Сон анок. Ней ванськавтовить вальматне-мезтне.
Тесэ карми улеме «Точка роста» центрась, конань прявт тевезэ – неень шкань оборудованиянть тевс нолдазь, тонавтомс эйкакштнень цифровой ды гуманитарной профилень программатнес.
Кода мерсь Александр Афроськин, школанть ванськавтомасо сыненст покш лезкс максыть педагогонь коллективесь ды тетятне-аватне, кинь эйкакшост тесэ кармить тонавтнеме.
Тонавтнемань од иестэ, школав сыть 423 эйкакшт, тонавтыцятнеде – 32. Покш Елховкань школасонть важодицятнеде весемезэ кодгеменде ламо ломанть.
Васенце этажсо кармить улеме мастерскойтне ды демонстрационной класстнэ, омбоцесэнть – начальной школась.
Допрок одкстомтовить химиянь, физикань, биологиянь, литературань, историянь, математикань кабинеттнэ. Эйзэст рамави од мебель, тонавтомань пособият, стендт. Неть кабинеттнэ кармить сехте парт (образцово-показательнойть).
Те школасонть вельмевтевить оружейной комнатась ды невтиця пособия марто начальной военной подготовкань классось.
2022 иень декабрясто Покш Елховкань средней школань тонавтыцянь командась лиссь котоце таркас «Команда большой страны» весероссиянь предметной олимпиадасо, косо пелькстасть Российской Федерациянь 78 командат.
***
Теке жо чистэнть минь ванкшнынек, кода ютыть тевтне Культурань кудонть одкстомтоманзо коряс. Тосо вастовинек Покш Елховкань Культурань кудонь прявтонть Оксана Стукалова марто. Оксана Михайловна те тевсэнть вете иеде ламо. Сонзэ валонзо коряс, неень шкасто сынь ютасть важодеме лия таркав ды поладыть тевест комсте ламо кружоктнесэ ды любительской вейсэндявкстнэсэ. Культурань кудонть витнемадо мейле арсить келейгавтомс важодемаст, панжить эште лия кружокт. Сынь кемить, Культурань кудонть витнемадо мейле тей кармить сакшномо седеяк ламо ломанть.
Покш Елховкасо одкстомтови эштё вейке од объект – те эйдень кужось, косо истя жо паролгавтовить якамонь, оймсемань ды налксемань таркатне.
Валентина ЮДИНА