Вторник, сентября 29, 2020
Важное



МОКШЭРЗЯНЬ ЁНКСОСЬ КЕЗЭРЕНЬ ШКАСТО САЕЗЬ СВАЛ УЛЬНЕСЬ СЮПАВ СОДАВИКС ЛОМАНЬСЭ, КОНАТНЕ ПУТСТЬ ЛАМО ВИЙ МИНЕК МАСТОРОНТЬ ВИЕВГАВТОМАНТЕНЬ. МОРДОВИЯНЬ ИЦЯЛОНЬ РАЙОНОНЬ ЛАМБАСЬКЕ ВЕЛЕНЬ ЭРИЦЯТНЕНЕНЬ, ЛИЯТНЕНЬ КОРЯС, УЛИ МЕЙСЭ ШНАМС ПРЯНТЬ. ВЕЛЕСТЭНТЬ ЛИССТЬ ЛАМО СОДАВИКС ЛОМАНТЬ.

УЛИТЬ ПОЭТТ, МОРЫЦЯТ. МЕЗЕ АНСЯК АШТИ ИЛЛАРИОН МАКСИМОВИЧ ЯУШЕВЕНЬ ЛЕМЕСЬ. ТЕСТЭ ЛИССЬ СОДАВИКС ПОЭТЭСЬ ИВАН ПРОНЧАТОВ. ИЦЯЛОНЬ РАЙОНОНЬ ЭРИЦЯТНЕ ЭСЬ ЮТКОВАСТ ЭШТЁ ЛЕМДИЗЬ ЛАМБАСЬКЕНТЬ «ГЕНЕРАЛОНЬ» ВЕЛЕКС. ДЫ, ЭРЯВИ МЕРЕМС, А СТЯКО. ТЕСЭ ЧАЧСЬ ГЕНЕРАЛ-МАЙОРОСЬ А.Е.ФИЛЬЧЕНКОВ, КОНА ВОЁВАСЬ ИНЕ ОТЕЧЕСТВЕННОЙ ВОЙНАНЬ ФРОНТТНЭСЭ, НЕВТИЗЕ СМЕЛЧИНЗЭ. ВОЙНАДО МЕЙЛЕ ПРЯДОКШНЫЗЕ М.В.ФРУНЗЕ ЛЕМСЭ ВОЕННОЙ АКАДЕМИЯНТЬ ДЫ КУВАТЬ СЛУЖАСЬ СИБИРЕНЬ ВОЕННОЙ ОКРУГСО. ЭШТЁ ВЕЙКЕСЬ, ЮСТИЦИЯНЬ ГЕНЕРАЛ-ЛЕЙТЕНАНТОСЬ В.А.АДУШКИН, КУВАТЬ УЛЬНЕСЬ МОРДОВИЯНЬ ВЕРХОВНОЙ СУДОНЬ ПРЕДСЕДАТЕЛЕКС.

Башка таркасо мельспарокс, аволь ансяк велень, райононь эрицятнененьгак, ашти генерал-лейтенантонть Николай Максимович Чичеватовонь лемесь. Сон а стувтни тиринь ёнксонзо, сакшны ды вастневи велень, райононь эрицятнень марто. Ютазь иень октябрясто Николай Максимович примась участия Мокшэрзянь раськень регионъютконь общественной движениянь сисемеце съездэнть роботасо. Генерал-лейтенантось эзинзе стувто тиринь ундокстнэнь ды пек талны эрзятнень ды мокшотнень раськень тевтнень кисэ. Ды, куш эри республикань томбале, Московсо, иетнень лангс апак вано, Московонь делегациянть ютксо сакшнось съездэв.

Бути ваномс Николай Максимовичень эрямонзо, неяви, шожда кинзэ арасельть. Чачсь 1938 иень январень 7-це чистэ Ицялонь райононь Ламбаське велесэ. Тонавтнесь, роботась. 1961 иестэ прядызе Н.Е.Жуковский лемсэ Военно-воздушной инженерной академиянть.
Николай Максимович Чичеватов служамонь сехте ламо иетнень максынзе ракетань войскатненень. Истямо подразделенияс служамо сон сась 1961 иестэ. 1978 иень августсто – 43-це ракетной дивизиянь командирэнь полавтыця. Иень ютазь аравтызь дивизиянь командирэкс. 1982 иень июльстэ генерал-майорось Н.М.Чичеватов уставась тонавтнеме СССР-нь Вооружённой Вийтнень Генеральной штабонь Военной академиясо. Сонзэ прядомадо мейле 31-це ракетной армиянь командирэнь полавтыця. Теке жо армиянь командирэкс кармавтызь колмо иень ютазь, 1985 иестэ.

Эряви меремс, сеть шкатне масторонок туртов ульнесть а шождат. Чивалгома ёнксонь мастортнэ эзть жаля ярмакт, штобу эрьва кодамо вооружениясо икельдямс минек масторонть. Минектнеяк, нама, эзть удо. Сехте покш кемемась ульнесь од ракетань комплекстнэнь лангс, конат ансяк путозельть боевой дежурствас. Сестэнь тевтне истятольть: минек масторонть ды Американть ютксо сёрмадстозь договоронть коряс ламо комплекстнэнь эрявсь саемс боевой дежурствасто ды истожамс. Те чаво таркатненень арсезель путомс «Тополь» ракетань од комплекстнэнь. Сынь ульнесть одт ды секскак эзть понго кодамояк договорс. Командующеентень, Николай Максимович Чичеватовнень, савсь ламо арсемс ды теемс, штобу масторонок аволь кадово ракета вельде ванстомавтомо. Чичеватов эсь офицертнэнь вельде арсесь ды нолдызе тевс ракетной войскань уставонть, кона лездась анокстамс боевой постт, управлениянь группат. Сеедьстэ савкшнось ютавтнемс командно-штабной тренировкат, косо личной составось кепедсь боевой ёрокчинзэ. Нурька шкас тевесь тонавтнезель. 1985 иестэ васенцеде боевой дежурстванть уставизе «Тополь» ракетань боевой полкось. Теньсэ покш таликазо минек земляконть, эрзянь цёранть Николай Максимович Чичеватовонь. Седе тов командующеесь ламо шка явсь личной составонть тонавтнемантень. Сон свал вансь сень мельга, кода кувать ашти дивизионось боевой позициятнесэ. Сон парсте чарькодсь, те кувака шкась добовави сестэ, зярдо карми тылэнь паро обеспечения, связь ды позициятнень кеме ванстома. Командующеентень эряви роботамс аволь ансяк боевой анокчинть кастоманзо лангсо. Военнослужащеесь карми парсте служамо сестэ, зярдо а карми мелявтомо малавиксэнзэ кис, секскак Николай Максимович ламо мель явсь военнослужащейтненень социальной объекттнэнь, эрямо кудотнень строямонтень.

1988 иень августсто генерал-лейтенантонть Н.М.Чичеватовонь путызь А.Ф.Можайский лемсэ Военно-инженерной институтонь прявтокс. Тесэ сон роботась 1993 иес. Армиясто туемадо мейлеяк Николай Максимович тевтеме эзь аште. 1997-1999 иетнестэ роботась ТВ-3 телеканалонь Генеральной директоронь полавтыцякс, мейле «Региональная, операционная, специализированная геологическая компания» ООО-нь прявтокс. Николай Максимович Чичеватов – «Отечество» весероссиянь политической организациянь член. 1988 иестэ ульнесь Санкт-Петербургонь Законодательной собраниянь депутатокс.
Николай Максимович казезь ламо казнесэ. Улить ламо медалензэ. Сехте покш казнекс лови «За службу Родине в Вооружённых Силах СССР» II-це ды III-це степенень ордентнэнь. Неень шкане эри Московсо. Тень лангс апак вано, свал снартни содамс тиринь республикасо тевтнеде. Зярдо ютась Мокшэрзянь раськень сисемеце съездэсь, сон ульнесь делегатокс. Иетнень лангс апак вано, сон сакшнось Саранскоев. Съездэнь участникекс ульнесть ламо ломанть, конатнень Николай Максимович Чичеватов содасынзе умок. Сон вастовсь филологической наукань докторонть, Мордовия Республикань Государственной премиянь лауреатонть А.М.Шароновонь, Мордовиянь заслуженной поэтэнть В.Н.Корчегановонь, «Трудовая доблесть России» вейсэндявксонь председателенть генерал-майоронть И.И.Дзюбак ды ламо лия марто.

Николай ЕВДОКИМОВ

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».