Понедельник, июля 06, 2020
Важное



Малавгады Ине Изнямонь чись. Те иесь лиятнень ёнов а молиця. Маень 9-це чистэ топодить 75 иеть, кода прядовсь Ине Отечественной войнась.

Масторсонок арась истямо семия, конась бу а ёмавтовлизе те войнасонть малавиксэнзэ. Мордовиясо ушодовсть Ине Изнямонь 75 иетненень алтазь мероприятият. Вейкесь истямотнестэ ютась январень 23-це чистэ Саранскоень 32 № школасо. Мужествань урокось алтазель Советской Союзонь Героенть Михаил Петрович Девятаевень подвигентень. Те подвигенть асодыцянзо арасть. Сёрмадозь книгат, снимазь кинофильмат.

Мужествань уроконть школань педагогтне ютавтызь аволь ськамост. Эйкакштненень инжекс сакшность филологической наукань докторось, Мокшэрзянь раськень регионъютконь общественной движениянь председателесь Юрий Александрович Мишанин, Мокшэрзянь раськень исполкомонь председателесь, исторической наукань докторось Александр Степанович Лузгин, А.С.Пушкин лемсэ библиотекань сотрудницась Вера Ивановна Пронина ды лият.

Мероприятиясь ушодовсь «Три танкиста» моросто. Сонзэ морызе 2-це классо тонавтницясь Даниил Дулкин. Покш выступления тейсь Ю.А.Мишанин. Сон ёвтнесь Ине Отечественной войнасо Мордовиянь геройтнеде, М.П.Девятаевде, изнямосонть республиканть таликадонзо. Ёвтнемс ульнесь мезде, эдь минек республикасо войнань иетнестэ теезельть зярыя военной подразделеният. Теезельть «Мордовский колхозник» танковой батальонось, 326-це Рославльской Краснознаменной дивизиясь. Тонавтницятне покш мельсэ кунсолость.
Школань тонавтницятнестэ ламот патриотической воспитаниянь кис получасть казнеть. Сынст ютксо 8-це классонь тонавтницясь Елена Ширманкина, 5-це классо тонавтницясь Александра Старикова. Благодарность ёвтазель 9-це ды 6-це классонь тонавтницятненень Александр Нечайкиннэнь ды Алексей Абрамовнень.
Теде мейле невтезель кинофильма М.П.Девятаевень подвигтенть. Кортыцякс ульнесь содавикс артистэсь Василий Лановой.

Николай ЕВДОКИМОВ

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».