Понедельник, июля 06, 2020
Важное



Ютазь оймсема читнестэ Отяжелень Ламбаське велесэ ульнесь алкуксонь кенярксчи, кона ламо кементь иес кадови ледстневицякс.

Тенень тувталось ульнесь оймень эждиця вастовомась, ков сакшность 10-20-30-40-50 иеде икеле школань прядыцятне. Вастовомантень анокстасть икелепелев: тердезельть мик сеть, кить кодамо-бути тувталонь коряс пек умок арасельть школасо, сынь састь масторонь ламот таркатнестэ. Весемезэ пурнавкшность сядодо ламо ломанть.
Торжественной линейкасонть весе выпускниктненень паронь арсема марто пшкадсь школань прявтось Сергей Русяев. Инжетнень ютксольть Киржеманы велень поселениянь прявтось Геннадий Азоркин, те велень предприятиянь прявтось Александр Трошин, Свято-Введенской храмонь настоятелесь отец Виктор, те велесэнть чачозтне-касозтне Евгений Шульгов ды Николай Салмов.
Линейкасонть ламо лембе валт ёвтазельть педагогической трудонь ветерантнэнь – тонавтыцятнень лемс. Алкуксонь казнекс ульнесть «Килейне» фольклорной ансамблянь моротне. Сонзэ прявтсо Любовь Булыгина.

Те кенярксчинть мазылгавтомантень ламо вийть путсть 2020 иень школань прядыцятне, ёроков тейтерькатне ды сынст тонавтыцяст.
Кодамо покш мельспаросо школань икелень прядыцятне ванызь видеофильманть, конась алтавсь тонавтыцятнень ды тонавтницятнень валдо лемест ледстямонтень… Теде мейле невтезель сюжет школасо тонавтнемань валдо ды лезэв эрямодонть.

Пси цяпамосо вастозельть Саранскойстэ инжесь – МР-нь культурань заслуженной роботникесь Владимир Титяпкин ды «Известия Мордовии» газетань корреспондентэсь, неть строчкатнень сёрмадыцясь, кить морасть седеень эждиця зярыя морот. Школань прядыцятнень вастовомасонть ульнесь «Классонь час», конась алтавсь эрьва сыця инжентень. Меельцекс весе танцовасть школань вальс ды весень кенярдовтынзе эрьва кодамо тюсонь салютось.

Олег КОРЧЕГАНОВ

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».