Четверг, сентября 29, 2022
Важное

Недлячистэ Саратовасто ушодовсь «Равось – ояксчинь лей. Равчиресэ эриця раськетнень культуратнень вейсэнь кортамо» XXI-це этнокультурной экспедициясь-фестивалесь. Тедеде фестивалень участникекс кармасть Россиянь 15 регионтнэ ды Эстония масторось.

Экспедициянть анокстыцятне-арсицятне ды ютавтыцятне – Россиянь ФАДН-сь, Мордовиянь Культурань, раськень политикань ды архивень тевень министерствась, Финнэнь-угрань раськетнень культуратнень Равчирень центрась ды Эрзянь ды мокшонь раськетнень регионъютконь общественной вейсэндявксось.

Васенце чись.

Минек васты

Саратов ошось

Тедедень фестиваленть девизэсь: «Раськетнень культурась – Россиянь сюпавчи» ды сон алтазь Россиянь раськень культурань сюпавчитне иентень.

Экспедициянть прявтсо – Мордовиянь Минкультнацонь министрась Светлана Баулина. Инжекс фестивалев састь ФАДН-нь прявтонь полавтыцясь Станислав Бедкин, Россиянь Президентэнть юрсо Раськетнень ютксо вейсладямонь коряс Советэнь членэсь, Межэтнической журналистикань гильдиянь прявтось Маргарита Лянге, Мордовиянь Государственной Собраниянь депутатось Евгений Ледяйкин, В. Д. Поленов лемсэ Государственной Раськень творчествань кудонь прявтось Тамара Пуртова ды лия содавикс ломанть. Теке марто участникекс кармасть музеень, библиотекань, культурань роботникть, тонавтыцят, журналистт, Госсобраниянь депутатт...

Саратов ошсо делегациясь васняяк путсь цецянь каштаз Изнямонь парксо Ине Отечественной войнасо чавовозь воинтнэнь кеврунгонтень, мейле вастовсь Саратовань ёнксонь эрзятнень ды мокшотнень марто раськетнень национальной велесэнть – этнографиянь комплекссэнть.

Тесэ невтезель паро концерт, инжетне каванязельть эрзянь ды мокшонь ярсамопельтнесэ, содавтозельть аволь ансяк минек раськень, лия раськетнень моротнень ды киштематнень марто. Мордовиянь Культурань, раськень политикань ды архивень тевень министрась Светлана Баулина казизе Саратовань Эрзянь-мокшонь национально-культурной автономиянь прявтонть Валентина Кривошеевань «За межнациональное согласие» медальсэ.

Светлана Никитовна тешкстызе экспедициянть эрявиксчинзэ: «Фестивалесь теевсь алкуксонь брендэкс. Те – пек сюпав культурной программа марто лия ёнов а молиця экспедиция».

А ФАДН-нь прявтонь полавтыцясь Станислав Бедкин эсь шумбракстнемань валсонзо ёвтась: «Те экспедициясь содавты Равчиресэ эриця раськетнень культураст марто, седе малавгавты сынст, тесэ ламот муить од ялгат-оят, кемекстасызь сюлмост ды весе те вети покш вейсэндямос, Россиянь раськетнень вейке-вейкень марто мельспаросо эрямос».

Седе тов «Равось – ояксчинь лей» фестивалесь, коень коряс ютась «Фёдор Достоевский» теплоходонтень ды тосо пурназель вейке-вейке марто содавтомань чокшне ды «Актуальные вопросы реализации Стратегии государственной национальной политики Российской Федерации» теманть коряс семинар. Сонзэ ветясь ФАДН-нь Руководителень полавтыцясь Станислав Бедкин. Станислав Анатольевич тешкстызе, Стратегиянть тевс нолдамось ютась меельце этапс, ды неень шкане, кода веши эрямось, сонзэ топавтыцятнень юткс совасть Россиянь Миноборонась, МЧС-сь, Минвостокразвитиясь. Спикерэсь ёвтнинзе сеть тевтнень, конатнень Агентствась карми топавтомо. Васняяк, тевс нолдави коренной раськетнень кельтнень кемень иень проектэсь, седе тов карми ютавтневеме этнографиянь диктантось, арсеви нолдамс раськетнень кельтнень Атлас. Истя жо тешкстызе, Межнациональной вейсладямонь кевкстематнень агентствась весементь реди ды яви покш мель. Станислав Бедкин марто интервьюнть седе келейстэ ловнодо газетань сыця номерсэ.

Светлана Баулина содавтынзе участниктнень сеть мероприятиятнень марто, конатне ютавтовить ФАДН-нть лездамонзо вельде тедеде ды сыця иестэ. Августонь 24-28-це читнестэ Мордовиясо юты Финнэнь-угрань од ломанень раськеютконь лагерь, козонь сыть 100 ломанть. 2023 иестэ арсеви Финнэнь-угрань раськетнень форум, культурань фестиваль. Неть весе тевтне топавтовить истя жо Государственной национальной политикань стратегиянть лувсо.

Экспедициянь программась пек сюпав ды васенце чокшнестэнть ютась сонзэ презентациясь. Седе тов ульнесь раськень кельсэ кортамонь интенсив, конань ветясть эрзянь ды мокшонь келень тонавтыцятне Александр Данильчев ды Светлана Сокорова. Истя жо невтезель «Мерема» ды «Росичи» творческой коллективтнень концертэст ды ютавтозель «Вейсэ/марса» этнодискотека. Теплоходсонть од морост морызь Артем Мамаев, Сергей Фудин ды лия од морыцят.

Омбоце чись.

Ошось-героесь

Волгоградось

Волгоград ошсонть минек покш делегациянть вастызь Волгоградской областень общественностень ды государственной властень органтнэнь представительтне, тосо эриця эрзятне ды мокшотне ды гайтев моросо казаконь ансамблясь.

Теде мейле  весе сыргасть ошканть-геройганть автобуссо экскурсияв,  ваннозель   «Героям Сталинградской битвы» историко-мемориальной комплексэсь.  Мамаев кургансо весень пельде путозель цецянь каштаз Ине Отечественной войнасо чавовозь воинтнэнень.Тосо жо фестивалень делегациясь ютавтсь патриотической акция ды морызе  Мамаев кургансо «С чего начинается Родина?»  содавикс моронть.

Теплоходось тусь Волгоградсто, а экспедициясь поладызе важодеманзо мельстуиця тевсэ. Миненек сась Пшкадема Мордовиянь Прявтонть Артём Здунов пельде, конань ловнызе МР-нь Культурань, раськень политикань ды архивень тевень  министрась Светлана Баулина.Тосо кортави: «Мельвановикс Станислав Анатольевич! Вечкевикс ялгат! 

Покш мельсэ ёвтан лембе поздоровт «Равось – ояксчинь лей. Равчиресэ эриця раськетнень культуратнень вейсэнь кортамот» раськеютконь экспедициянь-фестивалень весе участниктненень.

Россиянь Федерациянь Президентэсь В. В. Путин Раськень политикань государственной стратегиясонть тешкстынзе этнокультурной сюпавчитнень, культуратнень ды койтнень-кирдатнень касомань-виевгавтомань аравтлувтнень. 

«Равось – ояксчинь лей» фестивалесь весе неть иетнень перть кармась сехте мазый, лия ёнов а молиця ды содавикс мероприятиякс, конань прявтсо ашти Россиянь раськетнень этнокультурной касомаст-кепетемаст, ояксчинть кемекстамось.

Проектэнть кирдеманть кисэ покш сюкпря ёвтан Раськетнень тевтнень коряс федеральной агентствантень ды теке марто Россиянь ФАДН-нь прявтонь полавтыцянтень С. А. Бедкиннэнь, конась сонсь свал эрси экспедициясонть. 

Истя ладявсь, финнэнь-угрань раськетне эрить Россиянть келес ды масторонть томбале. Ламот сядот иетнень перть сынь кандызь эсь койтнень ды культуранть, ванстызь эсь кельтнень ояксчинть. Секскак миненек эряви тонавтнемс вейке-вейкенек лангсто ды ванстомс эсь ютксо сюлмотнень. «Равось – ояксчинь лей» фестивалесь ашти прявт площадкакс эсь содамочитнесэ явоманть ды раськетнень ютксо сюлмотнень кемекстамонть туртов.

Башка тарка тесэ саить аволь коммерческой организациятне. Иестэ иес эсь ёрокчинть кастыть Россиянь Финнэнь-угрань раськетнень ассоциациясь ды Эрзянь ды мокшонь раськетнень регионъютконь общественной вейсэндявксось, мезенть коряс Мордовия Республикась саи редявикс тарка финнэнь-угрань вейсэндявксонть кемекстамосо.

Паро мель тешкстамс, «Равось – ояксчинь лей» экспедициянть юрс совасть ламо од ломанть, шкинемань ды грантонь пелькстамонь изницятне, раськень общественной вейсэндявксонь активисттнэ, учёнойтне, тонавтыцятне, культурань ёнкссо важодицятне – минек ялганок Россиянь 15 регионтнэстэ ды омбо масторсто.

Неть читнестэ тынк арсевить пек ламо тонавтнемань мероприятият, мастер-класст, сюпав культурной программа. Кеман, экспедициясь лезды раськеютконь ды регионъютконь сюлмотнень кемекстамосо, финнэнь-угрань весе раськетнень культураст сюпалгавтомасо.

Арсян тенк ютавтомс те шканть сюпавсто, кемекстамс ояксчинь ды важодемань сюлмот ды пурнамс а стувтовикс мельть-арсемат вадря путешествиянть эйстэ!»

Седе тов теплоходсонть ютавтозель «Этнотематика: новые форматы для популярных медиаплатформ» кругловой столь, конанть ветясь РФ-нь Президентэнть юрсо раськетнень ютксо вейсэнь тевтнень коряс Советэнь членэсь, Межэтнической журналистикань гильдиянь прявтось Маргарита Лянге.

Седе тов ютась «Национально-фольклорной кенярксчись «Шумбрат» кода раськень культурань ванстомань инструментэсь» теманть коряс стратегической сессия.Сонзэ ветицятне: МР-нь Культурань министрась Светлана Баулина ды теке жо министерстванть культурань сферасо проекттнэнь ды программатнень отделэнь прявтось Юлия Елисеева. Участниктне явовкшность колмо командава, конатне евтнизь эсест арсевксэст, кода анокстамс ды ютавтомс те покш кенярксчинть.

Чокшне «Равось – ояксчинь лей» этноэкспедициясонть ютась патриотической концертэсь.Ветицятне-Раськень театрань артисттнэ Андрей Анисимов ды Евгений Благов. Морасть ды седясть «Мерема», «Росичи», Артем Мамаев, Евгений Шумкин, Сергей Фудин.

Колмоце чистэнть, овторникстэ, теплоходось пачкодсь Астраханев.Причалсонть минек делегациянть вастызь Астраханень областень общественностень ды властень представительтне. Ансяк теде минь евтнетяно сыця номерсэ. Учодо!

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».