Среда, августа 05, 2020
Важное


Цель лемсэ немецень овчаркась таймаскадсь тарказонзо. Пшти вановтозо каявсь кинологонть Дмитрий Дудин лангс, кискась учи команда. «Цель, икелев!» – кармавты инспекторось. Кискась ношксты весе пирявкстнэнь ютазь. Кузтемась, вальмась, туннелесь, бумось, пирявксось, барьерэсь ды книжкась – содазь кись ютазь. Овчаркась весементь топавты ды казнень таркас тензэ максови оскине. Истят тренировкатне малав эрьва чистэ ды лиясто аволь вестькак.


МР-ва МВД-нь кинологической службань центрань испекторонть-кинологонть Дмитирий Дудинэнь колмо кисканзо, ансяк Цель – лиятнень ёнов а молиця. Алкуксонь полицейской. Кадык погонт а кандтни, покш лемензэ арасть, ансяк Отечестванть икеле заслуганзо пек ламо. Овчаркась ульнесь закононь сехте стака коламотнень панжомасо. Невтемга, самай сон вешнесь ды кундась Мордовиянь келес содавикс Торбеевань ледницянть Григорий Грязновонь – колмо ломанень чавицянть. Цель саизе следэнть паксясо кадозь машинанть вакссто ды мольсь ломанень пильге чалгавкстнэва. Ансяк сынь таркань-таркань редявсть беряньстэ, кискась сынст ёмавтсь. «Чумокс теньсэ ульнесь пертьпельксэсь. Ды истя жо минь тов сынек аволь васенцекс, те шкантень уш ульнесть ламо лия чинеть», – толкови инспекторось-кинологось.

Самай те овчаркась невтизе тарканть, косто эряви вешнемс Саранскоень кавто иеде икеле ёмазь школасо тонавтницянть. Цель правоохранительтнень ветинзе ловсонь заводонть маласо эрькентень, озась эрькенть чирес ды таркастонзо эзь сырга. «Сестэ мон чарькодинь, эряви тердемс водолазт ды вешнема ведьстэнть», – корты Дмитрий. Апаро кулясь кемекставсь, 16 иесэ тейтеренть рунгонзо таргизь веденть потмакссто.

Превей кискантень удалась саемс ламот салыцятнень следэст. А зярдо Анненковань фермастонть саласть скалт, сон ветясь полицейскойтнень аволь вейке кемень вайгельпень тарка ды пачтинзе велень кудонтень, козо кекшизь скалтнэнь. Нама, истят саевкстнэ – те кинологонть-инспекторонть свалшкань домка важодемазо.
Цель кискантень уш кавксо иеть. Кискатнень эрямонь пингенть коряс – те ламо. Арсеви, куроксто овчаркантень сави туемс оймсеме. Вешнемань службасонть сонзэ полавтсы Неля. Сон истя жо Дмитрий Дудинэнь трявксозо. Ламо шкань перть Неля тонавтовсь вейсэ Цель марто, сайсь опытэнть весенень вечкевикс кисканть пельде.
«Маласо шкастонть сон ютасы, кода кортыть, боевой крещениянть», – пачти инспекторось-кинологось кисканть марто минек содавтомсто.
«А апаркстомтадызь?» – кавтолдтано минь ве таркасо а аштевиця кисканть лангс ваномсто.
«Арась, – кемексты Дмитрий. – Нелька службантень анок!».

ЁЖОМАРЯМОТНЕС КЕМЕЗЬ

Дмитрий Дудин кискат вечки эйкакшпингстэ саезь, ансяк кинологонь тевденть зярдояк эзь арсекшне. Служась полициясо ды весть тензэ мерсть ППС-стэ ютамс кинологонь центрав. Аволь эрьвась ули анок истямо тевентень, кинень-бути аволь мелень коряс, лиясь нузялды чистэ ютавтнемс тренировкат ды учомс невтевкст. А вана Дмитрийнень те тевесь вечкевсь. Сон машты муеме кель-вал кискатнень марто, машты улемс тенст ялгакс. Те пек эрявикс ёнксось!

Кинологонть марто кортамсто, карминек содамо, кискась, кона муи взрывчатка, а онги, сонзэ тевезэ – невтемс тарканть, муемс зыянонь кандыця кедьёнксонть ды озамс ваксозонзо. Лия тевтнестэ, мекевланк, кискантень максома вайгель. Кода жо толковамс кискантень, зярдо тензэ онгома, зярдо чатьмонема? Миненек, а чарькодицятненень, те наукась а толковавикс. «Тевесь домка ды саи аволь чи, кавто, колмо ды аволь ков, – толкови инспекторось. – Весемесь ашти кисканть ёжомарямонть эйстэ, сонзэ мельденть».
Улемс кинологокс, аламо вечкемс кискат. Тевентень кундамодо икеле эрьва инспекторось юты тонавтнема МВД-нь кинологонь школатнесэ. Мейле эрьва вете иетнестэ ютыть одс тонавтнема. Бути кортамс кискатнень марто важодемадонть, весемесь ушодови дрессировкань курсатнестэ, кисканть тонавтома общей командатнес: озамс, мадемс, чиемс ды седе тов. Ансяк мейле, обуцянть ды породанть мельсэ кирдезь, сынст явить спецкурсатнева. Седе кежей кискатне саевить вешнемань службас, седе сэтьметне – чинень коряс группатнес. Меельцетне седе сеедьстэ роботыть ламо ломань марто таркатнесэ, секскак кежесь тесэ а мезекс.

ЭКЗАМЕН КИСКА
ЛЕВКСТНЭНЬ ТУРТОВ

Ломань ютксо кортыть, слоноськак тонавтови киштеме. А содан, кода киштиця слонтнэнь коряс, ансяк МВД-сэ службанть туртов лади аволь эрьва кискась. Саить сень, конань улить эрявикс ёнксонзо. Секскак эштё рамамсто кискантень улить покш вешемат. Неть вешематнень кинологонь центрань специалисттнэ кучить кискань кирдицятненень, сынь кочкить эрявикстнэнь ды ансяк теде мейле специалисттнэ ардыть ваномо. Службас саемадо икеле киска левкстнэнь туртов ютавтовить башка тестт. Бути кискась весементь топавтсы, сайсызь.

ПОРОДАСЬ

МР-ва МВД-нь кинологической центрасонть кирдевить 90 кискат. 50 – Саранскойсэ ды вейке-кавто республикань эрьва районсонть. Породатнеде зярыя, ансяк седе покш мель явови немецень овчаркатненень. «Вадря породась тюрицянь ёнкс марто, – корты Мордовиянь кинологической службань центрань прявтонь полавтыцясь Александр Бикеев. – Сынь маштовить куш кодамо службантень».
Лабрадорт, ротвейлерт, ризеншнауцерт, кавказской ды среднеазиатской овчаркат кандыть службанть полициясо. Эрьванть эйстэст эсензэ тевезэ, а кода сынь сонзэ топавтыть, ламосо ашти кинологонть ёрокчиде. Подразделениянть важодемань невтевкстнэ вадрят, лисни, кемекстазенть специалисттнэ ды сынст подопечнойтне топавтыть ветес.

СТАКА ЛЕМТНЕДЕ

Нелли, Цель, Лина… Те кискатнень нурькинеть лемест. Истя сыненст мерить кинологтне, ансяк паспортонь коряс ламотнень лемест а шождат. Невтемга, Неля документэнь коряс – Нордхейм – Найми Блек. Истямо лементь тензэ максызь эштё питомниксэнть. Вейке левксыявксонь кискалевкстнэнь лемест весе ушодовить вейке буквасто. Васенце левксыямось «А», омбоцесь «Б» ды седе тов. Лемень омбоце пельксэсь – питомникенть лемезэ, косо сон чачсь.

Анокстызе
Юлия ЕРЕМИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».