Мартонь 16-це чистэ Саранскойсэ невтезель концерт, конась алтазель содавикс ды вечкевикс морыцянть, РСФСР-нь, Мордовиянь заслуженной ды народной артистканть Александра Куликовань ледстнемантень. Те иень мартсто сонензэ топодевельть 80 иеть... Республикань Культурань кудонь залось пешксель тыц, билеттнэ концертэнтень явшевсть питневтеме ды те тевесь кармась паро казнекс Куликовань творчестванзо вечкицятнень туртов.

Концертэсь ушодовкшнось Александра Николаевнадо кинокадратнестэ, конасонть сон невтевсь эштё одсто, эсь шкинеманзо ушодовомсто. Мазыйдеяк мазый, пейдиця, эряза мокшонь ава, сонзэ вайгелезэ гайгсь сценанть лангсто теке баягине. Пек пароль режиссёронть Оксана Вишняковань арсевксэзэ – ладямс морыцянть портретэнзэ раськень оршамопельсэ раужо экранонть куншкас ды мазылгавтомс сонзэ цивтёрдыця тештесэ. Неявсь, теке Куликова мизолды ды моры тенек тосто, менельстэ.

Концертэнть ветясть Вячеслав Зобков ды Анна Бегаева. А моротнень, конатнень шкинемань иетнень перть морсесь Александра Николаевна, морызь Мордовиянь филармониянь содавикс артисттнэ ды коллективтне: «Умарина», «Келу», Карина Сергеева, Инна Учватова, «Мерема», «Росичи», «Разгуляй», Владимир ды Олеся Фоминтнэ, «Девчата» ды лиятне. Сакшность Татарстансто оянзо-ялганзо, конатне морызь атямарде (вишнядо) Куликовань вечкевикс моронзо. Марявсь, концертэнть перть теке сонсь Александра Куликова минек марто, ваныцятне марясть сонзэ вайгелензэ, вансть кинокартинкатнень экранстонть. Сон тосто ушодылинзе моротнень, а артисттнэ поладылизь. Арсевксэсь пек пароль. Ды эрьвась эйстэст ёвтась ламо лембе валт артисткадонть ды седе, кода сон вечкилизе тиринь ёнксонть ды эсь масторонть.

Залсонть ульнесть Александра Николаевнань роднянзо-раськензэяк: тейтерезэ, нуцьказо ды правнуцьканзо. Наталья Аксенова нуцьказо, кона тусь сырькаензэ киява, весенень морась эрзянь ды мокшонь моротнень пусмо ды ламо ледстнесь вишка порасто сонзэ марто эрямодонть-аштемадонть. А филармониянь артисттнэ – мартонзо важодемадонть, ды седе, кода эрьва концертэнть прядовомадо мейле Александра Куликова кулисатнень удало вастыль сынст ды мизолдозь пижниль: «Те – изнямо!» («Это – успех!»). Прядовсь ледстнемань концертэсь Россиядо весенень содавикс моросонть, конанть пек вечкилизе Куликова ды конась теевсь сонзэ «визитной карточкакс», кода «Умаринась» ды ламот-ламот лиятне.

Марина Девятова