Августонь 17-18-це читнестэ Мордовиянь прявт ошось пурнынзе сёлмонзо алов ве чувтонь малавикс раськетнень – финно-угратнень. «Этнокультурное многообразие России: современные вызовы и перспективы развития» финнэнь-угрань раськетнень Весероссиянь II-це форумонть панжомазо ютась 17-це чистэ И. М. Яушев лемсэ государственной музыкальной театрасо.
Инжетнесэ вастсть неень шкань стилизованной оршамосо «VARMA» этно-арт-театрань тейтертне ды музыканттнэ. Малав колмосядт делегаттнэ пачкодсть Саранскоев Россиянь 35 регионсто ды Казахстансто. Форумонть торжественной панжомась ушодовсь эрзянь ды мокшонь раськень мифологиянть коряс мельстуиця невтемасо. Сядодо ламо артистт мазый оршамосост ды киштемасост чопавтизь залонть кезэрень фольклоронь ёвтамос, кода Иненармунесь раштась алт, конатнень эйстэ лиссть минек масторонть чачозо ды лия пазтнэ: Инешкипазось, Масторавась, Вармавась, Толавась... Седе тов финнэнь-угрань раськетнень вейс пурнынзе торамань гайтесь, кона Тюштянь пингестэ саезь ловови вейсэндявомань тешксэкс. Меельцекс ульнесь ливтезь раськень штатолось, конань кирвазтеме сцена лангс тердезель, кода яволявтозель, раськенек инязорось-каназорось – РФ-нь Финно-угрань раськетнень ассоциациянь прявтось П. Н. Тултаев.
Седе тов ушодызе важодеманзо пленарной промксось. Эйсэнзэ ульнесть РФ-нь Президентэнь Администрациянь руководителень полавтыцясь Магомедсалам Магомедов, РФ-нь Государственной Думань Председателень полавтыцясь Сергей Неверов, ФАДН-нь прявтось Игорь Баринов, Мордовиянь Прявтось Артём Здунов, Россиянь Финно-угрань раськетнень Ассоциациянь прявтось, сенаторось Пётр Тултаев, Государственной Думань депутатось Василий Пискарёв, Приволжской федеральной округонь Президентэнь Полномочной представителень полавтыцясь Игорь Буренков.
Шумбракстнемань вал весе форумонть туртов кучсь Россиянь Президентэсь Владимир Путин: «Сядо иетнень перть финно-угратне лия раськетнень марто теить покш тев минек масторонь кастоманть-виевгавтоманть туртов. Сынст эрямонь эрьва кодамо ёнксонь тевест кармасть сюпав пельксэкс минек историясо, наукасо, культурасо… Ды течияк, специальной военной операциянть молемстэ, финнэнь-угрань раськетне, покштятнень патриотической койтнень лангс ванозь, невтить тюремстэ апелемачи ды цидярдома.
Тешкстаса, государствась икелепелевгак карми явомо мель этносонь ды культурань ванстомантень…»
Видео вельде кучсь шумбракстнема Россиянь культурань министрась Ольга Любимоваяк.
Магомедсалам Магомедов лемдизе форумонть покш тевекс весе масторонок туртов. «Минь явтано мель Россиянь эрьва раськентень. Башка тешкстатано финнэнь-угрань раськетнень, конат саить покш тарка государствань кемекстамосо, – мерсь сон. – Шкась ней стака. Минек масторонок лангс моли покш лепштямо Западонь мастортнэнь ёндо сень кис, мекс минь ютавттано эсенек суверенной, киньгак эйстэ а аштиця, политиканть. Сынст ёндо молить терявтомат коламс раськеютконь сюлмавкстнэнь… Ансяк минек ламо раськень вейс валовомась ней вейсэнди эйсэнек седеяк пек ды кармавты ванстомо ды виевгавтомо масторонок!»
Игорь Баринов тешкстызе: неть мероприятиятненень, конат алтавить кельтнень кастомантень информациянь ды цифровой ёндо, карми явовомо седеяк покш мель. Истя жо сон кортась историянть ванстомадо, кода Советской Союзонь Геройтнень, истя жо минек шкань СВО-нь участниктнень кисэ аштемадо, конат виень апак жаля тюрить неонацисттнэнь каршо.
Сергей Неверов тешкстызе: «Финнэнь-угрань раськень культурной наследиясь, эсь койтнень-кирдатнень ванстомась максыть ки Россиясо туризмань кастомантень, раськеютконь ялгаксчинтень, оймевиень пурнамонтень».
Мордовиянь Прявтось Артём Здунов мерсь: минек масторонть туртов национальной кевкстематне аштить прявт таркасо. Секскак течи Саранскойсэ ютыть истят виев мероприятият, конат вейсэндить малав ведьгемень Россиянь регионт. Мордовиянь Прявтось эсь кортамосо явсь мель од ломантненень, конатнень эйстэ ашти минек вандынь чись.
Пётр Тултаев кепедсь ламо пшти кевкстемат, конатнень пингстэ мерсь: «Эрьва минек раськесь а моли вейке омбоце ёнов: эрьванть эсензэ историязо, культуразо. Ды теке шкастонть, кодамо бу национальностень ды религиянь аволинек уле, лововтано Россиянь ламо нациянь раськень пельксэкс...»
Марий Элэнь филологиянь наукань НИИ-нь докторось Любовь Абукаева кортась кельтнень цифровизациядо. Тень коряс ютавтовить эрьва кодат промкст, мастер-класст ды свал эйсэст ули мезе тешкстамс, мезень коряс касомс. Сон терди эрьва тиринь кельсэ кортыцянть, конанть ули бажамозо, теемс кодамояк контент эсь кельсэ. Ды седе мейле ёвтась истят цётавкст: «Кото тёжат весе мирэнь кельтнень эйстэ ансяк кавксо нолдавить тевс Моданть пелензэ эрицятнень ютксо. Те китаень, англань, хинди, испаниянь, рузонь, арабонь, португалиянь ды французонь кельтне. Тень пингстэ 94 кельсэ кортыть 4 % Модань эрицятне. Ламо нациянь ды ламо келень Россиянь Федерациясь течи те – 277 кельть ды диалектт. 74-тне – образованиянь государственной системасо, 74 кельть, конатнесэ моли телевещания, 63-тнесэ – радиовещания, 50 кельсэ – 504 газетань лемть, 31 кельсэ лиснить 125 журналт ды альманахт, 57 кельсэ нолдавить тёжат книгань лемть. Масторсонть 22 тёжадо ламо тиринь келень тонавтыцят… Эштё вете иеде икеле кортасть седе, што XXI пингенть прядовомс Моданть лангсо весе кельтнестэ лиядыть
10 %. Ней кортыть ансяк… 5 %. Кода келентень понгомс неть вете проценттнэс, мезе эряви теемс? Эряви чарькодемс, аволь ансяк минь вансттано койтнень ды келенть, мекевлангт, койтне ды келесь ванстсамизь минек! Секскак эряви теемс истя, штобу келесь эрязо свал ды эрьва косо. Тень кисэ, васняяк, эряви кортамс кельсэнть, тонавтнемс сонзэ ды, нама, эйсэнзэ кирдемс весе эрямонь ёнкстнэнь: те эсь ютксо кортнемась, СМИ-тне, культурась, искусствась, образованиясь, наукась ды натой, умок уш аволь од, киберпространстваськак, секс мекс сон копачи весе седикеле ёвтазь ёнкстнэнь. Ве валсо, келентень эряви цифровизация, те зярдо эйсэнзэ кортыть эрьва косо ды свал. Лиякс те – искусственной кель. Секскак пшкадян: седе ламо кортадо тиринь кельсэ, тееде эрьва кодат блогт, сайтт, компьютерэнь образовательной программат ды лия эрьва кодат контентт, косо карми марявомо келесь… Мезе теезь течи? Те – электронной валкст весе финнэнь-угрань кельтнесэ. Теезь зярыя келень корпуст: коминь, маринь, удмуртонь, карелэнь кельтнесэ. Ушодовсь мансинь, мокшонь ды эрзянь корпустнэнь теемась. Келень сервисэсь Интернетсэ ашти келень содыцятнень эйстэ…»
Форумонть шкасто ёвтазельть кельтнень, культурань, этнотуризмань коряс од ломанень проекттнэнь ды интернет-проекттнэнь изницятне. Весемезэ кевейкее ломань. Ёвтасынек, Мордовиясто изницякс лиссть Алексей Акашкин ды Елизавета Петровичева.
Седе тов РФ-нь АФУН-нть (Пётр Тултаев) ды Финнэнь-угрань ассоциациянь университеттнэнь ютксо (Роман Кучин) сёрмадстозель Вейсладямо, конась, Пётр Николаевичень валонзо коряс, виевгавтсы важодеманть кельтнень, культуранть ды этнической самобытностенть ванстомасо.
Мейле инжетне явновсть секциява, конатне мольсть кавто чинь перть ды косо истя жо ванновсть пшти кевкстемат ды максовсть лангозост эрявикс каршо валт.
Цетьверькень чокшне ёвтазельть «Морыця чувто» фестивалень изницятне: кода карминек содамо, киньгак эзть покорда – весенень максозельть казнеть. Ошонь парксо гайнесть «Марса-вейсэнь» моротне, а оперань театрасо ютась филармониянь артисттнэнь мельстуиця концертэсь. Музейтнесэ ды ошонть куншкасо сравтневсть эрьва кодат невтевкст, ютавтовсть мастер-класст инжетнень туртов.
Марина Агафонова