Вторник, марта 19, 2024
Важное



Газетанок секе-тев пачтни кулят республиканок томбале эриця эрзятнеде ды мокшотнеде. Ансяк ялатеке седе сеедьстэ ёвтнетяно минек раськень ломантнеде, кить эрить седе малава, шабра регионтнэсэ – Чувашиясо, Пензань, Ульяновскоень, Самарань, Нижегородской ёнкстнэсэ. Ды аламо мезе содатано сетнеде, кинь эрямост пачтинзе, саемга, Прибалтикав, Мурманскоев, Сахалинэв ды истя седе тов.

Инекужосо улемстэ теевинь содавиксэкс Бебиков Виктор Дмитриевич марто. Сон – Омской областьстэ. Сови тосонь «Финнэнь-угрань культурань центра» вейсэндявксос. Инекужонть молема шкастонть мартонзо кортнемс пек ламо эзь саво: а зярдоль. Сеяк, мезе кенеринек ёвтамо вейке-вейкенек туртов, невтизе: Виктор Дмитриевич Инекужов сась аволь, кода мерить, «сельмень микшнеме». Сонзэ, кода арсян, ламо лиятненьгак, васенце бажамозоль – вастовомс эсь раськень ломантнень марто, марямс вейсэ улемань сюлмавкстнэнь. Кода сонсь мерсь, неть вастовоматне максыть тензэ вий ды кемема: раськенек эзь куло, сон эри ды карми эрямо свал. Теде башка, Виктор Дмитриевич якась эрьва кува, совсесь книгань микшнема таркава, рамась ламо книгат ды моронь кассетат. Келя, весе те карми эрявомо Омской областьсэ эриця эрзятнень ды мокшотнень вейс пурнавома тевсэнть.
Седе тов Виктор Дмитриевич марто карминек ветямо кортамот телефононь ды Интернетэнь пачк. Карминь содамо, косо чачсь, кода понгсь Сибирев эрямо. Вана мезе сон ёвтнесь: «Чачинь Оренбургонь Абдулинской райононь Гавриловка велесэ эрзянь семиясо. Школам прядыя Емантаева шабрань велесэ. Туинь тонавтнеме Омск ошов: лётно-технической училищав, конань прядомадо мейле карминь важодеме гражданской авиациясо Карагандань аэропортсо (Казахстан). Велявтынь Омскоев. Куш кортыть Сибирденть, сон пек васоло ды тосо якшамо, теке марто тосонь ломантне пек седеймарицят ды паронь арсицят».

Весемева неяви, Виктор Дмитриевичень седеензэ талновты ды ризнэвти раськенек сы шказо. Паряк, те тувталось тердизеяк сонзэ совамс тосонь вейсэндявксонтень, ков пурнавкшныть финнэнь-угрань раськень ломанть. Эряви меремс, те вейсэндявксось теезь аволь ансяк лемензэ кисэ. Сон топавты покш ды эрявикс тевть. Теде кортыть эрьва кодат вастовоматне, чокшнетне ды лия покш читне, конатнень сынь ютавтыть эрьва иестэ. Виктор Дмитриевич эзь нузялдо, сёрмасо кучинзе сеть мероприятиятнень, конатнень ютавтызь меельце шкастонть. Весе сындест ёвтнемс, паряк, а мезекс. А вана вейкеденть а кода а ледстямс. Те – Финнэнь-угрань культурань масторютконь фестивалесь, кона ульнесь октябрянь (ожоковонь) 31-це чистэ ды Омской областьсэ ютавтозель уш кеменцеде. Те фестиваленть панжомсто, кода пачтясь В.Д.Бебиков, ловнозель поздоровонь сёрмась, кона кучозель Россиянь Финнэнь-угрань раськень ассоциациянь прявтонть П.Н.Тултаевень пельде. Весемесь, марят, ютась седе а ков парсте. Гайгсть морот финнэнь-угрань малав весе раськетнень кельтнесэ: финнэнь, удмуртонь, маринь, коминь ды истя седе тов. Кунсолыцятнень мельс пек тусть эрзянь-мокшонь моротне, конатнень казизь Мордовиясто сазь инжетне – «Мерема» ансамблясо морыцятне.

Весе теде В.Д.Бебиков сёрмадсь мелень кепедезь, теке кармавтсь чарькодеме: «Тесэ ули монь путовксомгак». Ды сеске ледстявсь тень, кода Саранскойсэ улемстэ кевкстемам каршо, кодат ёжомарямот сонзэ седейс кадсь Инекужось, Виктор Дмитриевич мерсь:

– Кодат ёжомарямот – валсо а ёвтавить. Весе оймем, теке мерят, сыргозсь. Монь туртов Инекужось макссь покштояк покш лезкс ды певтеме ёжомарямот. Весемеде ламо превей арсемат маринь «кругловой столь» экшсэ кортнемстэ. Арсян, кудов велявтозь, седеяк кеместэ кундан минек кельтнень, моротнень, койтнень-кирдатнень ванстомаст марто сюлмавозь тевтнес. Сестэ, паряк, монгак теян кадык аволь покш, но эсень путовкс раськенек лезэс.

Лисни, В.Д.Бебиков валонзо а ёртни варма мельга. Сон седеяк оймень путозь кармась топавтомо эсензэ лангс саезь тевтнень. Бути лиятнень седейскак Инекужось сыремтсь истят ёжомарямот, сон ютась аволь чавосто.

Раиса ЩАНКИНА

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».