Вторник, августа 11, 2020
Важное



Улить ломанть, кинь, мерят, овсе а токшить иетне. Кодамокс ульнесть одсто, истямокс кадовить сыредемазост. Сынст юткс лади совавтомс Надежда Басильевна Соколовань (тейтерькс Вдовина). Биде рунго, сэрей меште. Мизолксось а ёмси турвастонзо. Байгелезэяк тунь эзь полавтово.

Телефонсо мартонзо кортамсто а содыця ломанесь, секень вант, ловсы од тейтерекс. Аволь корты - чоледезь чоледи. Пейдезеви, теке сядо горниповт гайгезевить. А зярдо серьгеди моро - амарицяськак карми кунсоломонзо. Мо­рось лездась тензэ вастовомс мирдензэ мартояк.

Истя лиссь, Дубенкабуень Морга велень школадо мейле Надя Вдовина сась Саранскоев. Васня кармась важодеме приборостроительной заводсо, заочна тонавтнеме МГУ-нь филологической факультетсэ. Юткошкасто кармась яксеме «Келу» ансамбляв морамо. Эряви меремс, ансамблянь пурныцянтень Г.И.Сураев-Королевнень сатотсь ансяк весть кунсоломс тейтеренть ды мерсь: «Морыцякс маштоват. Пек шождасто кундат нотатнень. Вайгелетькак ванькс ды гайтев». Теде башка, Надя морсесь заводонь ансамблясояк. Покш чистэ кучнилизь морамо эрьва ков. Сеедьстэ сакшныльть парков. Тосо вастовстькак Миша марто. Мокшонь цёрась кувать яксесь мельганзо. Окойники, солавтызе Надянь седеензэ. Ды сынь вейсэндизь эрямост. Курок чачсь Света тейтерест. Те седеяк малавгавтынзе нинть ды мирденть. Кавонест арсесть, сынст ютксо вечкеманть мезеськак а калавтсы, кодамояк варма а пувсесы. Ды ялатеке, кода эрьва семиясо, сынст эрямосояк аволь весемесь мольсь валанясто. Вейсэ эрямось, кода сэрей пандо пряс куземась. Виень ды ёрокчинь апак путо сон а изняви. Надя сестэ уш кармась чарькодеме, вечкеманть кис эряви тюремс свал ды апак лотксе.

КОВ САЛМУКСОСЬ, ТОВ - СУРЕСЬКАК

Се шкастонть саезь ютасть ниленьгеменде ламо иеть. Мезень пачк ансяк эзь саво тенст ютамс. Теде нурькинестэ а ёвтневат. Мишань, кода военноенть, кармасть кучнеме эрьва ков. Дальней Востоксто Чехословакияв, Чехословакиясто - Польшав, Польшасто - Украинав. Мартонзо свал ульнесть низэ тейтерькинензэ марто. Кода эно лиякс? Ков салмуксось, тов - суреськак. Весемеде стакаль тенст, зярдо эрясть Львов ошсо. Се шкастонть самай ушодовсь СССР-нть каладомазо. Уш омбоце чистэнть, зярдо теде кулясь срадсь эрьва кува ды пачкодсь Львов ошов, мирдензэ (сон сестэ тонавтсь од ломанть вейке вузсо) ды эсензэ важодема таркасо (Надежда Васильевна ульнесь эйдень кужосо воспитательницакс) кармавтызь кортамо ансяк украинецэнь кельсэ. Савсь тонавтнемс те келенть. Весемеде парсте украинецэнь келенть кармась содамо Света тейтерест. Школатнева-кува келень коряс ютавтневиця пелькстамотнесэ сон натой сайнесь васенце таркат. Мейле истя жо шождасто тонавтнизе англань келентькак, конань ней Светлана Ми­хайловна тонавты минек вузсо. Те карми мей­ле. Васня жо Светанень аванзо марто савсь якамс ды эрямс тосо, ков кучилизь тетянзо.

ЭЙКАКШТНЕНЬ ТУРТОВ МАКСЫ ВЕСЕ ОЙМЕНЗЭ

Аламо шкань ютазь сыненст ялатеке савсь туемс Украинасто. Ков? Сайсть мель чачома мода лангс – Мордовияв. Саранскоев сазь, аволь сеске эрямост ладявсь кода эряви. Эсест эрямо таркаст арасель, савсь зярсыя эрямс Нюра патянзо кедьсэ. Савсь секе тев полавтнемс важодема таркатненьгак. Надежда Васильевна пейдезь видькстась, келя, ней а ледстявитькак тень весе сеть таркатне, косо савсь важодемс.
Васня саизь Саранск ошонь 34-це № шко­лав. Кармась ветямо морыцянь нупальне, эйзэнзэ якицятнень содавтомо эрзянь ды мок­шонь моротнень марто. Пурнась морыцянь курыне, кона сеске невтизе прянзо, кармась лиснеме изницякс эрьва кодат пелькстамотнесэ. Шнамонь валсо кармасть кортамо сондензэяк. Секс зярдо савсь ютамс лия школав (Саранск ошонь 2-це № школав), Надежда Васильевнанень седе шождаль ладямс сюлмавкст тосонь коллективенть ды сонзэ прявтонть марто. Эйкакштнень седейскак сон свал мукшнось кить-янт. Седе вишкинетнень марто кортнесь, кода авась эйкакшонзо мар­то. Седе покштненень ульнесь патянь-ялгань
экзаменэнь апак максо». Неть валтнэ На­дежда Васильевнань туртов ульнесть покш казнеде питнейть.
Истямо жо ладсо тевензэ ней полады 30-це № школасо, тонавты эйкакшт морамо, содавты эйсэст православиянь покш читнень марто.

ВЕЧКЕМАСЬ - ТЕ СЕ, МЕЗЕСЬ ТЕИ ЭЙСЭНЕК ВИЕВЕКС, МАЗЫЕКС, ОДОКС

Обуцянь коряс сонзэ а ловсак чевте калацякс. Зярдо эряви, машты эсензэ кисэ валонь каямо. А чатьмони сестэяк, зярдо мезеськак а туи мелезэнзэ. Школасо тонавтнемстэ пек вечкиль рисовамо. Кавксоце класстнэнь прядомадо мейле арсесь поладомс тонавтнеманзо Ицялонь педучилищасо. Мезесь-бути эзь вечкеве тензэ. Тейтересь псинзэ пачк одов саинзе документэнзэ ды велявтсь эсен­зэ школав.

Дубенкабуень Морга велесэ чачозь, овсе вишка пингстэ варчизе стака тевень теемстэ ливезенть танстензэ. Секс Надежда Васильевнань эзть тандавтне ды нейгак а тандавтнить кодаткак стакачитне. Вечки кудоютконь тевсэ озямо. Тонадсь стамо. Эрьва мезе машты эсензэ кедьсэ стамо-каярдамо. Се шкастонть, зярдо стака ульнесь рамамс од оршамот, Надежда Васильевна рамиль коцт, стыль оршамот эстензэяк, мирдензэ ды тейтерензэ лангскак. Ансамблясо морыцятнень туртовгак од оршамотнень стакшнылизь сынсь. Вейке ава марто кавонест лиясто веньперть а удыльть. Тень таркас, кодамо мельспаро сайнилизь, зярдо вансть, кода сынст морыцятне сцена лангс лисильть од ды мазый оршамосо.

Покш мельспаросо ашти Света тейтерензэ, Дмитрий содамонзо, Анюта ды Наташа нуцьканзо кувалма. Содамозо Дмитрий Вла­димиров - оперань ды балетэнь солист, Мордовиянь заслуженной артист. Паро се, сынь эрить маласо - Саранскойсэ. Зярдо мезе, сеске чиить. Мезе лия эряви ломанентень уцяскавокс прянзо марямонть кисэ?
Кевкстеманть лангс: «Мезенть ловат эсеть эрямосо сехте питнеекс?», Надежда Васи­льевна апак кавтолдо мерсь: «Вечкеманть. Ансяк вейке-вейкень вечкезь, ломантне кармить эрямо парсте. Вечкемс эрявить эсеть масторот, чачома таркатнень, эсеть кудот, малавиксэть, оят-ялгат. Вечкемась - те се, мезесь теи эйсэнек виевекс, мазыекс, одокс».

Раиса ЩАНКИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».