Мордовиясь – аграрной регион. Велень хозяйствань ёнксонть виевгавтомантень тесэ явови башка мель. Пшти вановт ало аштить эрьва предприятиясь, фермерэнь эрьва хозяйствась. Эдь весе сынь теить покш путовкс республиканть ды целанек масторонть лезэс. Истятнэнь ютксо Покш Игнатовань райононь Вармазейка велень Владимир Юрьевич Кабаевень крестьянонь-фермерэнь хозяйствась.
Аволь ламо шкань перть од ломанесь стявтсь-пурнась ракшань трямонь ферма ды панжсь важодема таркат аволь ансяк эсь велень, истя жо райононь лия велетнесэ эрицятнень туртовгак. Неень шкане те виев ды кеме предприятия, косо важодить малав сядо эсь тевень содыця ды ёроков специалистт, конатненень виень коряс топавтомс куш кодамо производственной тев.
Эсь хозяйстванть Владимир Кабаев ушодызе весемезэ кемень скалсто. Аламонь-аламонь эсь стаданть кастызе комсь скалс. Маризе эсь прянзо азорокс, весемесь моли парсте, мельс тусь. 2006 иестэ цёрась кортнесь тетянзо марто ды сынь сайсть 300 тёжат целковоень покшолмасо кредит. Неть ярмактнень лангс «Развитие семейных животноводческих ферм на базе крестьянских (фермерских) хозяйств» программанть лувсо стявтызь сядо скалс эсь васенце ферманть. Мейле ульнесь эштёяк виев важодема, конась лездась ламолгавтомс сюракшов ракшатнень, стявтомс неень шкантень ладиця фермат, келейгавтомс модатнень.
Лелянзояк, Вячеслав ды Михаил, эзть кадово ве ёнов, ды течи те хозяйстванть сынь ветить мирём. Лелятнень лангсо тракторонь-машинань паркось ды сюронть-тикшенть кастомась-анокстамось. Ояксчисэ вейсэнь важодемась лезды целанек топавтомс эсь хозяйстванть эрявикс тикшесэнть ды сюросонть.
Неть читнестэ минь ульнинек В. Ю. Кабаевень КФХ-сонть. Тесэ, кода лия хозяйстватнесэяк, молить «пси» шкат – ледить-анокстыть тикшетнень. Кода ёвтнесь хозяйствань прявтось Владимир Юрьевич, ламо иень тикшетнеде сынст лововить 970 гектарт, эштё 200 гектарт видезь веиенсетнеде.
– Весе сынст арсеви нолдамс сенажокс. Сюракшов ракшатнень андоманть туртов миненек тикшеденть, сенаждонть ды силостонть эряви аволь аламо, малав 12 тёжат тоннат, – тешксты Владимир Кабаев. – Ней вана ламо иень тикшетнестэ сенаж вейке курган анокстынек, тозо малав 6 тёжат тоннат каинек.
Зярдо ульнинек хозяйствасонть, тикшетнень ледемасо ды сенажонть анокстамосо важодсть кавто комбайнат, ледемань кавто агрегатт, усксемасонть роботасть кавксо единицат машинат-тракторт ды эштё «Кировец» кавто тракторт ульнесть кургансонть, сынст тевесь а шожда ды ответственной. Эдь бути сенажонь пештямось-каямось тееви эрявикс аравтлувтнень апак кирде, ракшатне кадовить коромтомо. Ледезь тикшесь зярыя шкань ютазь «сырги» ды чапаськады. Секскак ансяк стака техникасо сон матрави-калгодкстомтови ды тееви кода эряви.
Коромонь урядыця комбайнатне важодсть Вармазейка веленть эйстэ аволь васоло. Тесэ пурнасть ламо иень тикшенть.
Агрегатонть руль экшсэ важодсь ёроков ды покш опыт марто комбайнёрось Андрей Николаевич Темасов. Велень хозяйствасо сон важоди аволь аламо иеть, тевенть содасы парсте.
– Мон чачинь-касынь теске, Вармазейкасо. Зярдо ульнесь велесэнть колхоз, роботынь тосо. Колхозось каладсь, тевтеме жо аштеме а кармат, сынь Владимир Юрьевичень КФХ-с. Те шкас тесэ роботангак. Кода кортыть, косо чачить, тосо эряваткак, – корты Андрей Темасов. – Ней вана коромонь урядамонь комбайнасо важодян, тикшенть анокстатано. Теке жо техникасонть сёксь ёнов ледян кукурузанть. Истя жо мельган кемекстазь «МТЗ-1221» тракторось, конасонть тунда яла видемань тевтнень топавтан. Истя жо нуема шкастонть роботан сюронь нуема комбайнасонть. Лиякс меремс, свал тевсан. Техниканть варчнинь эрьва кодамо. Мезес илямак озавто, эрьванть марто муян кель-вал. Эсь тевенть пек вечкса. Кадык кортыть, велень хозяйствасо важодемась пек стака, монень жо сон мелень коряс.
Андрей Темасовонь комбайнанть мельга эсь КамАЗ-сонть ардсь водителесь Юрий Михайлович Рабин. Сонзэ техниканть кузовс пештявсь сенажось. Механизаторось хозяйствасонть важоди колмоце ие.
– Мон ломанесь велень, – тешксты Юрий Рабин. – Свал ульнесь мелем техникантень, секскак школадо мейле макссть тень прават, ды се шкастонть саезь свал руль экшсэ. Васняяк роботынь эсенек Вармазейкань колхозсо. Ней вана колмоце ие те хозяйствасонть КамАЗ-со важодян. Техникась а берянь. Кизэнь перть тикше, сенаж, сюро усксян, сёксня силос карматано анокстамо. Ды истя иень перть.
Евгений Николаевич Юношев важодсь тракторонь руль экшсэ, усксесь сенаж. Сон истя жо тескень, Вармазейкань. Школанть прядомадо мейле тонавтнесь Кемлянь аграрной техникумсо, «Техник-механик» специальностенть коряс. Важодема кизэ ушодовсь тиринь велень колхозсонть, козо саекшнизь трактористэкс. Зярсыя колхозсо роботась, мейле тусь вирень ванстыцякс, ульнесь оень теема заводсо операторокс. Варчнинзе виензэ лия тевсэяк. Зярыя иеде икеле сась те хозяйствантень, кармась роботамо тракторсо. Роботась тензэ муеви кизэнек-теленек. Ды тешксты, вадря, што велесэнть ули Владимир Юрьевичень хозяйствась, велесь эри.
Сенажонь туртов кургансонть важодсть механизатортнэ Анатолий Николаевич Николаев ды Вячеслав Анатольевич Чванов. Сынст лангсо ульнесь покш ды ответственной тевесь – эсь техникасонть седе вадрясто матрамс сенажонть, штобу ванстомс сонзэ вадрячинть ды лезэвчинть.
Тешкстама, В. Ю. Кабаевень КФХ-сонть течи ули весе эрявикс техникась: тракторт, комбайнат, сокамонь-видемань туртов агрегатт. Малав эрьва ие тракторонь-машинань паркось одкстомтови, рамави мезеяк од. Истя, ютазь иенть прядовомсто ды тедеде рамазельть дисковой изамот, культиватор, «Полесье» сюронь урядамонь комбайна, кавто МТЗ тракторт, видемань ды лов алов модань сокамонь туртов агрегатт, дискатор.
Кода тешкстыть механизатортнэ, неень шкань техникась важодемань туртов пек вадря. Сон эряза, топавтозь весе эрявикссэнть. Те весемесь тевентькак шождалгавты, шкаськак куш мезенть лангс ютавтови седе аламо.
Юлия ЕРЕМИНА
Фототне Эдуард Ретунскиень