Недлячистэ, медьковонь 11-це чистэ, Вирь Тавласо ютавтозель седеяк покш вастовома. Тов пурнавкшность чийнемань вечкицятне. Мордовия Республикань спортонь ды од ломанень политикань министерстванть ушодксонзо коряс тосо ютавтозельть чийнемань пелькстамот.

Ютавтомс сынст Вирь Тавласо – тень коряс меленть ёвтызе министрань полавтыцясь А.В. Соломкин. Андрей Викторович – эрзянь ломань. Сонзэ пек мелявтовты тиринь келенть уцясказо. Сонзэ валонзо коряс, тиринь келесь ванстови сестэ, зярдо весе ломантне лоткить виздемеде эсест раськест кувалма. Тень туртов эряви кепедемс сонзэ лементь, невтемс, кодат виевть ды превейть минек ломантне, кодат мазыйть таркатне. Весе те ули Вирь Тавласояк. Секс сон кочказель чийнемань коряс пелькстамотнень таркакс.

Пелькстамотнес (сынь, ёвтасынек, ютавтозельть васенцеде) сакшность, кода пачтясь тенек Пётр Рябов, 90 ламо ломанть. Сынь вастозельть кши-сал марто. Ведьгементне эйстэст тусть чиеме. Лиятне кадовсть музейга экскурсиянь ютамо, пелькстыцятнень туртов ярсамопелень пидеме.

Вастовомась ютась пек парсте. Весе кадовсть паро ёжосо. Теде сёрмадсть Интернетсэяк. Пелькстамотнень анокстыцятне арсить седе товгак сынст ютавтнемс те таркасонть.

Раиса Щанкина