Вторник, марта 19, 2024
Важное


Покш Березникень Эрзянь Найман велесэ прась уцяска улемс те иень сёксень лембе читнестэ. Кезэрень велесь вастымизь эрьва кодамо тюсонь мазычисэнзэ, лопатне сестэ эштё эзть кенере прамо, чувтотнеде-куракштнеде аволь аламо сонзэ куротнесэ. Велесь ашти пандо прясо, тунь а васоло касыця тусто виресь седеяк пек сонзэ мазылгавты.


Эрзянь Найманов самонь тувталось ульнесь кенярксов. Кода уш пачтинек тиринь газетань лопатнесэ, ожоковонь 29-це чистэ те велесэнть Мордовиясо васенцекс ушодсть Муромонь Чудотворецтнэнень, паронь арсиця чинязтнэнень, семиясо питнейчитнень ванстыцятненень Петрань ды Феврониянь лемс храмонь тееманть. Кода содатано кезэрень пачтямотнестэ, ламо пингень перть неть иневанькс чинязтнэнь ловить мирдтнень-нитнень ютксо вечкемань ванстыцякс-кирдицякс.

Те велесь, косто лиссть содавикс сёрмадейтне Кузьма Абрамов ды Василий Коломасов, содавикс ламо паро тевень коряс. Вана уш малав комсь иень перть кисэнзэ алкукс мелявтыця, тесэнь ломантнень эрямост шождалгавты Эрзянь Найман велень поселениянь прявтось Анатолий Иванович Симдянкин. Те сонзэ чачома-касома таркась. Тетянзо, Иван Семёновичень, ды аванзо, Раиса Захаровнань, ульнесть вейксэ эйкакшост. Кудазоронтень, ламо эйкакшонь триця тетянтень, стака роботадонть кувака пинге эзь саво эрямс, сон кулось колоньгемень иеде икеле. А вана авазо, Раиса Захаровна, кинень покш канст савсь кандомс ськамонзо вейксэ эйкакшонь кастомсто-трямсто, кулось мелень сексёстэнть, эрясь 84 иеть. Мирдть-нить теизь весементь эйкакшост важодеме вечкеме тонавтомга, маласост улезтненень паронь теемга. Анатолий Иванович семиясо ульнесь котоце эйкакшокс. Школасо парсте тонавтнеманть лангс апак вано, сеске вузов-ков тонавтнеме молемс тензэ эзь саво. Чарькодсь, эрявсь лездамс аванстэнь, тонавтнемась кадовсь мейлес. Масторонть икеле долгонзо топавтомадо мейле, велявтсь тиринь велев, ушодсь важодеме сестэ эштё уликс колхозсонть васня бригадирэкс, мейле фермань прявтокс. Сонзэ обуцясо седе ламо теемс паро бажамонть редязь, аравтызь велень поселениянь прявтокс.


Тешкстасынек, эсь шкастонзо сон прядызе РФ-нь Президентэнть юрсо Волго-Вятской академиянь экономической факультетэнть. А.И.Симдянкин марто минь кортынек веленть икелень ды неень эрямодонзо.
– Анатолий Иванович, Покш Березникень районсо кавто Наймант. Косто саевсь тынк веленть лемесь?

– Кезэрень шкасто миненек кадовсь истямо пачтямо. Вирьпулонь пандонть алов, косо ванстовсь Дошага латкось, 1600-це иетнестэ састь ве ёндонь эрицят, кить а содылизь рузонь келенть ды кортасть ансяк эрзякс. Ульнесь пачтямо, сынь важодсть наймонь коряс. Секс тенст истя мерстькак. Шкань ютазь неть ломантне теске кадовсть эрямо. Седе тов эштё вейке веле истямо лем марто теевсь минек ёнкссо, ансяк тосо эрясть рузт, секс велентень мерить Рузонь Найман, а минек Эрзянь Найман.

– Инескеть, пачтядо, мезе кадовсь велесэнк советской шкатнестэ, мезе теевсь од, ули-арась ломантненень кодамояк тев течи велесэ?
– Виде, советской шкатнестэ хозяйстванок сюпаволь малав весе невтевкстнэсэ, сехте пек товзюронь-розень коряс. Велесэнек эзть пекставо Культурань кудось, библиотекась, почтась, медпунктось. Улить колмо лавканок, косо весемесь микшневи велень эрицятненень. Нама, школанок савсь пекстамс, иестэ иес эйкакштне аламолгадыть, тонавтыцятне малав весе пенсионерт ульнесть. Течи школав якицятнеде кавксо эйкакшт, омбоце ды вейксэце классо тонавтницят.
Миненек эряви ёвтамс сюкпрянь валт МР-нь Прявтонтень В.Д.Волковнень: ютазь иестэ тенек макссть од, лембе ды паро школань автобус, конась эрьва чистэ эйкакштнень пачти Покш Березникев ды мекев.

Ледстяса школанть историянзо. 1920 иестэ веле куншкасо аштиця церьковась, конась лемдезель Николай Чудотворецэнь лемсэ, калавтозель, весе кирьпецтне нолдазельть школань теемс. Войнань стака иетнестэ васенце этажось теезель эйдень кудокс, ков пачтясть эйкакштнень весе икелень СССР-стэнть. Омбоце этажсонть ветявсть урокт. Ней школанть каршо Пазонть ды паро ломантнень лезксэст вельде ушодынек кепедеме од храм, конась кази тенек кемема веленек а ёмамодо. Текенень поладсынек, веленть ушодома таркас, лисьмапрянть малас, теезь часовня, конась тагояк лемдезь Николай Чудотворецэнь лемсэ.

– Анатолий Иванович, неень шкане веленть перька модатне соксевить-видневить?

– Течи минь ёвтатано покш сюкпря «Атяшевский» Агрофирмань прявтонтень Павел Степанович Шиловнень. Сон вейсэндинзе эсензэ хозяйствантень минек модатнень ды тевень содазь касты сюпав урожай. Сюкпря, минек ломантненьгак а стувты, зяро эряви, свал яви тенст пурназенть эйстэ. Ламотне ардтнить важодеме Чаунзань нармунень фабрикав.

– Сеедьстэ «Шумбрат, Мордовия!» фестивалень ваныцятнень кенярдовты «Найманочка» фольклорной ансамблясь. Пачтядо аламошка сынст ланга.

– Сынь минек сюпавчинек, сеедьстэ кенярдовтыть аволь ансяк эсенек велень эрицятнень, истя жо тердтнесызь Покш Березникень районсо ютавтовиця кенярксчитнес. Тейтерь-аватнень улить кезэрень мазый оршамопелест, ванстовсть-ютасть тенст патяст-бабаст пельде.
– Эрзянь Найманось республикань келес содавикс кода Кузьма Абрамовонь ды Василий Коломасовонь чачома-касома тарка. Мезе велесэнть тееви неть ине лемтнень ванстомга, одтнэнь ютксо сынст а стувтомга?

– Алкукскак, неть ёроков ине ломантне покш тешкс кадсть минек литературантень, совасть классиктнень юткс. 2014 иестэ, зярдо Кузьма Григорьевичень чачома чистэ топодсть 100 иеть, минь келейстэ тешкстынек те датанть республикань инжетнень марто. Те иень тунда велесэнек ульнесть Абрамовонь ловномат. Текенень поладса, ули музеенек, конась алтавсь К.Абрамовнень, сонзэ пештямосо покш лезкс макссь цёразо Владимир Абрамов. Кемеви, икелепелевгак минь поладсынек неть паро койтнень ды ламолгавтсынек музейсэ экспонаттнэнь.

– Ловозь ковт кадовсть Ине Изнямонь 75 иетнень тешкстамонь чинтень. Веленть куншкакуросо кеврунгонтень, ков совавтозь покштятнень, лелятнень лемест, тынк велень эрицятне, неяви, явить покш мель. Кить тенк лездыть те тевенть топавтомасо?
– Виде, те датась ине, минь свал тень марто весе сюлмавозентень явтано пек покш мель. Ледстяса, велестэнек войнань иетнестэ фронтов тусть 527 ломанть, эйстэст кудов састь ансяк 200, лиятне кадовсть тюремань паксятнес ды кулость госпитальтнесэ. Нама, истя жо стака ульнесь велесэ кадовозтнененьгак. Эйкакштне, кинень кемень-кемгавтово иеть топодекшнесть, уш покш ломанень тевть топавтсть…
Кода содатадо, умарьковонь меельце читнестэ масторонь келес тешкстави Спецназонь чись. Те иень сёксня велесэнек панжовсь кеврунго, конась алтавсь минек велень кавто од цёратненень – Геннадий ды Олег Николаевтненень. Васенцесь маштовсь Афганистансо службанзо кандомсто, омбоцесь 2008 иестэ – Чечнясо. Аволь ансяк кеврунго стявтовсь сынст лемс велекуншкасонть, истя жо кавто ульцятне ней лемдевить Геннадий ды Олег Николаевтнень лемсэ. Виде, теньсэ покш путовксозо Олегень лелянть, кие теизе весементь малавиксэнзэ лементь а стувтомга, ламо пингес ине тевензэ ледстнемга.

– Сюкпря.

Валентина ЮДИНА.
Покш Березникень район
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».