Воскресенье, мая 26, 2024
Важное

 

«АПО «Элеком» ОАО-нть юрс, конань прявтсо тевень содыця ломанесь, виев аграрникесь Иван Александрович Базакин, течи совить зярыя хозяйстват. Сынь важодить Ромодановань райононь Трофимовщина, Курмачкасы ды Ицялонь райононь Береговые Сыреси велетнесэ.


Аволь умок минь ульнинек Береговые Сыресинь отделениясонть. Кода моли важодемась ды велень хозяйствань ёнкссонть тевтнеде кортынек «АПО «Элеком» ОАО-нь Береговые Сыреси отделениянь прявтонть Михаил Степанович Девяткин марто.

Михаил Степанович велень хозяйствасо важоди весе эрямонзо перть, ниленьгеменде ламо иеть. Чачсь Ицялонь райононь Селищасо. Теске прядызе средней школанть ды седе тов мольсь тонавтнеме Кемлянь совхозонь-техникумонь «Агрономия» отделенияс. Тонавтнема шкасто саизь армияв, кавто иеть ютась службанть. Тосто велявтозь, одс поладызе тонавтнеманзо. А вана техникумонть прядомадо мейле ушодовсь важодема кизэ. Теке шкасто заочна тонавтнесь Н. П. Огарёв лемсэ МГУ-нь Аграрной институтсо.

– Важодема кинть ушодыя эсенек райононь Вечкусы велень И. В. Мичурин лемсэ колхозсонть, косо колмо иень перть топавтынь агрономонь тевенть, – ёвтни Михаил Степанович. – Мейле кочкимизь теке колхозонь председателекс. Эштё овсе одолинь, ульнесть тень 25 иеть. Ды комськавтово иень перть ульнинь колхозонь председателекс.
Кода тешксты Михаил Девяткин, колхозось свал икельцетнень ютксоль, эсь шкасто миллионерэль. Ды прявттнэяк весе ульнесть вадрясто важодицят, эсь тевень содыцят. Саемс куш тесэнь икелень прявтонть Николай Павлович Косолаповонь. Ульнесь кавто орденэнь кавалер, Россиянь заслуженной механизатор.

Мейле масторсонть ушодовсь перестройкась. М. С. Девяткин тусь председателень таркастонть. Кармась важодеме райононь Велень хозяйствань управлениясо прявт агрономокс. Те таркасонть важодсь а кувать, весемезэ иешка. Сон эзь аштеве кабинетсэ, конась лепштясь, сельме икеле свал ульнесть певтеме паксятне, видемань-нуемань тевтне, велень ломантнень важодемась. Весть тердизе райононь администрациянь прявтось ды мери: Береговые Сыреси велесэ ули «Труд» колхоз, тосо покш мелявкст, видемань тевтне молить пек стакасто.
– Мон ушодынь важодеманть. Колхозонь сестэнь председателесь ормалгадсь, шкась моли. Видемантькак прядынек, тикшетнеяк анокставсть. Хозяйствась жо кадовсь азортомо, – корты Михаил Девяткин. – Сонзэ эсь вановт алов саизе «АПО «Элеком» ОАО-сь, конань прявтсо сестэ ульнесь Харис Шамильевич Якубаев. Саизе истямо мель марто – председателекс карман мон. Те шкастонть «Труд» колхозось совась «Элекомонть» юрс ды кармась Береговые Сыресинь отделениякс. Ушодовсь важодемась. Ды вана уш комсьвейкее ие мон тесэ топавтан прявтонь тевенть.

Течи «АПО «Элеком» ОАО-нь Береговые Сыреси отделениясонть важодить малав ниленьгемень ломанть: механизаторт, ракшань трицят-кастыцят, дояркат, плотникть ды лия эрявикс специалистт. Модатнеде хозяйстванть аволь пек ламо, течинь чинтень 900 гектарт. Тесэ кастыть тикшеть, сюрот, кукуруза, чиньжарамо.

– Эряви меремс, велетнесэ ней тевтне аволь шождат – иестэ иес сынь чамить. Од ломанть малав овсе арасть. Саемс минек Береговые Сыреси веленть. Тесэ важоди средней школа, козо усксить кемень велестэ эйкакшт. Ды тонавтнемань те иенть прядовомантень тонавтницятнеде ульнесть весемезэ ведьгемень. Ютазь иестэ васенце классос молиця вейкеяк арасель. Ней, паряк, кавтошка кармить. Ды велень хозяйствасояк теке мелявксось – важодицятне а сатныть. Миненек эрявить скалонь потявтыцят. Течи сынст усксетяно Тарханова, Вечкусы, Болдасева велетнестэ. Лиякс меремс, весе маласо велетнестэ. Некеть тевтне аштить механизатортнэнь коряскак. Велетнесэ пек аламо од ломанть, седе ламотне пенсиясот эли пенсиянь иетнес пачкодицят. Мезе карми маласо шкастонть, а содави. Ней эдь кадратнень анокстамонть коряскак стакачить. Икеле аволь ансяк райцентратнесэ, покш велетнесэяк ульнесть велень хозяйствань специалисттнэнь анокстыця техникумт. Ней весе пекстнезь. Вузсо жо седе пек максыть теориянть, практикась жо свал ульнесь самай неть СПТУ-несэ, конатне кастсть вадря специалистт, анок важодицят. А ней техникумтненень пек стака тонавтницятненьгак пурнамс. Мелявкс.
Хозяйствасонть, сюротнень-тикшетнень кастомадонть башка, трить-кирдить сюракшов ракшат. Неень шкасто тесэ эйстэдест лововить 860 скалт ды вазт. Потявтовицятнеде – 280. Ловсонть предприятиянть кедьстэ рами «Консервный завод «Саранский» АО-сь.

– Кода Иван Александрович Базакин кармась «Элекомонь» прявтокс, сон тешкстась аравтлув – кастомс-виевгавтомс сюракшов ракшатнень трямонь ёнксонть. Ды те шканть перть продуктивностесь кассь 4 тёжасто 7 тёжат килограммат иезэнзэ, – корты Михаил Девяткин.
Эсь важодицятнень ютксто Михаил Степанович башка тешкстынзе механизатортнэнь Юрий Васильевич Зинкинэнь, Константин Иванович Девяткинэнь, Василий Петрович Лукьяновонь, Владимир Анатольевич Пискайкинэнь, скалонь потявтыцятнень ды ракша мельга якицятнень. Вадрясто важодить скалонь потявтыцятне Татьяна Анатольевна Митронина, Валентина Александровна Тарейкина, Ольга Викторовна Ревина, фермань прявтось Валентина Петровна Шаляева, ветврачось Татьяна Владимировна Загурдаева, ваз мельга якицятне Лидия Петровна Киселева ды Василий Николаевич Шаляев.

Василий Петрович Лукьянов хозяйствасонть важоди механизаторокс. Малав весе эрямонзо перть. Ушодсь сеске, кода колхозось совась «Элекомонть» юрс.
– Мон монсь шабра Папулева велень. Школам прядыя, тонавтнинь киномеханикень-телемастерэнь специальностенть коряс. Сестэ те профессиясь, кода кортыть, ульнесь трендовой. Мейле ульнинь армиясо ды, тосто велявтозь, кадовинь теске, велесэ, – ёвтни Василий Лукьянов. – Дизельсэяк савкшнось роботамс, эрьва кодамо тракторсояк, комбайнаскак од шкасто ойсинь. Сокамонь-видемань тевть, тикшень ледемась, модатнень анокстамось, удобрениятнень каямось ды ламо лия тевтне. Весементь тейтяно.

А вана Владимир Анатольевич Пискайкин важоди УАЗ автомашинасонть, сон ускси фермань важодицятнень.
– Мон свал килангсо. Важодицятнень усксян весе маласо аштиця велетнестэ. Важодема чим ушодови сехте васенцекс, эдь скалонь потявтыцятнень пачтямс эряви валске марто ранаяк. Хозяйствасонть уш малав комсь иеть роботан. Чачинь ды нейгак эрян Селищасо. Васняяк, кода сынь те хозяйствантень, роботынь трактористэкс, а ней уш кеветее иеть водитель, – корты Владимир Пискайкин.
– Минь важодтяно, зярс сатыть виенек. Снартнетяно кирдевемс ды кирдемс ломантнень. Эдь велесь эри, зярс улить важодема таркат. Лиякс пек стака, – кемексты Михаил Девяткин.

Юлия ЕРЕМИНА
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».