Вторник, марта 19, 2024
Важное



Аволь умок Дубёнка ёнксонь Социалистической Трудонь Героенть Н.М.Суродеевень лемсэ Поводелень средней общеобразовательной школасонть ютавтовсь вастовома, кона алтавсь «Сятко» велень спортклубонь юбилеентень.

55 иеть масторлангонь историясонть – те нурька шка, ломаненть туртов жо – цела эрямо. Неть иетнень перть те клубсонть вастневсть пек ламо вадря, ёроков ломанть, конат вечкить ды маштыть роботамо, башка мель явить спортонтень.
Спортклубонь важодемань весе иетнень перть тестэ лиссть 500 спортсмент васенце разряд марто, тёжадо ламотнень улить массовой разрядост. Покш каштанчисэ велень ды райононь эрицятне аштить СССР-нь стака атлетикань коряс спортонь мастерэнть И.М.Фадейкинэнь, СССР-нь сокссо кирякстнемань коряс спортонь мастерэкс кандидатонть А.В.Святкинэнь, СССР-нь гирянь спортонь коряс спортонь мастерэкс кандидатонть В.С.Борчинэнь, спортонь якамонь коряс олимпийской чемпиононть В.В.Борчинэнь коряс, кона «Сятко» спортклубсонть ульнесь ламоксть изницякс шожда атлетикасонть ды спортонь лия ёнкстнэсэ.

«СЯТКО» СПОРТКЛУБОНТЬ ИСТОРИЯСТО

«Сятко» велень спортонь клубось панжозель 1964 иестэ. Те ульнесь велень васенце спортклуб аволь ансяк районсонть, целанек республикасонть.
«Сятко» спортклубонть теевемантень ламо мель явсь Ленин лемсэ колхозонь сестэнь председателесь Н.М.Суродеев. Башка мель ды лезкс спортсментнэнень макссь сонзэ поладыцясь Е.А.Куликовгак. Спортклубонь васенце председателекс ульнесь Поводелень средней школань физкультурань тонавтыцясь В.И.Чекушкин. Истя жо клубонть прявтсо эсь шкасто ульнесть А.И.Михайлов, М.И.Христофоров, И.М.Фадейкин, И.Г.Святкин, В.М.Ломшин, М.И.Хохлов, М.Ермолаев, Е.И.Суханкина (Сайгачева), М.Я.Чичайкин, А.В.Святкин, П.П.Василькин, М.И.Рузавин. Эрьвась эйстэст тейсь пек ламо аволь ансяк велень ды райононь, целанек республикань спортонть касомасо-виевгавтомасо.
Иестэ иес Поводелесэ ламолгадсть спортсментнэ, спортклубонть юрсо ютавтовиця пелькстамотнень ламочись кассь, кассь спортсментнэнь ёрокчиськак, вадрялгавтовсь базаськак. Футболось, волейболось, гирянь спортось, шожда атлетикась, шашкатне эсь секциятнес пурнасть 400 ламо ломанть. Тей сакшность од ломантне Дубёнкастояк, Чиндяновастояк.
Ды свалшкань тренировкатне максыть невтевкст. Клубонь спортсментнэ невтсть ёрокчист РСФСР-нь спортклубтнень Спартакиадатнесэ, весесоюзонь велень налксематнесэ. Весесоюзонь велень спортонь васенце налксематнесэ гирянь кепсицятне Н.Грузнов ды И.Фадейкин эсь категориятнесэ сайсть васенце таркат, А.Михайлов – колмоце.

РСФСР-нь спортклубтнень омбоце Спартакиадасонть, кона ютавтовсь Волгоградонь ёнкссонть, «Сятконь» командась весе 24 командатнень ютксто саизе колмоце тарканть. Колмоце Спартакиадасонть жо 1978 иестэ Черкасск ошсо командась карми омбоцекс. Мейле «Сятко» командась ульнесь Орёлсо, Туласо, Новокуйбышевскойсэ, Дзержинскойсэ, Уфасо, Ульяновскойсэ. Ды весе неть оштнестэ клубонь спортсментнэ велявтсть казне марто.
Ютазь пингень 80-це иетнестэ Ленин лемсэ колхозось явсь башка мель клубонь спортонь базанть вадрялгавтомантень. Теезельть кайсема-оршнема, шлямо таркат, асфальтсо вельтязь ды лампасо валдомтозь хоккеень корт. Маласо вирьсэнть теезель валдомтозь трасса марто сокссо ардтнемань тарка. Рамавсь хоккейсэ, футболсо, волейболсо налксемань туртов формась.
Ёвтамс клубонь весе спортсментнэнь лемест, а саты газетань лопасонть таркась, ансяк спортклубонь историянть ваннозь, можна тешкстамс: 55 иетнень перть сонзэ юрсто лиссть аволь аламо ломанть, конат эсь эрямонть сюлмизь спортонть марто. Неть иетнень перть спортонь клубось кармась омбоце кудокс сядот ёроков цёрынькатнень ды тейтерькатнень туртов, ламонень лездась муемс эрямосо кинть. Клубось кастсь спортсменэнь семиянь цела династият. Ютксост Спиридоновтнень, Кирдяшкинтнэнь, Русскинтнэнь, Ермолаевтнень, Федькинтнэнь, Фадейкинтнэнь семиятне.

СЫНСТ СЕДЕЙТНЕСЭ «СЯТКОСЬ»
КИРВАЗТСЬ
СПОРТОНЬ СЯТКИНЕ

Кенярксчинь мероприятиянть ушодовомадо икеле, кона алтавсь «Сятко» спортклубонь юбилеентень, инжетне содавтызь школань музеенть, косо те чинтень анокставсь «Сятко» спортклубонь историясь» фотографиянь покш невтема. Тесэ ушодовстькак ледстнематне.
Ульнесть ламо кортамот, ёвтавсть ламо лембе валт. Райононь Депутаттнэнь советэнь председателесь А.И.Сайгачев пшкадсь пурнавозтненень лембе поздоров марто.

– «Сятко» спортонь клубось тейсь покш путовкс районсонть спортонть касомасо-виевгавтомасо, – мерсь сон. – Покш сюкпря велень спортонь ветерантнэнень-энтузиасттнэнень. Тынь эсь мельга ветиде цела поколения, весенень невтиде изнявкстнэнь.
Клубонь ламот ветерантнэнень ды спортсментнэнень максовсть Сюконямо конёвт буень прявтонть, «Единая Россия» партиянь отделениянь ды велень прявтонть пельде.
Эсь мельтнеде ды ледстнематнеде, велесэнть ды районсонть спортонть виевгавтомадо пурнавозтненень ёвтнесть спортклубонь ветерантнэ А.А.Дёмкин ды Е.И.Суханкина. Весе покш мельсэ кунсолость сынст спортонь эрямосто тевтнеде.

Те кенярксчись ламот пурнавозтнень туртов кармась покш тевекс. Ды сынст лангс ванозь, алкукс мерят: «Сятко» спортклубось кирдизе эсь лементь, эдь сон ламотнень седейс кирвазтсь спортонь сяткине, кона а лепами ламот иетнень перть. Кадык ламот ней эрямост сюлмизь лия тевенть марто, ансяк ялатеке вечкить спортонть, кенярдыть эсь ёнксонь спортсментнэнь саевксэст кисэ. Ды пек паро, спортклубонь икелень спортсментнэнь эйкакшост, нуцькаст поладыть сынст тевенть, явить мель спортонтень ды кирдить эсь школань ды велень честенть спортонь пелькстамотнесэ.

В.САЙГАЧЕВА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».