Елена Смирнова, МРДБ-нь Од ломанень ловномань куншкакуронь библиотекарь:

– Весе модамасторонок печти аволь шожда шкат. Миненек эряви улемс вейсэ, лездамс вейке-вейкенень. Лездамс эряви врачтненень, конат неень шкане кадызь кудост, семияст, тюрить стака орманть каршо. Кода лездамс? Аштемс тенек кудосо! Икеле мон зярдояк кудосо эзинь аштекшне, истямо обуцям, а цидярдан. Маряви, эрямось юты вакска ды мон стяко ютавтан шканть. Течи весе полавтовсь, эряви чарькодемс, минь тейтяно покш тев, бути карматано аштеме кудосо.

Изоляциянть шкасто эрямом лиякстомсь. Арасть капшамот, чийнемат ды те монень тукшны мельс. А чарькодян сеть ломант-нень, конатне кортыть, келя, а содыть, мезе теемс кудосо. Монь жо шкам а сатны тевень топавтомс!

Койсэнь, эряви арсемс-теемс аравтлув, кода ютавтомс чинть. Седеяк пек сетненень, кинь улить эйкакшост. Тесэяк муинь паро ёнкст. Зярдояк истя ламо шка эзинь ютавто эйкакшом марто! Вейсэ тейтяно урокт, ловнотано, налксетяно, вантано фильмат ды мультфильмат. Те шкане ловнынь сеть книгатнень, конатне умок эйсэнь учость. Теде башка, ванынь фильматнень, конатнень икеле эзинь ванкшно.

Карантиндэ икеле ламо яксинь ушова, зярыя часонь перть. Оймсема читнестэ весе шканть ютавтылия ушосо. Ней те а сатны… Тень таркас ули балкон! Умонь ули-паротнень ёртынек ды теинек вишка спортзал. Панжсынек вальматнень, нолдатано паро музыка ды – зарядка, упражненият, скакалка – чиньперть карми паро ёжо!

Лиясто косто-бути сы нусманячи, пелема, те шкастонть монень лезды медитациясь. Весенень мерян варчамс. Бути минек потсо, оймесэнек сэтьме, сестэ стакачитне ды мелявкстнэ ютыть вакска, а эряви арсемс берянде, мекевлангт, оймавтомс малавикстнэнь, ёвтамс паро валт ды каземс паро ёжо.

Карантинэсь прядови. Ансяк читне, конатнень ютавтынек кудосо семиянок марто, а стувтовить. Карматано ледстнеме неть читнень. Весенень эряви лоткамс, лекстямс свалшкань капшамодонть. Эряви чарькодемс эрямонть питнейчинзэ, явомс мель вечкевикс ломантненень. Арсян тенк кеме шумбрачи ды кемемс ансяк парос!