Вторник, марта 19, 2024
Важное


Мордовиянь прявт ошсо Раськень вейсэндявомань чинть тешкстамось ушодовсь Божественной литургиясто ды сюкпрянь ёвтамонь молебенстэ, конат служазь Иневанькс Феодоронь Кафедральной соборсо. Теке жо чистэнть Рузонь Православной Церьковась тешкстась Казанень Пазонь Авань пазавань кенярксчинть (1612 иестэ Московонть поляконь интервенттнэнь эйстэ олякстомадонть ледстнемга). Храмсо службадонть мейле кенярксчинь ютамось сыргась «Пингеде-пингес Россиянть марто» кеврунгонтень. Мордовиянь ды Россиянь флагтнень марто ютасть Весероссиянь Раськень фронтонтень, политической партиятнес, общественной вейсэндявкстнэс совицятне, профсоюзось, од ломантне. Саранскойсэ ютамосонть ды митингсэнть ульнесть 5 тёжат ломанть.


Мордовиянь Прявтонть пельде пурнавозтненень пшкадсь МР-нь Госсобраниянь Председателесь Владимир Чибиркин:
– Течи минь весе масторонть марто вейсэ тешкстатано башка кенярксчи – Раськень вейсэндявомань чи! Сонзэ юрсо – тиринь масторонть вечкемась ды сонзэ лезэс ломантнень вейсэндявомась. Раськень те ине тевесь путсь юр Отечестванть вельмевтемантень, ды теде мейлеяк ульнесть ламо тевть, зярдо Россиянь эрицятне вейсэндявсть ды изнясть, вейсэ печтизь стакачитнень. Вейсэнь уцясканть вельде минь кемекстынек вейкине обуцянть. Раськень вейсэндявомань чись лезды улемс седе малавиксэкс, седе виевекс. Аволь стяко кортыть: «Ламо лопат – вейке чувто!» Весе минь явовтано вейке-вейкень эйстэ. Ансяк вейсэнь ундоксонок, вейсэнь уцясканок, вейсэнь коенек ды культуранок, вейсэнь зыянонок ды кенярксонок. Минь пурнавинек тей, штобу эштё весть ёвтамс: «Минь – вейсэ! Минь пингеде-пингес Россиянть марто! Свалшкас!»

«Пингеде-пингес Россиянть марто» кеврунгонтень цецят путсть МР-нь Государственной Собраниянь Председателесь В.Чибиркин, МР-нь Правительствань Председателесь В.Сушков, МР-ва Главной федеральной инспекторось М.Сезганов, МР-нь Прявтонь Администрациянь руководителесь А.Богатов, Саранскоень ды Мордовиянь митрополитэсь Зиновий, политической партиятнес, общественной вейсэндявкстнэс ды раськень культурань автономиятнес совицятне.
Митингенть ютавтомадо мейле пурнавозтнень мазый моросост кенярдовтызь Мордовиянь шкинемань коллективтне.

* * *
Теке жо чистэнть Республикань Кудосонть явшевсть государственной покш казнеть, вастовомась алтазель Раськень вейсэндявомань чинтень. Мордовиянь Прявтось Владимир Волков ёвтась пурнавозтненень ды республикань весе эрицятненень поздоровт покш чинть кувалма, тешкстызе сонзэ эрявиксчинзэ весе масторонть туртов.

– Неть читнестэ минь ледстнетяно 1612 иень ине тевтнень. Сестэ эрьва кодамо раськень ды верань ломантне саизь эсест лангс масторонть уцясканзо кисэ ответственностенть, маштсть ванстомс сонзэ каладомадонть, – мерсь Мордовиянь Прявтось. – 1612 иень тевтне макссть историянь покш урок. Государствась кандови эрьва сонзэ эрицянтень. «А эряви вешнемс эсенк туртов лезэ, эряви весементь максомс вейсэнь тевентень» – Кузьма Мининэнь те кармавтомась кармась вейсэндявомань тешксэкс.
В.Д.Волков тешкстызе, залонтень пурнавсть сеть ломантне, кить теить покш путовкс Мордовиянь социально-экономической кемекстамонтень, минек обществасонть нравственностенть ды духовностенть виевгавтомантень.

– Мон ёвтан седейшкавань сюкпря весенень: общественной, од ломанень ды ветеранонь вейсэндявкстнэс совицятненень, промышленностень, строительствань ды велень, финансонь секторонь ды бизнесэнь важодицятненень, врачтненень ды тонавтыцятненень, наукасо ды искусствасо важодицятненень, специалисттнэнень, кить виевгавтыть туризманть, раськень культуранть, спортсментнэнень ды журналисттнэнень. Покш сюкпря тенк виде важодеманк кисэ, масторонть ды минек республиканть эрямонтень покш путовксонть кисэ! – мерсь Мордовиянь Прявтось.

Ёвтызе, меельце иетнестэ Мордовиянь эрицятне ютасть покш ды стака ки. Республикань историясонть од лопакс, вейсэндявомань вадря невтевксэкс кармась Футболонь коряс масторлангонь чемпионатонть ютавтомась.

– Васенце эскелькстнэстэ саезь ды сонзэ ютавтомань весе пелькстнэстэ минь маринек Мордовиянь эрицятнень виев лезксэнть, – тешкстызе В.Д.Волков. – Ней минек учить лия покш тевть, конат сюлмавозь нацпроекттнэнь топавтомаст марто, сынст яволявтынзе РФ-нь Президентэсь В.В.Путин. Маласо иетнестэ эряви ламолгавтомс Мордовиянь эрицятнень. Прявт тевесь – редявиксстэ кастомс зарплататнень, вадрялгавтомс эрямонь условиятнень. Теемс конкуренциянь кирдиця цифровой экономика, конась карми важодеме ломантнень лезэс.

В.Д.Волков тешкстызе, те кенярксчинтень истя жо тердезь од цёрат ды тейтерть, сыненст явшевить Российской Федерациянь гражданинэнь паспортт. Ёвтызе, неть од ломантнень уш улить изнявксост тонавтнемасо, наукасо, спортсо. Сынь изнясть олимпиадасо ды конкурссо, совить кадетэнь ды юнармиянь движениятнес.
Теде мейле республикань Прявтось явшесь государственной покш казнеть республикань эрьва кодамо сферасо важодицятненень, арсесь тенст сэтьмечи, паро эрямо ды покш изнявкст тиринь республиканть седе тов кастоманть-кемекстамонть лезэс.

Казнетнень ютксо ульнесть наградат Россиянь Президентэнть пельде. Истя, «За заслуги перед Отечеством» орденэнь II степенень медальсэ казезь В.Б.Тужилин – «Боевое братство» Весероссиянь ветерантнэнь общественной организациянь Мордовиянь отделениянтень совицясь. РФ-нь Президентэнь Почетонь грамотасо тешкстазь: Т.П.Цирулева – «Спортивно-адаптивная школа Е.В.Швецова сурдлимпийского и паралимпийского резерва» ГБУ-нь тренерэсь; Р.М.Миронова – трудонь ветеранось; И.С.Ерохин – «ТрансЭкопром» ООО-нь виевгавтомань коряс прявтось. РФ-нь Президентэнь Благодарность максозь А.М.Зюзиннэнь – «Саранский Дом науки и техники» учреждениянь прявтонтень.

Татьяна ИКОННИКОВА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».