Вторник, марта 19, 2024
Важное



Вечкемадо те историясь уш ливтнизе весе масторлангонть, ёвтнекшнинек миньгак «Эрзянь правдань» лопатнесэ, невтекшнизь Васенце каналонь «Пусть говорят» передачасонть. А историясь те - эрзянь ёнксонь цёранть ды финнэнь тейтеренть ютксо войнань стака шкатнестэ сыремтезь вечкемадонть, конань поладксозо лиссь уш минек шкатнестэ.



Те историянть эсензэ героензэ, ды аволь меельце таркасо ашти Отяжеле ёнксонь Покш Манадыши велень средней школань историянь тонавтыцясь, краеведениянь музеень кирдицясь Сергей Викторович Сидоров. Аволь умок вастовинек Сергей Викторович марто, ды сон седе домкасто ёвтнесь те тевденть. Минь жо весемеденть пачтятано тыненк, газетанок ловныцятненень.

- Весть социальной сетьсэ понгсь тень седейс токиця сёрма полонс понгозь СССР-нь цёранть ды финнэнь од тейтеренть ютксо вечкемадонть. Вешнить монь земляконть - Ине Отечественной войнань ветеранонть. Маряви, умок уш войнаськак прядовсь, эриця ветерантнэдеяк малав овсе эзть кадово, а тесэ Финляндиясто тейтересь вешни Россиясо эриця тетянзо, - ёвтни Сергей Сидоров.

Вана жо мезе пачтясь тона сёрмась: «Мон вешнян эсь тетян, конань зярдояк эзия некшне, - сёрмадсь Орвокки Кейсала. - Монень уш 73 иеть ды покш мелем содамс, кода ладявсь тетянь эрямозо, мезе мартонзо лиссь седе мейле, кода сон велявтсь Финляндиянь военнопленноень лагерьстэнть СССР-в. Тетянь лемезэль Михаил Кузьмич Кузин. Ине Отечественной войнань иетнестэ сон ульнесь полонсо Финляндиясо. Понгсь полонс Петрозаводск ошсо 1941 иень таштамковонь 28-це чистэ. Званиянь коряс рядовоель. Тетянь полонс кундызе Финляндиянь армиянь ремонтной 52-це ротась, ульнесь военнопленнойтнень 2-це № Организационной лагерьсэнть».

Седе тов сёрмасонть пачтяви: 1944 иень панжиковонь 15-це чистэнть саезь ожоковонь 15-це чис Михаил Кузин роботась Центральной Финляндиянь Киннула общинань Корпелань фермасонть. Тосо сон теевсь содавиксэкс финнэнь од тейтеренть Ида Анна-Лииса Воутила марто, кона истя жо важодсь фермасонть ды эрясь аволь васоло аштиця ведькевсэнть. Михаилэнь ды Идань ютксо сыремсь вечкема. Курок Ида пекиясь Кузинэнь пельде, ансяк Михаил эйкакшонть чачомадо эзь сода, вейсэ лия военнопленнойтнень марто сонзэ велявтызь СССР-в. Меельце пачтямотне сондензэ - Вайниккала марто границянь пунктось: 1944иень ожоковонь 24-це чись. Теде мейле Ида уш мезеяк эзь марсе Михаил Кузин ланга.

1945 иень эйзюрковонь 2-це чистэ Финляндиясо Михаил Кузинэнь чачсь тейтерезэ Орвокки. «Ней мон уш сырян, - сёрмады Орвокки, - ды ули мелем содамс, мезе лиссь тетянь марто СССР-в велявтомадо мейле. Мезе мон содан тетядон: сон чачозель Мордовиясо (Мордовская АССР). 1941 иень меельце эрямо таркась: Отяжеле ёнксонь Манадыши велесь. Войнадо икеле тетям роботась пидицякс-паницякс, урьвакстозель. Нинзэ лемезэль Авдотья Осиповна Кузина. Тетянь ланга содан, сон сэтьмель, вадрясто важодицяль ды ласте пек паро ардтницяль. Финнтнэ тензэ мерильть Микко. Фермасонть важодицятне вейкест-вейкест марто эрясть ояксчисэ ды пек апаркстомкшность, зярдо кармасть содамо СССР-в кучомадонзо. Финнэнь велесэнть сонзэ лемдильть казакокс ды кортасть, келя, тетязо ульнесь священникекс. Фермань азортнэнь вишка тейтерест Каарина, кона ней уш сыре, ледстни, Михаилгак, ды монь авамгак пек авардсть, зярдо сась шка явомс.

Авам зярдояк эзь ёвтне тетянь ланга. Зярдо снартнинь мезеяк кевкстемс, ансяк авардиль. Монь авам, Ида, кулось 19 иеде икеле, ялаксон-сазорон истя жо весе кулость. Тетянь ланга а покшке информациянть мон саия эсь раськетнень, фермасо важодицятнень пельде ды Финляндиянь национальной архивстэ.

Кеман социальной сеттнень вийтнес! Лездадо, инескеть, муемс куш кодамояк пачтямо тетян ланга ды сонзэ малавикстнэде».

- Мон важодян краеведениянь музейсэ ды эрян самай Отяжелень Покш Манадыши велесэ, секс те сёрмась пек токимим, - корты Сергей Сидоров. - Мон кандован ломантнень се поколениянтень, конат содылизь Ине Отечественной войнань ветерантнэнь, зярдо сынь эштё эрясть масторлангсонть. Ледстнян, кода минь, котошка иесэ цёрынькатне, каштом лангсо сэтьместэ кунсолынек икелень фронтовиктнень ёвтнемаст. Мезенть-бути чарькодинек, мезесь-бути тенек ульнесь аволь иень коряс. Мейле, аламодо касозь, кевкстнилинек бабанок ды тетянок седе, мезесь эйкакш шкасто а чарькодевиль. Ансяк вана эйкакшпорасто марязденть ды неезденть мельтне эрить седейсэнь течис.

Пек мелявтовтсть эйсэнь сеть солдаттнэнь уцяскаст, конат понгонесть полонс. А мезть кортамс - война.

Шабрасонок, Сабанцеле велесэ, эрясь Иван Бояркин покштясь, конань ёвтнеманзо коряс, саизь войнав. Солдаттнэнь, вейс пурназь, ветизь экшелямо. Оршасть ванькс оршамот. Лиссь сыненст полковникесь ды мерсь: «Цёрат, идеде прянк, кие кода машты», - ды ёмась ков-бути. Сеске каявсть немецтне. Ды вана полон. 4 иеть Иван Бояркин покштясь Северной Франциясо полонсо улезь роботась шахтасо. 1945 иестэ сынст олякстомтызь, мерекшнесть туемс США-в. Кие отказась, максызь советской ёнксонтень. Зярс ванность полонс понгомань ды тосо прянь ветямонь тевтнень, роботась Карелиянь рудниксэ. Паряк, сон истя ульнесь фильтрационной лагерьсэ.

Ульнесь эштё математикань тонавтыцянок Михаил Иванович Терёшкин. Сонгак немецень полонсоль. Кавксть оргодекшнесь тосто (Польшасо), ды кавксть ёвтылизь тосконь эрицятне. Войнадо кинотнень Михаил Иванович эзь вано, куроксто нардылинзе сельведензэ ды лоткавтылизе телевизоронть. Сэредьксэсь, паряк, покш ульнесь.

Минек велесэ ульнесть истяткак, конат полонсольть, ды панжиковонь 9-це чистэ митингев а якильть. Велесэнть кортыльть, сынь войнань шкане ульнесть «полицаекс» эли «власовецэкс».

Истя вана эйкакшпорань ледстнематне кармавтымизь кундамс Михаил Кузьмич Кузинэнь вешнематнес. Ды сюлмавсь сёрмадома Орвоккинь тейтерензэ Кайсу Кейсала - Касейа марто. Кайсу рузонь келенть а содасы, мон а содан финнэнсенть. Савсь тевс нолдамс автопереводчикенть...

Сергей Викторович сеске явинзе Манадыши лементь марто Отяжелень ды Орданьбуень районтнэсэ весе велетнень, ламо роботась архивсэ. Вешнесь сюлмавксонть куш кодамо сурине вельде. Ды весть сонзэ электронной почтас сась сёрма Отяжелень райононь Ине Отечественной войнань участниктнень лемест марто. Сонзэ ваннозь, Сергей Викторович редизе, Кузин Михаил Кузьмич сонзэ Покш Манадыши велентень кодаяк а кандови. Ваннынзе лия велетнень ды сюлмавсь Вишнёвые Манадыши велень седе сыре эрицятнень марто. Тонат пачтясть, ульнесь велесэнть истямо фамилия, ансяк сонзэ кандтницятне умок уш весе тестэ тусть. Ульнесь Кузин Кузьма, сонзэ низэ Авдотья Осиповна ды сынст цёраст: Михаил Кузьмич, Николай Кузьмич, Алексей Кузьмич. Алексей Кузьмич 1945 иестэ чавовсь Польшасо.

- Седе тов карминь вешнеме социальной сеттнестэ, гайневтинь телефонга ды скайпка. Покш сюкпря ёвтавлинь весенень, кить лездасть пшкадемам каршо. Аволь васенцеде вана истя сави киньгак вешнемс, ды кода лисни, минек ломантне явить мель ды, свалшкань тевтнень лангс апак вано, лездыть, - тешксты Сергей Сидоров.

Теезель пек покш робота ды сон макссь результат. Михаил Кузьмич Кузиндэ информациясь муезель. Сергей Викторович сюлмавкшнось сонзэ малавиксэнзэ - тейтерензэ марто. Ды вана мезе пачтясь Людмила тейтерезэ:

Кузин Михаил Кузьмич чачсь 1912 иень якшамковонь 15-це чистэ Манадыши велесэ. Войнадонть икеле, 1941 иестэ, важодсь Карелиясо. Сонзэ ульнесть уш кавто эйкакшонзо -1937 иестэ чачозь Мария тейтерезэ ды 1938 иестэ чачозь Николай цёразо, низэ Евдокия (Авдотья). Семиясь эрясь Отяжеле ёнксонь Вишнёвые Манадыши велесэ. Эрямост а шождаль, важодеме савкшнось тукшномс масторонть келес. Истя, Михаил Кузьмич тусь Карелияв. Тосто саезельгак фронтов. Ды кода пачтяви Финляндиянь архивень конёвтнесэ, воёвамс савсь а кувать. 1941 иень таштамковонь 28-це чистэ Михаил Кузин саезель полонс. Военнопленноень карточкань сёрмадовксонть коряс Михаил ульнесь рядовоекс, профессиянь коряс - пидиця-паниця, раськензэ эрзя-мокшонь. Ульнесь-арась сон пидицякс-паницякс? Паряк, ульнесь, ансяк арсеви, сон те тевенть ёвтызе, штобу улемс пидема-панема таркантень седе маласо. Улить кевкстемат сонзэ раськексчинть коряскак. Сон рузоль, карточкасонть жо лият максоматне. Ансяк Александра тейтерензэ валонзо коряс, сон содылизе эрзянь келенть, эдь Манадыши велесь аштесь эрзянь Дюрькина веленть вакссо. Финнтнэ эсь раськень ломантнень кирдсть башка лагерьсэ, косо эрямо лувось седе вадряль. Паряк, Михаил содыль финнтнэнь ды эрзятнень раськень ояксчиденть ды ёвтызе прянзо эрзякс. Лагерьсэнть ды фермасонть Михаил ёвтниль, буто тетязо священникекс. Ансяк Вишнёвые Манадыши велень умонь эрицянть Александра Николаевна Елизаровань валонзо коряс, Михаил Кузьмичень тетязо ульнесь Пазнэнь кемиця ломанекс, ансяк аволь священникекс. Паряк, истя кортась, штобу аволизь лемдя коммунистэкс. Сеть шкатнестэ коммунисттнэнь ды комиссартнэнь леднильть.

Седе тов Михаил Кузин роботась Корпелань фермасонть, косо самай вастовськак Ида марто. Се шкане сыненст ульнесть 32 иеть. Михаил - цёрась редявицяль, а стяко велесэнть лемдизь казакокс, роботаськак парсте. Ида Анна-Лииса Воутила ды Михаил вейсэ роботасть пельие, ульнесть одт ды ютксост сыремсь вечкемань толось. Ансяк вана те вечкемась, паряк, пачтяволь беряньскак. Финляндиясо аватненень а меревиль сюлмавомс лия раськень цёра марто. Тень кисэ путовиль штраф эли пекстыльть тюрьмас. Военнопленноенть туртов жо вейке ки - ледилизь. Ансяк сыненст кода-бути удалась а понгомс зыянс.

1944 иень ожоковонь 24-це чистэ Михаил ютызе границянть ды велявтсь СССР-в. Ды теде мейле Ида Анна-Лииса Воутила уш мезеяк эзь марсе Михаил Кузин ланга.

ВОЙНАДО МЕЙЛЕНЬ ЭРЯМОСЬ

Седе мейле, кода Михаил Кузьмич Кузин ютызе Финляндия марто границянть, сон понгсь фильтрационной лагерьс, косо ванновсть сонзэ полонс понгомань, тосо прянь ветямонь тевтне. Зярдо ютызе ванноманть, кучозель НКО-нь (обо-ронань народной комиссариатонь) системань важодемань батальононть юрс.

1946-1948 иетнестэ Советской Армиясто демобилизовавсть военнослужащейтне ды, нама, сеть, кить совавтозельть важодемань батальонтнэс. Михаил Кузин вешсь нолдамс сонзэ Мордовияв, косо эрясь войнадонть икеле. Ды тесэ лиссь, што неть мельтнень сави стувтомс. Неть ломантнень коряс ульнесь лия арсема - кадомс сынст сеть таркатнес, ков састь батальонтнэнь юрсо. Тень туртов сынст марто кемекстыльть ламо шкас важоемань договорт, кармавтылизь ускомс семиясткак. Кие-бути истя тейськак, лият жо орголесть. Нама, ульнесь пелема, кармить вешнемест. Ансяк весесоюзонь вешнемас сынст а максыльть. Михаил Кузьмич жо, кода закононь кунсолыця ломань, сёрмадсь договор ды кадовсь Уралонь Кизел ошс, ускизе тов семиянзояк: нинзэ, Авдотья Осиповнань, Мария тейтерензэ ды Александр цёранзо. Эряви меремс, велесэ эрямось сестэ а шождаль. Зарплатат колхозсо а пандыльть, урожаенть урядамодо мейле максыльть аламошкине сюро. Весе кемемась ульнесь эсь пиретнень лангс. Зярдо Михаил Кузьмичнень мерсть ускомс семиянть, сон сась Вишнёвые Манадышив, саинзе малавиксэнзэ.

Шахтасо важодема шкастонть Михаил Кузьмич невтизе прянзо производствань передовикекс, аволь весть тешкставсь покш казнесэ. Эряви меремс, шахтёронь тевентень максовиль покш питне, зарплатась ульнесь ламоксть седе покш промышленностень лия отраслятнень коряс. «Раужо сырненть» покшоль питнезэ.

Уралсо семиянть чачсть эштё цёраст, ансяк кулость овсе вишкинестэ. Тесэ жо Кузинтнэнень савсь кирдемс эштё вейке зыян - 1948 иестэ 10-11 иесэ чавовсь Александр цёраст, понгсь поезд алов. Людмила тейтерест ледстнеманзо коряс, тетязо свал кортыль теде покшэредькс марто: «Монгак, паряк, эрямом истя прядса, кода Сашка».

Тесэ жо зярыя шкань ютазь Михаил Кузьмичень чачсть тейтерензэ: Людмила - 1951 иестэ ды Александра - 1954 иестэ.

Шахтасо Михаил роботась 55-це иетнес, шумбрачинь коряс лиссь пенсияс. Пенсиязо а берянель, васня - 90 целковойть, мейле - 120.

Теке иестэнть ялганзо тердеманзо коряс Михаил семиянзо марто тусь Казахстанонь Щучинск ошов. Тосо чачсь Люба тейтерест. Ансяк мельс эзь туе тосонь эрямось ды Кузьма тетязояк тердсь велев. 1958 иестэ Кузинтнэнь семиясь сась мекев Мордовияв, Вишнёвые Манадыши велев. Кармасть котьмамо велень тевсэ, стявтсть кудо. Эрясть велесэ кавто иеть, тетязо кулось, ды Михаил таго пурнась килангов. Мезе кармавтызе туемс, кияк а соды. Людмила тейтерензэ валонзо коряс, паряк, ломантнень сельмень сявадомась. Тетязо получиль покш пенсия, а веленть туртов 120 целковойтне - те покш ярмакт.

1960 иестэ сынь одс тусть Щучинск ошов, а 1964 иестэ, шумбрачинзэ лавшомгадоманть коряс, (майсесь тевелявонь ормасо) тусть Чувашиянь Киря посёлкав. Орманть лецямс эрявсь пиче вирень кошт.

1990-1992 иетнестэ Михаил Кузьмич тусь Кирясто Мария тейтеренстэнь Казахстанонь Щучинскоев. Тосо чавовськак, кода эстензэ кортыльгак - понгсь тепловоз алов. Калмазь Щучинскойсэ, кода Авдотья Осиповна низэяк.

- Зярдо Орвокки ланга ёвтнинь Михаил Кузьмичень тейтертненень, весень туртов те ульнесь дива, - корты Сергей Викторович. - Ды вана мезе тень коряс сёрмадсь Александра тейтерезэ: «Содатадо, Сергей, монень марявсь, истя кармияк. Тетям ульнесь од, мельстуиця ломанекс, роботыцякс. Аволь весть ёвтниль, што Финляндиясо фермасо важодемстэ теевсь содавиксэкс вадря тейтерь марто. Ютасть иеть... Мон ледстнинь сонзэ ёвтнематнень ды истят мельть чарыльть. Ансяк тынк пачтямонк прок маней чине пурьгине. Покш сюкпря тенк. Орвоккинь ули мелезэ содамс эсьраськеденть, мекс жо тень а теемс. Од шкане те а редяви, ансяк иетнень ютазь эрьванть потсо мезе-бути полавтови. Нама, тейса весементь, штобу сон содаволь эсь рузонь ундокстнэде».

Зярдо Орвокки ушодсь тетянзо вешнеме, ламо информация эзь муе. Нуцьказо Кайсу Кейсала Касейа Финляндиянь Центральной архивс яволявтома тейсь 2000 иестэ. Муевсь жо Михаил Кузин 2018 иень ацамковонь 31-це чистэ. Алкуксонь казне Од иентень! Пельиень ютазь, медьковонь 15-це чистэ, Орвокки ды Александра вастовсть. Ды те вастовомась лиссь Отяжелень райононь велень школань историянь тонавтыцянть Сергей Викторович Сидоровонь лезксэнзэ вельде.

Теке марто, эряви тешкстамс, Финляндиясо ламот вешнить эсь раськест, конатнень малавиксэст ульнесть советской военнопленноекс, вешнить уш 70 ламо иеть.

- Эсь ёнксонь ломаненть а шожда уцясканзо лангс ванозь, ули мелем пшкадемс ломантненень, конат мелявтыть ветерантнэнь уцяскаст коряс. Лездадо муемс ветерантнэнь! Паряк, кияк эри маласо, соды сыре ломантнень. Кевкстнезь, архивтнень вельде тевтнень ванкшнозь, ламотне муевить ламо иень ютазьгак, - кемекстызе Сергей Сидоров.

Нама, весемесь ашти эсенек эйстэ. Илядо арсе, ломантнень уцяскадост истя, прок тонь те зярдояк а токатанзат.

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».