Четверг, мая 30, 2024
Важное

 

Июнень 17-це чистэ Мордовия Республикань Государственной Собраниянь Председателесь Владимир Чибиркин якась Ицялонь районов. Тосо сон содавтсь зярыя социальной объектт.


Ицялонь муниципальной райононь прявтонть Валентина Дмитриева марто вейсэ Ицяло велесэ ванкшнызь церькованть вакссо уликс покш эрькенть. Неень шкасто «Комплексное развитие территорий» государственной программанть вельде витневи сонзэ чиресь. Ицялонь велень поселениянь прявтось Александр Плотников пачтясь, тесэнь эрицятнень туртов те таркасонть тееви оймсема тарка: китне вельтявить тротуарной плиткасо, аравтовить озамо таркат, эйкакштненень налксема площадка. Маласо шкасто теевить цецянь пандят.

Теске мольсь кортамо седе, кода меельце шкастонть мазылгавтови ды паролгавтови Ицялонь куншкакурось. Невтемакс, Кемля велесэнть «Формирование городской среды» проектэнть лувсо витнезь центральной площадкась, одкстомтозь Ине Отечественной войнасо маштовозтненень алтазь кеврунгось.


Те районсонть улемстэ Владимир Чибиркин содавтызе сыре ломантненень ды инвалидтнэнень строявиця кудонть-интернатонть. Сон строяви «Старшее поколение» федеральной проектэнть эрямос совавтоманть лувсо, эйсэнзэ кармить 150 таркат.
Меельце шкастонть Ицялонь районсо стявтовить ламо од кудот. Невтемакс, райцентрасо «Переселение граждан из аварийного жилищного фонда в Ичалковском муниципальном районе» программанть вельде 30 лет Победы куросонть стявтови од кудо. Маласо шкасто ташто эрямо таркастост ломантне ютыть од кудос. Неть квартиратнень ванкшномсто Владимир Чибиркинэнь эштё ульнесь мелезэ содамс сынст теемань стройматериалтнэнь нардевчидест ды весе тевтнень прядовома шкадонть.

Теке жо чистэнть Владимир Васильевич ванкшнызе Терешковань лемсэ ульцяванть ютыця автомобилень кинть, конань коряс ульнесть ламо пшкадемат, теевсь содавиксэкс од водопроводонть ды ведень ванськавтомань станциянть теемаст марто.


* * *
Ицялонь районсо улемстэ Владимир Чибиркин якась Селища велев, косо се чистэнть тешкстызе 100 иень юбилеензэ тылэнь труженицась Елена Павловна Тюмкина. Те эрзянь авась чачсь-кассь ламо эйкакшонь триця семиясо, вишка пингстэ содасы кши сускомонть питнензэ. Ламо иеть важодсь «Куйбышев» лемсэ колхозсонть, топавтсь эрьва кодат тевть. Тосо теевсь содавиксэкс мирдензэ Василий Михайлович марто. Сон ульнесь Ине Отечественной войнань участникекс. Фронтсто велявтсь ранязь. Вейсэ мирдесь ды нись трясть-кастсть 10 эйкакшт. Елена Павловнань 11 нуцьканзо ды 12 правнуцьканзо.
Владимир Васильевич сонензэ ёвтась пси поздоровт ды макссь казнеть.

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».