Вторник, марта 19, 2024
Важное

Аштемковонь (июнень) 30-це чистэ тешкстызе чачома чинзэ мокшэрзянь раськень пек паро цёрась - Юрий Александрович Мишанин. Сонзэ содасызь аволь ансяк Мордо-виясо, содасызь весе Россиянть келес ды сонзэ томбале пек ламо мастортнэсэ. Содасызь аволь ансяк кода покш ученоенть: Ю.А.Мишанин - филологиянь наукань доктор, профессор, ламо иеть тонавтсь од ломанть Мордовиянь университетэнь филологиянь факультетсэ.

Ды аволь ансяк кода журналистэнть: Юрий Александрович кемень иеть топавтсь «Вестник Мордовского университета» научно-публицистической журналонь прявтредакторонь полавтыцянь тевтнень, мейле ульнесь «Финно-угорской газетань» прявтредакторокс, сёрмадсь 100 ламо наукань важодевкст, монографият ды учебнометодической пособият, конатнень ютксто седе ламотне алтазь национальной жур-налистикантень. Юрий Александрович Мишанинэнь содасызь, кода ломаненть, кона пок-штояк покш путовкс тейсь ды теи эсензэ раськенть лезэс, финнэнь-угрань раськетнень культураст ванстоманть туртов.

Юрий Александрович Мишанин чачсь Адаж (рузокс Адашева) велесэ, кона Мордовиянь Кадошкина буесэ. Школанть прядомадо мейле поладызе тонавтнеманзо Ленинградонь Жданов лемсэ государственной университетсэ. Сонзэ прядомадо мейле (1983 иестэ) сась Н.П.Огарев лемсэ МГУ-нь филологиянь факультетэв. Тосо важодсь 1987 иестэ саезь 2018 иенть самс. Ульнесь Н.П.Огарев лемсэ МГУ-нь региональной журналистикань теориянь ды практикань кафедрань прявтокс (2002-2006), филологиянь факультетэнь деканокс (20142018). Теке шкастонть топавтсь Равчирень Финнэнь-угрань раськетнень культурань куншкакуронь прявтонь тевтнень. 2014 иестэ саезь Ю.А.Мишанин - Мордовия Республикань гуманитарной наукань научно-исследовательской институтонь прявтонь полавтыця, мокшонь ды эрзянь раськень регионъютконь вейсэндявксонь прявт. Сови Раськень тевтнень коряс Федеральной агентствань Общественной Советс, РФ-нь финнэнь-угрань раськетнень ассоциациянь Президиумс. Топавты ламо лия тевть.

Ю.А.Мишанин - Мордовия Республикань массовой информациянь средствань заслуженной важодиця. Казезь ламодояк ламо казнесэ. Сехте покшось - Славань III степенень орденэсь.

Юрий МИШАНИН: «ЛОМАНЕСЬ СЕСТЭ ВИЕВ, ЗЯРДО АВОЛЬ СЬКАМОНЗО...»

А содан, ламо-аволь муевить ломанть, кить эсест прявтодост кортавольть ансяк шнамонь валсо? Кодамо паро илязо уле ломанесь, сонзэ прявтсо важодицятне ялатеке муить асатыкст ды тувталт сялдомс ды пеняцямс лангозонзо. Монь эрямосон прявттнэде аволь пек ламольть. «Эрзянь правдасо» важодемстэ полавтовкшность колмо редакторт. Кие эйстэст седе пароль, а карман кортамо. Эрьванть ульнесь эсензэ обуцязо, прявтонь тевтнень ветямонь эсензэ коензэ. Кортамом течи карман ветямо ло-манденть, кинь марто 2007 иестэ саезь 2015 иес савсь важодемс Равчирень Финнэнь-угрань раськетнень культурань куншкакуросо. Сонзэ прявтокс сестэ ульнесь Юрий Александрович Мишанин, кинь лемензэ минь, мартонзо важодицятне, ледстнетяно ды карматано ледстнеме ансяк паро ды шнамонь валсо.

ТЕРДСЬ ТЕВТНЕНЬ ВЕТЯМС ВЕЛУВСО

Сеске апак пеле мерян, Ю.А.Мишанинэнь прявтсо кавксо иень перть важодемань шкась эрямосон ды, монень маряви, ялгань эрямососткак ульнесь ды кадовсь сехте астувтовикс шкакс. Видькстан, колоньгемень иеде мейле туемс «Эрзянь правдасто», косо весемесь ульнесь содавикс ды малавикс, монь туртов пек стакаль. Секс васня сайнимим кавтолдома ды натой пелема. Мезе эйсэнь учи од таркасо, кода ладявить сюлмавкстнэ асодавикс ломань марто, мутано-арась вейкине кель-вал од прявтонть марто? Кавтолдоматне стякольть. Весемесь ладявсь седе а ков парсте. Коллективентень пурнавсть эсь тевень содыця, культурасо чарькодиця ломанть. Кодат превейть, ёроковт иляст уле ломантне, вейсэнь тевесь а ладяви парсте, а карминдеряй ютксост вейке-вейкень чарькодема, вейке-вейкенень мелень явома. Чарькодизе тень Юрий Александровичкак. Секс васенце чистэнть уш, зярдо пурнавинек вейсэнь промксов, сон эрьванть кунсоломадо мейле мерсь: «Минь тынк марто тезэнь сынек аволь лужалеме, сынек тевень тееме. Тевенек кармить ламо. Ськамонь-ськамонь, вейке-вейкенень апак лезда сынь а топавтовить. Секс весень тердян: ветямс тевтнень велувсо, а явшемс, кинень седе шожда канстонть, кинень седе стаканть. Тевтне сатыть весенень».

ВАСЕНЦЕ БАЖАМОТ

Ды алкукс тевтне сатотсть весенень. Сынь лов пандо ладсо ся-ворсть лангозонок васенце чистэнть саезь. Васня эрявсь арсемс ды ла-дямс, мезе карми тееме эрьва отделэсь. Весементь, ловт, ушодынек чаво таркасто. Арасельть кодаткак программат ды аравтлувт. Эстенек савсь арсемс ды сёрмадомс, кодат бажамот аравттано икеленек, кодат од ушодкст арсетяно сыргавтомс. Минь сестэ виде паро лаказь лакинек эрьва чинь тевсэ-мелявкссо. Васенце тевекс саинек якамс Мордовиянь школатнева сень содамга, кода тонавтневить эрзянь, мокшонь кельтне, улить-арась эйсэст тиринь келень нупальть (кабинетт). Ютынек эйдень кужотненьгак. Карминек содамо, неть тонавтома учреждениятнесэ а сатнить тонавтома книгат, дидактической материалт. Ды сеске саинек мель нолдамс сынст. Сёрмадынек тень коряс проект. Идинек грант. Истя, Европань Советэнть пельде ярмак лангс нолдынек зярыя лемень изданият. Сынст ютксо: эрзянь, мокшонь сёрмадейтнень портретт, эрзянь ды мокшонь келень коряс таблицат, карта-схема, косо таркань лемтне сёрмадозь истя, кода ульнесть; сехте вишкинетнень туртов «Оршик няканть» альбом, «Финнэнь-угрань раськень ёвкст» аудиодискт,истя жо «Рузонь, мокшонь, эрзянь» валкс, кодамо эзь лисне зярдояк. Весе те питневтеме явшезель школатнева, эйдень кужотнева аволь ансяк Мордовиясо, лия регионтнэсэяк, косо эрить эрзят ды мокшот.

Карминек ютавтнеме эрьва кодат вастовомат, промкст, семинарт, яволявтынек зярыя пелькстамот. Сынст ютксо весенень содавикс «Зеркало нации» пелькстамось, ков эсест материалост макснесть национальной журналисттнэ. Ней те пелькстамонть лоткавтызь.

Ней нардавсь лия пелькста-моськак, конань яволявтокшнынек райононь газетатнень ютксо «Сырнень-зырнянь толга» лем ало. Эйсэнзэ ванкшнынек, кодамо мель райононь газетатне явить раськень культурань кемекстамонь, тиринь кельтнень, койтнень-кирдатнень ванстомань кевкстематненень. Сеть газетатнень содамга, косо седе парсте ды келейстэ ёвтнесть эрзянь, мокшонь раськетнень ютазь пингедест, сеть стакачитнеде, конат кирдить раськень культуранть ды тиринь кельтнень кемекстамост, ванкшнозельть райононь весе газетатне. Неть пелькстамотнень пек покшоль лезэст. Васняяк, сынь кепедсть журналисттнэнь мелест седе ламо сёрмадомс тиринь кельсэ. Омбоцекс, райононь газетатнесэ кармасть лиснеме материалт ды цела лопат эрзянь, мокшонь кельтнесэ.

Пек лембестэ ды паро мельсэ вастозель «Моя родословная» пелькстамось. Сондензэ марясть аволь ансяк Мордовиясо, васоло таркатнесэ эрицятнеяк. Эрьва ёндо кармасть само альбомт, дискт, косо пелькстыцятне ёвтнесть эсест раськенть историядонзо, муизь ды ледстизь покштяст-бабаст, васоло сырькаест. Пурназь материалтнэнь коряс паро улевель нолдамс башка книга.

Парсте ды лезэнь кандозь ютасть истят пелькстамотне, кода «Интернациональная семья», «Азор и Азорава», «Литературная Финно-Угрия!», «Бабань парь», «Национальный герой мордовского народа».

ОД УШОДКСТНЭ ВАЛОВСТЬ ПОКШ ТЕВС

Седе тов учость эйсэнек седеяк покш тевть. Анокстынек ды ютавтынек «Тиринь-тядянь вал» финнэнь-угрань книгань, «Кулдор-Калдор» финнэнь-угрань юморонь, «Сиянь суркс» кудораськень ансамблянь, «Тюштянь налксемат» спортонь фестивальть, козонь пурнавкшность ломанть Россиянь весе регионтнэстэ. Истят фестивальть теде икеле эзть ютавтне косояк. Минь васенцекс карминек ютавтнеме этнодискотекатненьгак. Те ульнесь 2007 иестэ «Шумбрат, Финно-Угрия» раськеютконь фестивальсэнть. Минек мельга этнодискотекат кармасть ютавтнеме финнэнь-угрань лия регионтнэсэяк.

Теде башка, карминек нолдамо эрьва кодат книгат, валкст. Минь васенцекс карминек нолдамо эрзянь, мокшонь кельтнесэ сёрмадовкс марто открыткат, ковкерькст, картат. Кармась лиснеме «Финно-угорской газетась», конань туртов седе ламо кулятнень сёрмадынек минсь.

Весемеде васолга срадсь «Этношкола» проектэсь, кона лиссь изницякс Россиянь Президентэнь фондонть яволявт пелькстамосонть. Сонзэ марто минь ютынек, ловт, весе Россиянть. Пачколинек эрзянь ды мокшонь малав весе велетнес. Якинек аволь чавонь кедть. Мартонок сайнинек моро марто дискт, книгат, лия литература, конатне нолдазельть те проектэнть топавтоманзо туртов явозь ярмак лангс.

Те малавгак аволь весе, мезе минь теинек кавксо иень перть. Минек нупальтне зярдояк эзть эрсекшне чаво. Ломантне сыльть эрьва ёндо. Кить книга мельга, кить энялдыльть сёрмадомс сценарий, кить - тевде кортамо. Секе шкастонть эзь лотксе дильнемеде телефонось. Сонзэ вельдеяк ломантне пшкалесть эсест энялдомаст марто. Арасель истямо тарго, бути кияк эйстэнек аволь туе командировав. Минек тердсть ды учость эрьва косо. Кинь ков кучилизь, тов сыргилинек. Ды кияк эйстэнек зярдояк эзь мере, мон а молян. Зяро таркав пачколинек, а ёвтави. Эзинек кочксе сеньгак, зярдо ды мейсэ ардомс. Эрьва мейсэ якинек: машинасо, поездсэ, самолетсо. Ульяновскоенть, Пензанть ды седе маласо лия таркатнень ютынек сядонь сядоксть. Аволь весть пачколинек Сургутов (Ханты-Мансийской округ), Петрозаводскоев (Карелия), Йошкар-Олав (Марий Эл), Ижевскоев (Удмуртия), Владивостоков (Приморской край), Эстонияв, Финляндияв ды ламо лия таркав.

МАРТОНОК СВАЛ УЛЬНЕСЬ МИНЕК ПРЯВТОНОК

Мезень кис весе тень ёвтнян? Невтемс, Равчирень куншкакуросо важодицятне эсест кшист ярсасть аволь стякодо. Весе ушодкстнэ арсезельть эсенек превсэ, топавтозельть эсенек вийсэ. Эрьва тевентень пу-тынек весе ойменек, ёрокчинек. Ды мартонок свал ульнесь минек прявтонок - Ю.А.Мишанин, кинь пингстэ Поволжской центрась аволь ансяк стясь пильге лангс, сон виензась, теевсь содавиксэкс весе Россиянть келес ды сонзэ томбальга.

Кинь оймесэ ули творческой сяткине, се ломанесь тевензэ а карми ветямо мельде-валдо ды ансяк тешксэнзэ кис. Се ломанесь сонськак карми паломо, лиятнень-гак сыремтеме покш ды валдо тевс. Юрий Александрович сеске сайсь истямо кой: эрьвась тевензэ топавтозо мелень путозь, эрязо свалшкань вешнемасо. Киненьгак эзь максо сэтьме эрямо. Лиясто а фатилинекак, кода ютыль чись, пачкодилинек кудов пурдазь нулакс - зяро тевть савсь топавтомс  чинь перть.  

Ю.А.Мишанин ульнесь минек ветицякс, превс путыцякс ды эрьва тевсэ лездыцякс. Эзь орголе ды эзь кекшне эйстэнек сестэяк, зярдо эрявсь понгавтнемс фотографият вандынь выставканть туртов. Мартонок вейсэ лисиль типографиясто ускозь од книгань эли газетань кандтнеме. Эзимизь стувтне кодамояк меро-приятиядо мейле озавтомс столь экшс ярсамо. Ломань ютксо пря а покшкавтни, а кочкси: сон - паро, тон-берянь. Сонзэ кияк эзизе некшне кежеекс, кода эзизь марсе казямосто кортамсто ды музгордемстэ.

Весемеде питнеекс эйсэнзэ ловсак сень: Юрий Александрович машты кунсоломо, лиятнень валост марямо, мелявксост чарькодеме. Мезе илязо лисе, сон зярдояк аволинзить кадо мельтеме ды лезкстэме. Паронзо кисэ миньгак снартнинек пандомс тензэ ансяк паросо. Визькс ульнесь а топавтомс сонзэ кармавтоматнень. Пелинек максозь тевенть теемс беряньстэ ды ашкастонзо ды тень кувалма коламс ёжонзо.

Мишанин кемсь эсензэ коллек-тивенть лангс, ловсь сонзэ нежекс, виень максыцякс, мельспаронь казицякс. Се сюлмось, кона сюлмась эйсэнзэ коллективенть марто, мезентеньгак эзь сезеве ды эзь керяво. Минь ульнинек вейкине семиякс, косо эрьвась содылизе эсь тарканзо ды тевензэ. «Ломанесь сестэ виев, зярдо сон а ськамонзо, зярдо сонзэ перька ламо оят-ялгат. Свал эряви улемс ломань ютксо, а кекшнемс, а орголемс эйстэст. Сестэ вечкеметькак кармить». Истя лови Мишанин, истя лади эрямонзояк.

Мельвановикс Юрий Александрович! «Эрзянь правда» га-зетасо важодицятне ёвтыть Тенк седейстэ молиця лембе валт чачома чинк кувалма. Арсетяно кеме шумбрачи, покш изнявкст ды икелев молема ки, седе ламо кенярксов ды валдо чить эрямосонк. Кадык педе-пев топавтовить весе арсеманк ды бажамонк!

Раиса ЩАНКИНА

Александр Степанович Лузгин, Эрзянь ды мокшонь раськень Регионъютконь общественной вейсэндявксонь Исполкомонь прявт:

- Юрий Александрович - эсь тевень алкуксонь профессионал. Косо бу аволь важоде, свал тевензэ топавты педе-пев. Содасы тиринь ке-лензэ, эсь раськень историянть ды культуранть. Секскак сонензэ шожда ветямс общественной тевть ды важодемс раськень тевтнень коряс. Те ломань, кинень кемат ды а пелят пшкадемс. Арсян тензэ ды семиянзо туртов кеме шумбрачи, уцяска, паро эрямо!

Надежда Гавриловна АТАМАНОВА,

Сызрань ошонь мокшэрзянь автономиянь прявтонь полавmыця, «Нармонь морыця» ансамблянь прявт:

- Мельвановикс Юрий Александрович! Кучтано Тенк пси поздоровт чачома чинк кувалма. Арсян Тенк кеме шумбрачи, седе ламо кеняркст, валдо уцяска, паро эрямо. Арасть кодаткак кавтолдомат,Тынь седе товгак карматадо виенк путомо эсь раськенк лезэс. Сызрань ошсо эриця эрзятне ды мокшотне зярдояк а стувтсызь Тынк марто вастовоматнень. Кемтяно, Сызраненть ды Саранскоенть ютксо ояксчинь шлштне зярдояк а лавшомить, седе тов седеяк кармить кемекстамо ды келейгадомо. Уледе шумбрат! Минь Тынк марто свал! Казнекс Тенк карми моро, конань Тынк туртов серьгедьсы «Нармонь морыця» ансамблясь, зярдо таго сатадо миненек инжекс.

Любовь Михайловна ШИБАНОВА, Ульяновск ошонь Ояксчинь кудонь мокшэрзянь культурань куншкакуронь прявт:

- Мельвановикс Юрий Александрович! Мереде ёвтамс седейшкавань лембе валт Юбилеенк кувалма. Тынь свал ультядо весень туртов ломанекс, кинь пельде тонавтнить, кода эряви вечкемс эсь масторонть ды эсь раськенть. Арсян Тенк свал молемс икелещ зярдояк а нолдтнемс кедть стакачитнень каршо. Кадык топавтовить» меленк-арсеманк ды весе бажамонк, ды весементь эйстэ, мезе Тынь тейтядо, туить ансяк паро ды лезэв касовкст. Оймесэнк улезэ сэтьме, кудосонк - лембе ды валдо. Шумбрачи Тенк ды Тынк малавикстнэнень ламо-ламо иень перть!

Лембе валт Юрий Александровичнень семиянзо пельде.

Татьяна Васильевна низэ:

- Юра марто минь теевинек содавиксэкс Санкт-Петербургсо, тов сынек тонавтнеме. Мон - Таллинн ошсто, сон - Мордовиясто. Сонзэ мельга, мездеяк апак арсе, туинь северной столицасто, кадыя тиринь Эстониям ды сыргинь а содавикс Мордовияв. Ды зярдояк теде эзинь янксе. Мирдем свал ульнесь кеме нежекс монь ды эйкакштнень туртов, семиянь алкуксонь азорокс. Эрьва авантень те пек эрявикс. Свал дивсян, кода сон вечксы тиринь ёнксонзо. Монь туртовгак Мордовиясь теевсь тиринь ёнксокс. Арсян мирдем туртов паро шумбрачи, штобу вейсэ кецявлинек нуцьканок ды правнуконок кисэ!

Анастасия тейтерезэ:

- Тетям - алкуксонь пример весень туртов, кода сон вечксы семиянзо, кудонзо, тиринь ёнксонзо. Минь кемтяно тензэ. Лангс ваномс, сон кеме ломань. Алкукс жо весе малавикстнэнь туртов - чевте седей, лембе ойме. Перьканзо свал ломанть, ялгат. Сон паро мельсэ анок лездамс эрьванень ды свал лезды. Весе неть паро ёнкстнэнь коряс минь тонавтнетяно тетянь пельде. Юбилеень чистэнть арсян тензэ кадовомс истямо жо эрямонь вечкиця ломанекс, кона эскели икелев ды теи тевензэ. Кеме шумбрачи!

Никита цёразо:

- Арсян, газетань ловныцятне содасызь Юрий Александровичень кода паро ялганть, кона анок лездамс эрьванень. Сон вечксы эсь тевензэ, ламо мель яви тиринь ёнксонтень ды масторонтень. Сазором марто аштетяно каштанчисэ ды мельспаросо, содасынек сонзэ кода покш буквасто Тетянок. Сюкпря тензэ, сон лезды валсо, лезды тевсэ. Тетяй, тон свал кармат монь туртов алкуксонь цёрань примерэкс. Вечктян ды аштян кувалмат каштанчисэ! Арсян шумбрачи, вийть, од арсемат ды од изнявкст!

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».