Вторник, апреля 07, 2020
Важное

 

Мордовия Республикань Союзонь Кудосо ютась «Стихия авторская» автортнэнь-морыцятнень фестиваль. Те концертнэнь ютавтыцякс кармась Мордовиянь Профсоюзось.

Морыцятнень истямо фестивалесь юты аволь васенцеде. Ды свал тесэ невтить пряст од ломанть, од морыцят, кода кортыть, од чамат. Ваныцятне пек учить концертэнть, косо несызь ды марясызь вечкевикс морыцяст, содавтовить од моротнень марто.

– Профсоюзтнэ паро мельсэ вастыть творческой эрьва кодамо тевтнень ды арсематнень, конатнень вельде ванстовить ды кемекставить минек эрямонь паро койтне. Мордовиянь Профсоюзонь федерациясь вансты ломантнень социально-трудовой праваст, ваны трудовой законодательстванть топавтоманзо мельга. Теде башка, кемексты эрицятнень культурной ды оймень витемань ёжост. Саемга, профсоюзось ютавты ламо культурно-массовой, спортонь, шкинемань вастовомат. Минек эрямосо те пек эряви. «Стихия авторская» республикань фестивалесь – Мордовиянь профсоюзонтень совицятнень эрямосо лезэв тев, – кортась концертэнть панжомсто Мордовиянь Профсоюзонь федерациянь прявтось Сергей Борисов.

Сцена лангс лиснесть кемнилее морыцят. Весе сынь эрьва кодамо таркасо важодицят, улить ютксост студентт ды «Струна» студиясонть морыця эйкакшт. Кой-кить морсить эрьва фестивальсэ. Ды сынст морамост пек учить ваныцятне! Саемга, те фестивалень авторось Владислав Голубчик, Виктор Слугин (сон морась тенек од моронзо), Вардан Дерюга, Наталья Новикова, пек лембестэ вастозель Ташто Шайгова ёнксонь Новотроицкое велень Свято-Владимирской церьковань настоятелесь, иереесь Борис. Истя жо ламо цяпамот алтавсть Алексей Гагариннэнь, Дарина Морозованень, Владимир Акулининнэнь, «108 Hrz» рок-группантень ды лиятненень.

Гитарань гайгемась ды паро моротне казсть весень туртов мельспаронь ёжо.

Татьяна Маторкина