Покш Березникень райононь парень теицянть Олег Буровонь содасызь аволь ансяк республикасонть, сонзэ томбалеяк.
Чувтонь пельксстэ эсь кедьсэнзэ сон арси-теи эрьва кодамо кедьгеть-мезть, салтоманть туртов тумонь парть, кандтнемапельть (подност), ведьлазт, салатникть ды ламо лият мезть, конатнень мельспаросо рамсить Мордовиянь эрицятне ды инжетне.
Чувтосто эрьва мезень тейнеме Олег ушодсь аволь чаво таркасто – те эрямонь кувалмосо цела история. Тевесь сеньсэ, Буровтнень семиясо бондаресь аволь ансяк сон, те важодемась моли раськестэ раськес. Ды сень лангс апак вано, технологиятне кеместэ совасть эрямозонок ды допрок полавтызь физической трудонть, сынст ремесласт неень шкастояк пек вешевикс. Эдь питнень алкуксонь путыцятне содыть – тумонь парьсэ салтовкстнэ седе тантейть суликань кедьгесэ салтозтнень коряс. Текенень эрьва бондаресь кеми: кодамояк машинанень а тееви паресь истя, кода тейсы эсь кедьчелькев кедьсэнзэ ломанесь. Эдь роботось а мари чувтонть чинензэ, тень кувалма сон а машты кочкамс те эли тона ярсамо- ды симемапеленть алов ладиця сырьянть.
Эряви тешкстамс, самай Олег республикасонть васенцекс тонавтнизе эрьва кодамо породань чувтосто сегментной тоцямонть. Неть: ольхасто, селейстэ (вяз), раужо тумосто. Те техникасонть Буров тейни салатникть, вазат ды домка чакшт.
Ламо иетнень перть сон теевсь профессионалокс, паро кедьчелькевекс. Нама, тень кис ламоксть казневсь.
Тевенть виевгавтомасо Олег кеми эсь вийтнес, содамочитнес ды семиянь опытэнтень. Ансяк кеме партнёртнэдеяк ламось ашти. Буров аволь весть пшкалесь лезкс мельга «Мой бизнес» центрав, конась важоди «Малое и среднее предпринимательство» национальной проектэнть коряс, ды уш зярыя иень перть сон ловови те центрань клиентэкс.
– «Мой бизнес» центрасонть монень лездасть чарькодемс, кода лисемс электронной микшнемань площадкас. Кевкстемась решазель питневтеме ды нурька шкас. Те покш лезкс сетнень туртов, кить арсить ушодомс эсь тев эли уш ветить сонзэ, – тешкстась кедьчелькевесь.
Теде башка, Олег Буров свал эрсекшни эсь тевень ветицятнень ярмункатнесэ, 2022 иестэ ёрокчинзэ невтизе «Территория бизнеса», 2023 иестэ «Лучший в своём деле» форумтнесэ.