Суббота, октября 24, 2020
Важное

Таштамковонь 7-це чистэ саезь 12-це чис мольсь «Равось – ояксчинь лей. Рав чиресэ эриця раськетнень культуратнеде вейсэнь кортамот» XIX Раськеютконь этнокультурной экспедициясь-фестивалесь. 
Сон ютась ФАДН-нь, МР-нь Культурань, раськень политикань ды архивень тевень министерстванть, Равчирень финнэнь-угрань раськетнень культурань куншкакуронть ды Мокшонь ды эрзянь раськень регионъютконь общественной вейсэндявксонть лездамост вельде. Ушодовсь экспедициясь Саратов кезэрень ошстонть, косо делегациянть Рав леенть чиресэ учось «Федор Достоевский» теплоходось. Ансяк теде икеле ФАДН-нь прявтонь полавтыцясь Станислав Бедкин, Мордовиянь Культурань министрась Светлана Баулина, Саратовань областень Внутренней политикань министрась Наталья Трошина, Равчирень финнэнь-угрань раськетнень культурань куншкакуронь прявтось Елена Ломшина, Мокшэрзянь раськень исполкомонь прявтось Юрий Мишанин, Межэтнической журналистикань гильдиянь прявтось Маргарита Лянге ды весе участниктне, конатне пурнавкшность Россиянь зярыя регионсто, путсть цецянь каштазт Изнямонь парконь Пингеде-пингес палыця толонть ваксс. Теде мейле Саратовань эрзятне ды мокшотне седейшкава вастызь минек делегациянть «Национальная деревня народов Саратовской области» этнографиянь комплекссэнть, каванизь тантей пидевкстэ-паневкстэ, кецявтызь морамосо-киштемасо ды ильтизь леень вокзалов теплоходонтень, косо уш васенце чистэнть саезь ушодовсь экспедициянть сюпав ды келей программась-презентациясь. Весе фестивалесь явозель вете тематикас. Васенце чистэнть ютась вейсэнь Содамонь чи, панжозельть «Раськень культурань лисьмапря» чувтосто керсицянть, «Эрьмезь» вейсэндявксонь прявтонть Пётр Рябовонь ды «Каргонь ки» раськень оршамопелень стыцянть-викшницянть, Раськень культурань институтонь преподавателенть Вера Ковалевань выставкаст. Вастовомасонть ФАДН-нь прявтонь полавтыцясь Станислав Бедкин тешкстызе, «Равось – ояксчинь лей» проектэсь эрязо, касозо, виевгадозо, ды ёвтась мель неемс тесэ сыця иетнестэ седе ламо од ломанть.

Таштамковонь 8-це чись алтазель Аволь коммерческой организациятнень мелявкстнэнень ды проекттнэнень. Те ульнесь васенцеде экспедициянь 19 иень историянть перть. Кунсоловсть зярыя эрьва кодамо лувонь проектт, докладт, ваннозельть презентацият. Маргарита Лянге ютавтсь мастер-класс этнокультурной НКО-тнень туртов, кодат улить коммуникациянь формат СМИ-тнень марто ды мезекс сынь эрявить аволь коммерческой организациятнень туртов. Кортамось НКО-тнень культурань учреждениятнень марто сюлмотнеде поладозель седе товгак. Эсь проекттэст кортасть Евгений Ледяйкин, Николай Пиксин, Вера Цыбусова, Владимир Сафонов ды лият. Вейсэнь вастовоматнесэ чачсь покш мель панжомс Мордовиянь НКО-тнень Ассоциация.


Овторникстэ делегациясь истя жо якась экскурсияв «Мамаев курган» историко-мемориальной комплексэнтень, вастовкшнось Волгоградонь областень общественностень ды государственной властень представительтнень марто. Чокшнесь алтазель Ине Изнямонь 75 иетнень топодемантень: ютасть зярыя проектэнь, виртуальной выставкань презентацият ды патриотической моронь гала-концерт, конань невтизе «Вспомним, друзья!» ансамблясь.

Астрахань ошсо середасто ютавтозель Историянь чись. Делегациянть вастызь рузонь, казахонь, татаронь каванявкссо ды Рав леенть чиресэ невтезель апокш концерт Мордовиянь ды Астраханень ансамблятнень вийсэ. Ламо раськень те ошсонть участниктненень невтезель чувтонь кезэрень Кремлясь ды ютавтозель обзорной экскурсия сехте содавикс таркатнева.

Нилеце чистэнть теплоходсонть яволявтозель Культурань чи. Мольсть ламо кортамот культурадонть, кунсолозельть мельть-арсемат, ванкшнозель Никольское велень православной культурань пельксэсь – Рождество Богородицы Пазавань храмось. Седе тов теплоходсонть ютасть Мордовиянь филармониянь солистэнть, эрзянь кельсэ морыцянть Андрей Бочкановонь «Вай, кодамо!» альбомонь концерт-содавтома ды оймсемань чокшне «Торама» государственной фольклорной ансамблянть марто.

Экспедициянть меельце чись, пецясь, яволявтозель Раськень чикс ды сонзэ программась сюпавдояк сюпаволь. Ютавтозель «Тонавтомань перть-пелькссэнть эрзянь ды мокшонь кельтне» семинарось, косо эсь докладост ловнызь зярыя участникть: М.Е. Евсевьев лемсэ Педагогической университетэнь филологиянь наукань докторось О.И. Налдеева кортась тиринь келень ды литературань научно-образовательной центранть касомадо-кемекстамодо; Н.П. Огарёв лемсэ университетэнь эрзянь келень кафедрань прявтось Иван Рябов ёвтнесь мелявкстнэде, конатне улить эрзянь ды мокшонь кельтнень IT-технологиятнес совавтомасо; Пензань Вирень колледжень прявтось Олег Вдовин ёвтнесь сынст Сосновоборской районсо эрзянь келенть тонавтома ёнкстнэде; Ульяновской областень Образованиянь институтонь отделэнь прявтось Ирина Матюнина содавтынзе пурнавозтнень эсест опытэст марто.

Пецясто Волгоградсто туемстэ, Мамаев курганонть вакска уемстэ, теплоходсонть ютась Ледстнемань церемония. Весе пассажиртнэ каясть Равонтень цецят Ине Отечественной войнасо чавовозь солдаттнэнь лемест ледстнемга, конатне максызь эрямост Сталинград ошонть кис.
Чокшне жо ютась «Равось – ояксчинь лей. Рав чиресэ эриця раськетнень культуратнеде вейсэнь кортамот» XIX Раськеютконь этнокультурной экспедициянь-фестивалень итогтнень ванкшномась, косо эсь мелензэ ёвтызе васняяк МР-нь Культурань, раськень политикань ды архивень тевень министрась Светлана Баулина. Светлана Никитовна тешкстызе 2020 иень этнокультурной проектэнь од форматонть ды ёвтась мель сыця иень вастовоматненьгак теемс лия ёнов а молицякс, вечкевицякс ды одонтень тонавтыцякс.

Эрзянь ды мокшонь раськень регионъютконь общественной вейсэндявксонь прявтось Юрий Мишанин тешкстызе те фестиваленть паро организациянть, анокстыцятнень профессионализманть. Васенцеде сонзэ педе-пес ветясь сонсь Культурань министрась, кона истя жо васенцеде экспедициянть историясо оршнезель мокшэрзянь раськень оршамопельсэ.

Субутасто теплоходось таго велявтсь Саратовав, ды, кода свал, леенть чирева гайгезевсть «Вастомазонок, Рав леесь! Вастомазонок, фестиваль! Уледе шумбрат, ялгат!» валтнэ.

Марина ДЕВЯТОВА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».