Суббота, сентября 26, 2020
Важное



Ламо иеде икеле Саранск ошонь Полежаев лемсэ музейсэ ульнесь раськень ёрокчинь выставка. Ламодояк ламо экспонаттнэнь ютксто сехте пек сельмс каявсть Орданьбуестэ ускозь мазый, лиятнень ёнов а молиця викшневкстнэ ды артовкстнэ.

Сельмень кенярдовтыця роботатнень анокстыцяст - Орданьбуестэ сыця ламо эйкакшонь триця эрзявась Н.И.Володина. Надежда Ильиничнань викшневкссэнзэ неявсь, кода вечкезь топавтсь эрьва сялговксонть, эрьва артовксонть. Сонзэ роботатне лиятнеде эштё явовсть эрьва кодамо темань невтемасо, седеензэ пачк нолдамосо, потмоёжонзо панжомасо. Эйсэст редяви Пазнэнь кемемась, пертьпельксэнть вечкемась, православиянь историянть домкасто содамось. Мезесь сехте пек кенярдовты: весе неть ёрокчитненень Надежда Ильинична васня тонавтынзе эсензэ ниле эйкакшонзо, ней жо - вете трямс саезтнень.

СТАКАЧИДЕ ЭЗТЬ ТАНДАДО

Сисем иеде икеле Орданьбуесэ командировкасо улемстэ те ёнксонь райадминистрациянь аппаратонь прявтонть М.Г.Апанинань пельде карминь содамо сынст райононь эрицятнень, Володинтнэнь, ине тевдест. Лия валт те семиядонть, сехте пек Надежда Ильиничнадо, а ёвтавить. Неень шкане, зярдо секе-тев пеняцятано шкань асатноманть, ярмаконь арасьчинть лангс ды лия стяконь тувталт эстенек вешнетяно, зяр­до кортамось ушодови колмоце, нилеце эйкакшонь чачтомадо- кастомадо. А вана Володинтнэ 90-це стака иетнестэ, зярдо ламо ковонь перть эзь пандово зарплатась, лавкасто ярсамопеленть макссть талононь коряс, эзть пеле чачтомс ниле эйкакшт ды тризь-кастызь сынст алкуксонь ломанекс. Эрьвась тонавтнесь вузсо ды эрямосонть муизе эсь виде кинзэ.

ПОКШТЯНЗО-БАБАНЗО ПЕЛЬДЕ

Ицяло ёнксонь Селища велень Спиридоновтнень буесь (Надежда Ильиничнань тейтерьксэнь фамилиязо) ламо ёнксонь коряс явовсь тосонь лия эрицятнеде. Сынст покштятне-бабатне васняяк ульнесть ламонь содыцят, тевтеме тунь а аштицят, Пазнэнь кемицят. Кудазортнэнь кардазост пешксель ракшадо: скалт, вазт, лишметь, реветь. Цёратне маштсть мельгаст якамо, пельдест лезэнь саеме. Мезесткак стяко эзь ёма, весементь тевс нолдылизь. Кедтнестэ шубань стамояк тонадсть. Тейтерь-аватне маштсть парсте кодамо, мазыйстэ викшнеме. Тенень тонавтсть эйкакшост, нуцькаст. Тень кисэ ловизь сюпавокс ды саекшнизь весе ули- парост. Ансяк шкань ютазь вельмевтизь валдо лемест.

Стакачитнень лангс апак вано, те бу­есь эзь калавтово, эзь лепштяво. Вана Спиридоновтнеяк, Надежда Ильиничнань тетязо-авазо - Илья Михайлович ды Роза Ильинична - трясть-кастсть вете эйкакшт, эрьванть юткстост ули семиязо, вечкевикс тевезэ. Эрьвась машты викшнеме-кодамо, куш кавтотне цёрат. Виде, теньсэ покш таликазо покш тейтерест Надянь, кие ульнесь тетянзо-аванзо туртов эрьва тевсэ васенце лездыцякс, сазоркатнень-ялакстнэнь мельга ваныцякс. Тейтернесь вишка пингстэ арсесь улемс лецицякс, секс кавксо класстнэнь прядомадо мейле тусь тонавтнеме Са­ранск ошонь медучилищав фельдшерэнь- акушерэнь отделенияв, конань парсте прядомадо мейле ушодсь важодеме Саранск ошонь чачтомань кудосо, сестэ сон ульнесь 4-це № больницянь территориясо.

Эсь шкастонзо вастовсь вечкеманзо марто, лиссь мирденень содавикс спортсменэнть Александр Володинэнь экшс. Сон ульнесь СССР-нь вольной бороцямонь коряс спортонь мастерэкс. Одтнэ тусть эрямо мирдензэ чачома ёнксов - Орданьбуев. Кодашка покшоль кенярксост, зярдо чачсь васенце цёраст - Евгений.

Тешкстасынек, ней тензэ уш 43 иеть, сонсь ниле тейтерень тетя, вечкиця мирде. Евгений Александрович Тольяттисэ высшей военной тонавтнемань заведениянть прядомадо мейле велявтсь тиринь ёнксов. Ней Женя машты эрьва мезень тееме кшнистэ: мазыйдеяк мазый пирявкст, кудоютконь кедьёнкст. Аванзо ладсо прок викшни, ансяк Надежда Ильинична салмукссо, сон жо кшнисэ. Теде башка, тонавтнесь Чебоксары ошсо юристэкс. Истя жо пек ламо лезды аванстэнь саезь эйкакштнень трямосо-кастомасо. Володинтнэнь омбоце эйкакшост - Татьянань, юристэнь образованиязо, сонзэ кавто эйкакшонзо. Колмоцесь, Вера - кудазорава (сон колмо эйкакшонь триця), нилецесь - Лена - школасо тонавтыця.

Виде, ней Надежда Ильиничнанень ков седе шождыне икелень коряс. Эрьва тевсэ тензэ лездыть эйкакштне ды нуцькатне.

А ёвтавияк, кодамо стака ульнесь, зярдо од авинесь кадовсь ськамонзо ниле эйкакш марто. Эштё весть ледстяса се шканть, зярдо масторсонть мольсь тевтнень одс ладямось (перестройкась). Эдь се шкастонть ламот ломантнень допрок полавтовсь эрямост. Кие-бути теевсь сюпавокс, а кой-кинень ярсамскак а мезде уль­несь. Виде, вейке ломанесь прянзо кодаяк бу трявлизе, а кода улемс ламо эйкакшонь ськамонзо трицянтень?! Ялатеке сеть иетнень ледстнемстэяк Надежда Ильинична эрямонть лангс а пеняци, киньгак теньсэ а чумонды. Ансяк сюкпря Пазонтень ёвты, эйкакшонзо трямсто-кастомсто тензэ вийтнень максоманть кисэ, эрямосонзо паро ломаненть вастоманть кисэ.
Уцяскась лиссь истя, муевсь тензэ эри ялга, сонзэ мелявкстнэнь-майсематнень чарькодиця ломань - Николай Алексеевич. Сонзэ марто вейсэ сынь арсесть каземс уцяскав эрямо эштё вете эйкакштненень, кить кадовсть тетянь-авань вановттомо, кинь «сэпей» эрямост пачтинзе эйдень кудос.

Истя, кемнилее иеде икеле Володинтнэнь кудось теевсь тиринсекс васня кавто сазоркатненень, школасо тонавтницятненень Иринанень ды Алинанень. Шкань ютазь Надежда Ильинична кармась содамо эштё колмо сынст сазоркатнеде, конат се шкане ульнесть лия эйдень кудотнесэ. Теде марямодо мейле Надежда Ильинична таго удоманзо ёмавтызе. Васня эсь пачканзо арсесь, мейле семиянтень пачтясь. Паро, малавиксэнзэ чарькодизь сеске ды шкань апак таргсе тусть лия эйкакштнень саеме.

Истя, Володинтнэнь кудосо вейс пуромсть Селезневтнень ветенест тейтерькатне: Ирина, Алина, Галина, Оля, Наденька. Сехте вишкинентень ульнесть ниле иеть, сталмозоль ансяк сисем килограммат. Тейтерькинесь кинь мартояк эзь корта, натой весень эйстэ пельсь.

КАССТЬ ВЕЧКЕЗЬ

Трямс саезь эйкакштнень ланга кортамсто Надежда Ильинична а вечки сынст явомс тиринсетнеде, нуцькатнеде. Саезтне тензэ истямокс жо савить. Надежда Ильиничнань нуцькатнеде кемень: сисем тейтерькат ды колмо цёрынеть. Сехте покшонтень, Мариянень, 23 иеть, вишкинентень - кавто иеть. Покштне сеедьстэ сакшныть бабаст туртов превс путома мельга, вишкинетнень кандтнесызь ваномс. Тешкстасынек, те покш семиясь эри ояксчисэ, вейке-вейкень чарькодезь ды лездазь. Виде, Надежда Ильиничнанень а свал шожда эрси саезтнень марто. Кода эрьва аванть, сонзэ покш мелезэ, штобу эйкакштне школасо парсте тонавтневельть, кудосо тевтеме а аштевельть.

Чарькодеви, бути чокшне ланга эйкак­штне арасть кудосо, куш кодамо аванть седеезэ ризны-палы. Тень ловозь, Надежда Ильинична бажи эйкакштненень муемс веч­кевикс тев кудосо, тонавты сынст викшнеме, кодамо, артомо. Эрьва кодат пелькстамот ютксост сонсь арси, казнеть явши.

СИЗЕМАНЬ АПАК СОДА

Кодат стакачить эрямосо иляст уле, На­дежда Ильинична пря а максы. Юты эрямованть шождасто, седеень сэредьксэнть апак невте. Ушосто вастсызь, кевкстьсызь: «Кода эрят?». Сонзэ вейке каршо валозо: «Чамастом, нать, а неяви? Весемеде парсте!» Семиясо эйкакштнененьгак потмура ёжомарямонзо зярдояк а невти, свал чевтестэ, мизолдозь пшкади, шумбрачинзэ лангскак пингстэст а пеняци. Паряк, теньсэ ули путовксозо эри ялганзо Николай Алексеевичень, кона ламосо бажи лездамс тензэ.

Виде, истяткак улить, кить арсить лангаст, келя, эйкакштнень саизь эсест эрямост паролгавтомга. Ансяк Володинтнэ пряст а кекшнить ломантнеде. Кудазоравась вальматнескак эзь понгавто вень шаршавт, кадык эрьва чокшне весе эсь сельмсэст неить сень, мезе теить те семиясонть.

ИЗНЯСТЬ МОСКОВСО!

Сисем иеде икеле Володинтнэ масторонь прявт ошсольть. Сынст тердекшнизь Московов. Тосо трямс саезь масторонь эйкакштнень ютксо ютавтовкшность пелькстамот. Сынь невтизь ёрокчист эрьва кодат конкурстнэсэ, конатнень ютксо «Папа, мама, я - спортивная семья». Истя жо ульнесть мастер-класст. Эйкакштне аволь ансяк невтизь эсь кедьсэ кодавкстнэнь- викшневкстнэнь, паневкстнэнь-пидевкстнэнь, истя жо тонавтсть лия эйкакштненьгак. Те пелькстамонтень анокстамсто, презентациятнень сёрмадомсто покш тейтерест Ирина кевкстизе аванзо: - А тон мезе кармат невтеме?
- Тынк, - нурькине ульнесь каршо валось.

Алкукскак, бути Надежда Ильинична аволинзе сае тейтерькатнень трямс-кастомс, бути ламо чить ды веть аволь аште сынст вакссо, аволинзе тонавто эрьва мезень тее­ме, ломань марто коень-валонь муеме, сестэ сынст аволь ансяк аволизь терде пелькстамос, а содави, кода неть эйкакштнень туевель икелепелев эрямост, кие тенст венстяволь лезксэнь кедь...

Седе ламо бу масторсонть истят семият ды истят тейтерь-ават, кода Надежда Ильи­нична, сестэ Россиянь регионтнэсэ авольть уле эйкакшонь кудот, пайстомо уцяскат.

Валентина ЮДИНА
Фототне саезь Володинтнэнь семиянь
архивстэ

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».