Вторник, марта 19, 2024
Важное


…САБАНЦЕЛЕ ВЕЛЕНЬ КУЛЬТУРАНЬ КУДОНТЬ ВАЛЬМАЛКСОСЬ ПЕШКСЕ АВТОМАШИНАДО. ТЕЙ АРДЫТЬ ДЫ АРДЫТЬ АЛАШЕЕВКАСТО, АЛОВЕЛЕСТЭ, ДЮРЬКИНАСТО, ТАРАЗБУЕСТЭ ТРАКТОРИСТТ, КОМБАЙНЕРТ, СКАЛОНЬ ПОТЯВТЫЦЯТ, ЛАМБАМО ЯКСТЕРЬКАЕНЬ КАСТЫЦЯТ, СЕТЬ, КИТЬ САСТЬ ВЕЛЕНЬ ХОЗЯЙСТВАНЬ ДЫ ПЕРЕРАБАТЫВАЮЩЕЙ ПРОМЫШЛЕННОСТЕНЬ РОБОТНИКЕНЬ ЧИНТЬ ТЕШКСТАМО.
КУЛЬТУРАНЬ КУДОНЬ ФОЙЕСЭ ЛОМАНТНЕНЬ ВАСТСЬ МОДАНТЬ СЮПАВЧИСЬ – ШУМБРА КШИСЬ. ТЕСЭ ХУДОЖЕСТВЕННОЙ САМОДЕЯТЕЛЬНОСТЕНЬ АРТИСТТНЭ ТОРЖЕСТВЕННОЙ ПРОМКСТОНТЬ ИКЕЛЕ РЕПЕТИРОВАСТЬ ЭСЬ НОМЕРЭСТ.


Кенярксчинть панжизе «Сабанчеевское» велень хозяйствань предприятиянь прявтось Дмитрий Николаевич Игушкин. Сон пурнавозтненень ёвтась поздоровт ды арсесь весенень кувака эрямо, важодемасо од изнявкст. Мейле теинзе 2019 иень важодемань итогтнень. Истя, «Сабанчеевское» велень хозяйствань предприятиянь сюронь кастыцятне сайсть 17 тёжат тоннат сюро, эрьва гектарсто лиссь 35 центнерт.
Д.Н.Игушкин шнынзе ламбамо якстерькаень кастыцятненьгак. Кода а шнамс?! Эрьва гектарсто таргазь 476 центнерт. «Ромодановосахар» предприятияв «Сабанчеевское» ООО-сто арсеви ильтямс 100 тёжат тоннат.
Кецявтыть тевтне ракшань трямосояк.

– Малав 500 скалс строинек скалонь комплекс, кона ашти Аловелесэ, – ёвтни Дмитрий Николаевич. – Эйсэнзэ неень шкань оборудования. Хозяйствасонть покш мель явови трактортнэнь, автомашинатнень, комбайнатнень витнемантень. Видемантень рамсинек сатышка ГСМ, удобрения. Виевстэ важодемась, нама, лезды вадрялгавтомс предприятиянть экономиканзо. Тедеде, кода меляткак, велень хозяйствань продукция митяно малав 460 миллионт целковоень питнес.
Мейле велень тружениктненень поздоровт ёвтась Отяжелень райононь Администрациянь прявтось В.Г.Прокин. Сон шнынзе «Сабанчеевское» велень хозяйствань предприятиясо важодицятнень.
– Районось сайсь 100 тёжадо ламо тоннат сюро, – ёвтни Виктор Григорьевич. – Теньсэ, нама, покш таликанк тынккак.
Седе тов В.Г.Прокин ледстинзе национальной проекттнэнь, конатнень яволявтынзе РФ-нь Президентэсь В.В.Путин. Ней, келя, велесэ эрицятненень максовить льготат. Се, кие арси строямс кудо, инескеть, строяк. Банкось максы ярмакт 1 % алов. Бути ошонь эрицянть ули мелезэ строямс велес кудо, те мелесь истя жо шнави. Ярмакт максовить 3 % алов.



В.Г.Прокинэнь валонзо коряс, районсонть те проектэнть алов уш явозь 85 гектарт. Тесэ стявтовить 340 кудот. Эйзэст ведень, кинь, лия-мезень строямс явозь 40 миллионт целковойть ярмакт. Стявтови 70 таркас эйдень кужо.
Мейле В.Г.Прокин макссь казнеть. РФ-нь Велень хозяйствань министерствань Благодарностьсэ казезь шоферэсь В.Г.Саврушкин, скалонь потявтыцясь М.Д.Тикшайкина. МР-нь Правительствань Почетонь грамота максозь трактористэнтень А.В.Гущиннэнь. МР-нь Госсобраниянь Почетонь грамотасо казезь сюронь утомонь прявтось Т.В.Слугина. Отяжелень райононь Администрациянь Почётонь грамотасо казезь бухгалтерэсь Л.И.Кузоваткина, шоферэсь В.Н.Тюгашкин, трактористэсь А.А.Беляев.
Сюронь, ламбамо якстерькаень кастыцятненень, скалонь потявтыцятненень поздоровт ёвтась Отяжелень райононь велень хозяйствань управлениянь прявтось А.М.Степушкин. Сон арсесь пурнавозтненень кеме шумбрачи, важодемасо покш изнявкст. Трактористтнэнь В.М.Пшеничниковонь ды Н.Д.Кажаевень казинзе МР-нь Велень хозяйствань ды продовольствиянь министерствань Почетонь грамотасо.

Трудонь ветерантнэнь пельде поздоровт ёвтась В.В.Сайгушкин.
Зярыя шоферт ды трактористт, скалонь потявтыцят казезь «Сабанчеевское» ООО-нь Почётонь грамотасо.
Вана Д.И.Учеваткиннэнь 71 ие. Тень лангс апак вано, Михаил Иванович важоди. Сон ней завхоз-строитель. Икеле важодсь шоферэкс… Дмитрий Иванович Учеваткинэньгак важодемазо тешкстазь «Сабанчеевское» ООО-нь Почётонь грамотасо.
«Сабанчеевское» ООО-нь прявтонь полавтыцянтень Борис Николаевич Игушкиннэнь максозь «МР-нь велень хозяйствань заслуженной роботник» лемесь.

Седе тов Сабанцелесэ кенярксчись поладовсь концертсэ. Тесэ эсь ёрокчист невтизь Аловелень, Алашеевкань, Таразбуень, Дюрькинань художественной самодеятельностень артисттнэ. Весень мельс тусь МР-нь культурань заслуженной роботникенть, МВД-сэ важодицянть Владимир Титяпкинэнь ды Марина Атласовань морамост.
Аловелень тейтерь-авань ансамблясь истя жо кецявтынзе велень эрицятнень. Ансамблясонть икелень тонавтыцят, пидицят-паницят. Неть: А.В.Скворцова, Н.С.Фомина, Т.Н.Калашникова, Т.И.Лазарева.

Пётр ЗИНОВЬЕВ
ФОТОТНЕ: ЭДУАРД РЕТУНСКИЙ
Отяжелень райононь
Сабанцеле веле
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».