Неть читнестэ Печатень кудосо ютавтовсь пресс-конференция МР-нь Правительствань Председателень полавтыцянть Галина Лотвановань, МР-нь Образованиянь министранть Галина Явкинань ды лиятнень марто. Кортамось мольсь тедеде ЕГЭ-тнень максомадо.

Г.А.Лотванова пачтясь, тедеде республикасонть школаст прядызь 3305 эйкакшт. Государственной вейкине экзаменэнь максомо жо кармить 3294 эйкакшт. Ледстясынек, 11-це классонь прядыцятне, конат бажить поладомс тонавтнемаст СПО-сэ, саевить тов аттестатонь коряс. Кинь жо ули мелезэ молемс тонавтнеме вузов, эряви максомс ЕГЭ-ть.
Мордовиясо экзаментнэнь максоманть туртов теезь 22 таркат ды эштё вейксэ таркат – кудосо.

Мордовиянь Образованиянь министранть валонзо коряс, тедеде 11-це классонь весе прядыцятненень максозь аттестатт, конаськак эйстэст эзизе прядо школанть справка марто.

Галина Лотванова мерсь, экзаментнэ ушодовить медьковонь 3-це чистэ ды прядовить медьковонь 25-це чистэ. Дополнительной шкась карми умарьковонь 3-8-це читнестэ. Экзаменэнь максомань весе таркатнесэ кармить топавтовомо ормадо ванстомань вешематне. Совамсто онкстави температурась, шлявить кедтне. Ванськавтовить весе класстнэ-нупальтне. Экзаменэнь максыцятне озавтовить вейкест-вейкест эйстэ 1,5 метрадо аволь седе маласо. Экзаменэнь ютавтыцятне кармить маскасо ды перчаткасо, те а токши эйкакштнень. Теде башка, экзаменэнь анокстыцятнень-ютавтыцятнень пельде саевить анализт коронавирусонть лангс.

– Экзаментнэнь ушодовомс кадовсь аламо шка. Эйкакшт, ванстодо эсь прянк. Экзаментнэ – те тынк вандынь чинк, сынст эйстэ ашти эрямонь тевень кочкамось. Вешематнень а топавтомась, апак арсе теезь эскелькстнэ ве шкасто полавтсызь весе бажамонк-арсеманк. ЕГЭ-тнес учотано тынк шумбракс, эсь вийтнес кемицякс, анокстазекс, – мерсь Галина Лотванова.