Вторник, марта 19, 2024
Важное
КОДА ВАНСТОМС ЭРЗЯНЬ РАСЬКЕНЬ КОЙТНЕНЬ-КИРДАТНЕНЬ? КОДА СЫНСТ ВЕЛЬМЕВТЕМС, БУТИ СЫНЬ ОВСЕ СТУВТОВИТЬ ДЫ КАДОВИТЬ ЭЙКАКШПОРАНЬ ЛЕДСТНЕМАКС? МЕКС МИНЕК ВЕЛЕТНЕСЭ ДЫ ОШТНЕСЭ НЕЙ А ВАСТАТ ЭРЗЯНЬ КОЕНЬ КОРЯС ЮТАВТОВИЦЯ СВАДЬБАТ? МЕЙСТЭ УШОДОМС, ШТОБУ СЫНЬ ОДОВ СОВАВОЛЬТЬ ЭРЯМОЗОНОК, КОДА МАЗЫЙДЕЯК МАЗЫЙ, ЛИЯ ЁНОВ А МОЛИЦЯ КЕНЯРКСЧИНЬ ПЕЛЬКС?!


КОДА КОРТЫТЬ, БУТИ МЕЗЕ АРСИТЬ ТЕЕМЕ, ВАСНЯЯК УШОДТ ЭСЬ ПРЯСТОТ. САРАНСК ОШОНЬ ЭРЗЯНЬ ТЕЙТЕРЬ-АВАСЬ ТАТЬЯНА ПРОШИНА ИСТЯ ТЕЙСЬКАК. САЙСЬ ДЫ АНОКСТАСЬ ЭРЗЯНЬ СВАДЬБА КРЁСТНОЙ ЦЁРАНЗО ТУРТОВ МОСКОВСО. АВОЛЬ УМОК МИНЬ ВАСТОВИНЕК ТАТЬЯНА НИКОЛАЕВНА МАРТО ДЫ КЕВКСТНИНЕК, КОДА САСЬ ТЕНЗЭ ТЕ МЕЛЕСЬ ДЫ МЕЙСТЭ УШОДОВСЬ СОНЗЭ ТОПАВТОМАСЬ.

Татьяна Прошинань (тейтерькс Игушкинань) ундоксонзэ Отяжеле ёнксонь Сабанцеле эрзянь кезэрень велестэ. Тосо сонзэ эрить тетязо-авазо, патянзо-ялаксонзо ды малав весе роднянзо-раськензэ. Раськест (тетянзо ёндо Игушкинтнэнь, аванзо ёндо Козловтнень) пек покш. Одтнэ, нама, меельце иетнестэ весе сралесть Россиянь покш оштнева ды велетнева. Кие тусь тонавтнеме, кие важодеме. Ансяк чачома ёнксост а стувтнить, тиринь келесткак пек вечксызь, весе покш кенярксчитнестэ бажить самс тетяст-аваст кудов. Весть истямо самостонть, Татьянань крёстной цёразо Николай, Наташа патянзо цёрась, кандсь паро куля, келя, пурнась урьвакстомо, ды терди весень Московов свадьбав.
Одирьвась, Дарья, – Московонь эриця, секскак кенярксчинть ютавтсызь тосо. Вайкснесть-вайкснесть роднятне-раськетне, мекс свадьбанть истя васоло тейсы урьвакстыцясь, ды ушодсть анокстамо покш килангов.

Нама, весе эзть молеве, ансяк сехте малавикстнэ. Татьянанень жо максозель сыретнень пельде кармавтома, кода Кудавантень ветямс свадьбанть Сабанцелень койтнень коряс ды дивавтомс масторонь прявт ошонть. Таня кундась тевенть топавтомо. Кудавась эдь эрзянь свадьбатнесэ ловови сехте покш инжекс ды васенце прявтокс, содамонь-одирьвань ванстыцякс ды койтнень ветицякс. Теде Таня кармась содамо велень сырькайтнень марто кортамсто. Яксесь тенст аудиомагнитофон ды блокнот марто, сёрмадсь цела интервью (а стяко школадо мейле ульнесь мелезэ тонавтнемс журналистэкс). Кой-кить таргсизь парьстэст кезэрень Кудавань оршамопелест, ташто фотографияст. Танянь авазояк, Елизавета Дмитриевна Игушкина, ледстизе од поранзо, кода ютась эсь свадьбазо. Эх, кода сестэ весёласто ютыльть неть читне! Тейтеренть кудосо пецясто уштыльть баня, ялганзо-оянзо сыльть кашадо ярсамо. Цёранть кудосо те шкане сыре аватне пурныльть парь, озныльть кши. Кудавась паниль курник, наряжилизе сонзэ «пештинесэ», чапаксонь айгорсо ды эрьва кодамо тюсонь конёвонь цецькасо. Курникенть озавтылизь покш ваканс ды пезнавтыльть куншказонзо пиче тарад эли, лиякс мерить, шачумарина. Цецятнень сонзэ мазылгавтомс Сабанцелесэ ламо иень перть тейнесь вейке бабине, Чапай Наста. Сон наряжилинзе пазавань кундотненьгак. Одирьвась свадьбасонть эштё ютазь пингень 80 иетнень прядовомсто урнесь ды тейсь весементь, мезе тензэ мерильть свадьбань коень содыйтне. «Максаньканть» ильтилизь шабра кудос ды тов ваномонзо сакшныльть весе инжетне. Сынь максыльть одирьванть ялгатнень туртов ярмакт, тонатне жо каильть тень кисэ самогононь цяркине. Сонсь од тейтересь явшиль весенень вишка пацинеть, эйкакштненень – суркскеть. Тельня одирьванть ялгатне-оятне салсилизь од цёратнень прясто шапкаст, наряжилизь сынст мазый парсейнесэ ды мейле миилизь азорост туртов. Свадьбань омбоце чистэнть одирьванть кудосто содамонтень сыргильть эрьва мезекс оршнезь «урьвалят», тосто жо мейле сынст мекев ильтясызь «мекев потыцятне».

Нама, Московсо весе неть тевтне а топавтовольть, ды Татьяна арсесь ансяк ютавтомс зярыя, сехте прявт, ёнкстнэнь. Лездамо сивединзе содамонть ялганзо-оянзо, конатне ульнесть покш мельспаросо.
Васняяк, Татьяна весе ютавтома коенть коряс сёрмадсь сценарий, кучнизе сонзэ содамонть ёндо эрзянь алятненень ды Покш Кудантень. Мейле стась эстензэ якстере юбка ды галой панар. Паро, сонсь машты машинкасо строчамо, энялдсь Люба патянстэнь – Любовь Дмитриевна Палькинанень, мазылгавтомс эрьва кодамо тюсонь цецькасо прязонзо путома каштазонть ды пиче тарадонть. Танянь лангс ванозь, эрзякс арсесь оршнемс содамонть авазояк – Наташа, Покш Кудаськак мусь косто-бути эрзянь панар. Аватне кирьгазост понгавтсть эрьгеть ды човалят. Туемадо икеле пансть покш кшить ды суронь каша марто ламбамо курник.

«Московсо свадьбась ушодовсь одирьванть миемасто-рамамосто. Те тевенть эсь кедезэст саизь Колянь ялгатне, лиякс меремс, кудатне ды Покш Кудась, кона Сабанцелень коень коряс сась аволь чавонь кедть – «цетьверть» марто, – ёвтни Татьяна Николаевна. – Мейле сась монь, Кудавань тевем. Патянь-сырькаень марто гайгстынек эрзянь кезэрень моронть одирьвадонть-пиже дугинеденть, конась ушодови «Йовай-ваёх, ваяеень…» валтнэстэ. Ламонь сельведесткак эзть кирдеве. Седе тов каинь одирьванть-содамонть кирьгас крёст, баславинь пазавасо, сюлминь кедест ды кармавтынь ютковаст киньгак а нолдамс свадьбань перть. Мейле икелев стявтыя карксазь кирьгапацясо (нардамосо) Покш Куданть, сонензэ максыя пазаванть, кундавтынь одирьванть-содамонть, саия наряжазь пиче тарадонть (шачумаринанть) ды, вейсэ кундазь, колмоксть ютынек столенть перька. Крыльця пева валгомсто загодь кавто ёнга путынек пачалгос палыця конёвт ды лисинек ютковаст. Ловови, качамонть потмова а ютавить берянень арсицятне. Ульцясо Покш Кудась эштё весть колмоксть ютынзе-баславинзе пазавасо свадьбань весе машинатнень, ды минь сыргинек регистрацияв».
Мейле свадьбась поладовсь ресторансо, конань поровт лангсо од мирденть-нинть вастсть тетятне-аватне. «Колянь авазо оршнесь эрзянь оршамопельсэ, сайсь кедезэнзэ кши-сал. Тетязо кирдсь нардамо потсо пазава. Сынь вейсэ баславизь Колянь ды Дашань, сюконявтызь, ды свадьбась поладовсь неень шкань койтнень коряс», – ёвтни Татьяна.

– Свадьбань ветицянь ролесь ютась тамаданть туртов. Монь жо эрьва ёндо «керчимизь» «Турандот» ресторансонть лия свадьбатнень инжетне. Весень ульнесь мелест теемс мартон фотографият, кевкстнесть, костонь минь, кие мон истямось, токшесть шачумаринанть. Регистрациянть шкастояк, сэдь ланга ютамстояк эйзэнь уш «педсесть» омбо масторонь инжеть: Китаень, Япониянь туристт. Ней, арсян, эрзянь Кудавань фотографиятне якить-пакить Интернетэнть келес, – пейди Прошина.
«Нама, минь налксинек-ютавтынек эрзянь свадьбасто ансяк зярыя пелькст, ялатеке сынь кеместэ совасть весе инжетнень превс, зяро кевкстемат ульнесть, дивсемат, кортавтомат… Монь жо васенце мелем ульнесь невтемс сынст эйкакшон туртов, кадык сынь кадовить пряудемезэст, кадык кандсызь те свадьбадонть ледстнематнень нуцькаст туртов. Паряк, сынст седейс чачи толнэ содамс седе тов тиринь раськень койтнень-кирдатнень?! Монь оймесэ те толось палы умок!» – полады Татьяна.

Алкукскак, те эрзянь тейтересь сеть ломантнестэ, конатнеде, арсян, а пек ламо неень шкане. Сон вечксы тиринь келензэ, ловны эрзянь кельсэ книгат, зярыя иеть уш «Эрзянь правда» газетань ловныця ды соцсеттнесэ минек группатнень эряза участник. Татьяна пек вечки яксемс Мокшэрзянь раськень театрав, а менсти вейкеяк премьера, сон «В.И.Ромашкин лемсэ «Торама» ансамблянь, рузкс меремс, фанат, «Шумбрат, Мордовия!» фестивалень ламо иень перть ваныця ды Отяжелень райононть кисэ «сэредиця». Лиякс меремс, эсензэ тиринь ёнксонь патриот! Истямокс сон бажи трямс-кастомс Юля тейтерьканзо ды Владислав цёрынензэ. Влад – спортсмен, киокушинкай-каратэнь Россиянь ды Раськеютконь пелькстамонь чемпион, мелят сон совась «Мордовиянь сехте вадря спортсментнэнь» юткс, ды сонзэ тешкстызе сонсь Прявтось В.Д.Волков. Эйкакштне а виздить кортамс эрзякс покштяст-бабаст марто, натой юбилеезэст анокстасть поздоровт эрзянь кельсэ. Сонсь Татьяна Николаевна – предприниматель, кирди авань оршамопелень лавка ды бажи наряжамс мазый платиясо весе Саранск ошонь тейтерь-аватнень.

Пароль бу, улевельтькак истят эрзянь коень-кирдань вельмевтицятнеде седе ламо алкуксонь тевсэ-иласо, аволь ансяк сцена лангсо невтемань кис, сестэ, паряк, эрзянь раськень культурась ды койтне седе парсте совавольть минек эйкакштнень ды нуцькатнень оймес.

Марина ДЕВЯТОВА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».