Среда, августа 05, 2020
Важное

Иень кодамо шкасто бу ломанесь аволь са инжекс Покш Березникень Дягилевка велев, ялатеке прок ёвксонь масторс чопавти пандо прясо аштиця Никитинэнь кудонть неезь, маласонзо улезь.

Тосо минь ульнинек те иень даволковонь меельце читнестэ, теке велень эрицянтень, Ине Отечественной войнань шкасто тылэнь труженикентень Антонина Михайловна Нуянзинанень юбилеень коряс поздоровонь ёвтамонь кувалма. Виде, а кода ульнесь а совамс ды а содавтомс маласонзо эриця Ине Отечественной войнань участникенть, трудонь ветеранонть, эрьва тевсэ кедьчелькев ломаненть Николай Григорьевич Никитинэнь.

Ледстяса, меельцеде республикасонть ды сонзэ томбале карень кодамонь коряс содавикс ломаненть марто савкшнось вастовомс 2012 иестэ, зярдо Мордовиясо тешкставсь эрзя-мокшонь раськенть Россиянь государстванть марто вейсэндявомань 1000 иетнень юбилеесь. Самай те кенярксчинтень сон кодась вейке метрань 60 сантиметрань кувалмосо ды пельметрань келесэ покш карь.

Те шкас эзь стувтово, кода Россиянь ламо регионтнэстэ ды мик омбо масторсто сыця инжетнестэ седе ламотне пурнавкшность Николай Григорьевичень выставканть перька. Ульнесть истяткак, кить снартсть содамс, кода те ёлганя рунго, аволь пек сэрей, лембе варштавкс марто атясь кодась истянь зняро мазый карть, кезэрень карсемапельть.
Виде, сынь эзть сода, кодамо стака уцяска прась Кузым велесэ Никитинтнэнь покш семиясо касыця весе эйкакштнень лангс.
Мартонзо вастовомсто рединек, сон те шкас эзинзе стувто аванзо-бабанзо эйкакшпингеде пачтямотнень, кода телень Микола православной кенярксчистэнть Пазось казсь тензэ эрямо, секс тензэ путызь Николай лементь. Нать, сонсь менелень иневанькс лездыцязо вети пингень перть те эрзянь ёроков цёранть истя, штобу весе маласонзо ломантне улевельть уцяскавокс.

Кода уш вере ледстинек, Николай Григорьевич чачсь-кассь ламо эйкакшонь триця семиясо, кемголмовотнень ютксто ульнесь веженсекс. Ледстнеманзо коряс, куш савсь тенст кирдемс вачо пеке, ялатеке ярсамопелень арасьчинь коряс вейкеяк эйкакш семиястост вачодо эзь куло, секс мекс эрьвась юткстост маштсь важодеме.

Войнадо икелень стака шкастонть сынст семиясост лисекшнесь кажо, муевсть сельмень сявадыцят сень коряс, кода сынь вейке вейкень кисэ аштить ды чинек-венек важодить. Муевсь истямо ломань, кие сестэ невтсь сынст лангс сурсо, ды кемголмово эйкакш марто семиянть саизь эрямо таркаст. Те кажов тевенть кармавтызь топавтомо се шкань велень советэнь прявтонть, ней уш нинзэ Надежда Михайловнань тетянзо… Нама, сестэ эштё эзть сода неть кавто семиятнень малавиксэкс теевемадост. Нать, лиякс а кодаль… Аволизе топавто кармавтоманть – прявтонть эсензэ маштовлизь. Истят шкаткак цидярдсть. Нать, а стяко эрзянь ломантне кортыть: тевень вечкицятне, важодемадо апелицятне зярдояк а ёмить, сынст свал карми кшисускомост. Истя лиссь Никитинтнэнь ояксчисэ эриця семиясонтькак.

Виде, Николай эштё эйкакшпингстэ тонадсь парсте карень кодамо, а сонсь салава арсесь авиаучилищасо тонавтнемадо. Истя, вете классонь образования марто снартсь теевемс студентэкс, мик савсь тензэ манчемс, кастынзе тонавтнема иетнень, яволявтсь 7 классонь прядомадо. Сестэ пек ацирьгадокшнось велень цёрынесь, зярдо тензэ мерсть, келя, сынь саить ансяк кемень классонь образования марто. Те тувталонть коряс Николай Никитин авиаучилищав эзь понго, тень таркас саизь ветеце номер заводонь авиаполков.

…Дягилевка эрзянь велестэ ятонть каршо тюреме тусть 264 ломанть, тюремань паксятнес кадовсть 140 цёрат. Сынст ютксо ламот содавиксэнзэ, ялганзо. Сонсь Николай Григорьевич Ине Отечественной войнань шкасто Саратовань ёнкссо ванстсь авиазавод.
Н.Г.Никитин казезь Отечественной войнань II степенень орденсэ, «За отвагу» ды «За победу над Германией» медальтнесэ.
Войнанть прядовомадо мейле, тиринь ёнксов самсто сон кармась важодеме школасо, теке шкастонть тонавтнесь вузсо. Теде ледстнемстэ сон пейдезь ёвтнесь, кода тензэ ульнесь стака тонавтнемс од ломантнень ютксо.

Ветеранось мельспаросо ледстнесь школасо важодемань шкадонть. Сон ушодсь биологиянь предметэнь тонавтыцякс, вейсэ эйкакштнень марто кодат касовкст-цецят ансяк эзть озавтокшно. Сынст биологиянь кабинетэнть ваномо сеедьстэ совсесть аволь ансяк эсест школань тонавтыцятне, мик лия веленсетнеяк лезэв превс путомань кевкстеме тензэ сакшность. Шкань ютазь Николай Григорьевичень аравтызь школань прявтокс, кона тевенть сон истя жо топавтсь седейшкава.
Пенсияв туемадо мейлеяк сон эзь ойма, кармась улеме фермерэкс. Покш Березникень районсо васенцекс эстензэ рамась «Беларусь» трактор. Чарькодеви, транспортось лездась тензэ кудоютконь тевтнень топавтомасо. Эдь велесэ ракшавтомо вейкеяк семия а цидярды, лангсот тикшесь, пенгетне а кандовить…

Велесэ аламо кие машты вачкамо каштомот ды голландкат. Секс ламот энялдсть тензэ те а шожда тевенть коряс.
Виде, вейксэньгеменце стака иетнестэ, зярдо лавкатне чавольть, ломантненень аволь ансяк ярсамопель эзь сатокшно, истя жо стакачить кирдевсть оршамо- ды карсемапелень коряскак. Николай Григорьевич ледстинзе икелень содамочитнень ды кармась кедень тееме, эйстэст шапкань стамо. Кинень микшнесь, кинень стякодо стась, седе ламотненень казнекс явшесь. Те шкас кадовсть эрьва кодамо лувсо стазь лембе шапкатне, конатнень течи лоткасть кандтнеме минек од ломантне. Икеле жо, зярдо телетне цят якшамольть, весе районстонть сакшность Н.Г.Никитиннэнь энялдома марто.

А кода парсте сон налксесь гармониясо ды эсензэ кедьсэ теевть балалайкасо. Эзь визде тень теемс аволь ансяк эсест велень клубсо, истя жо райононь куншкакуронь Культурань кудонь сцена лангсояк. Нать, а стяко сон ладязель васня духовой оркестрань, мейле народной инструментэнь оркестрань прявтокс-ветицякс.

Нама, питней ды седеень эждиця тевекс сонзэ эрямосо, сехте пек пенсияв лисемадо мейле, – те карень кодамось. Ды эрьванть эсензэ эрявиксчизэ. Веенсттнэнь коды эрьва чистэ якамс, омбонсттнэнь – тонгомат ансяк кенярксчистэ, колмонсттнэ теевсть налкшкень таркас ды истя седе тов. Весемезэ эйстэст малав сядо, куш ламотнень сон макснинзе. Казезтнень ютксо: Саранский ды Мордовский митрополитэсь Зиновий, масторонь келес содавикс фигурной кирякстнемань коряс тренерэсь Татьяна Тарасова ды ламо лият.
Истя жо анокстась карть РФ-нь Президентэнть В.В.Путинэнь ды Мордовиянь Прявтонть В.Д.Волковонь туртов. Кеми, сы шка ды сон макссынзе неть эсензэ кедьсэ теезь казнетнень сеть ломантненень, кить важодить республиканть ды масторонть лезэс.

Покш Березникень райононь ды тов сыця инжетненень ледстневицякс кадовсь республикань «Карень кенярксчи» фестивалесь, конась ютавтовсь Покш Березникень Дягилевка велесэ. Сонзэ ютавтомадо мейле сась арсема Покш Березникень ёнкссо теемс «Кодамонь музей», косо васень таркасо кармить аштеме Ине Отечественной войнань участникенть Николай Никитинэнь картне.
Текенень поладсынек, Весероссиянь «Культурная мозаика» пелькстамосонть Н.Г.Никитинэнь выставкась лиссь изницякс. Сон аволь весть казевсь раськень ёрокчинь фестивальтнесэ лауреатонь дипломсо. Нать, а стяко казезь «Гордость нации» медальсэ.
Виде, семиясо ламось ашти кудазораванть эйстэ. Николай Григорьевичнень Пазось макссь чевте седей, ламонь содыцы ды тееме маштыця ни. Те – Надежда Михайловна. Сынь вейсэ эрить кодгемень кото иеть, истя жо ютась вейсэ весе эйкакшпорась (ней Николай Григорьевичнень – 92 иеть). Сынь эрясть шабрацек. Кода мерсь тенек Н.Г.Никитин, ним пек паро раськестэ. Покштязо Илья Ксенофонтович кандсь служба Николай II инязоронть алашань кирдема таркасо, парсте маштсь подковонь тееме, тетязо колоньгеменце иетнестэ велень советэнь прявтоль.

Надежда Михайловна эсь шкастонзо тонавтнесь Мордовиянь М.Е.Евсевьев лемсэ пединститутонь историко-филологической факультетсэ. Сонзэ прядомадо мейле ильтизь важодеме Кузым велень школав прявтокс, мейле ламо иень перть ульнесь Дягилевка велень школасо завучокс, теке шкасто ветясь эрзянь ды рузонь кельтнень, литературань ды историянь уроктнень. Весемезэ ниленьгемень иеде седе ламо эрямостонзо макссь тонавтомантень. Нать, а стяко нейгак а стувтнить эйсэнзэ тонавтницянзо.
– Сюкпря, тонавтницян секе-тев тень совсить варштамон, мелем кепедеме, валдо кулянь пачтямо, – мельспаросо тенек ёвтнесь Надежда Михайловна.
Кевкстеманок лангс, мекс тусть тиринь Кузым велестэ ды састь Дягилевкав, эрзянь авась мерсь: «Кудазором кучизь тей школань прявтокс».
Неть валтнэнь марязь, сеске чарькодеви, кодамо вечкема, вейке вейкень кирдема мирденть ды нинть ютксо. Текенень сон пачтясь, келя, сестэ эрямо тарканок паро арасель, совинек ташто кудос. Паряк, те кармавтымизь од кудонь путомо. Алкукскак, кудось покш, кавто этажсо, те эдь ней теньсэ киньгак а дивавтсак. А сестэ, ниленьгемень иеде икеле, аламо кить теекшнесть истямо мазый, ламо комнатасо кудот. Эрьва таркась арсезь, мик мастерскойгак тесэ икелепелев теекшнесь, прок содась, сыредезь, тензэ пек маштови.

Николай Григорьевичень ды Надежда Михайловнань марто кортамсто, кедьстэст туемстэ арсезевинь васняяк седе, кодат тевень ды седейшкава ломанень вечкицят, эрьва кодамо тевсэ докат улить минек велетнесэ. Кадык неть паро ёнкстнэ поладовить кавто цёраст, вете нуцькаст ды ниле правнуцькаст эйсэ.
«Эрзянь правда» газетань теицятнень пельде те ояксчисэ эриця семиянтень ёвтатано поздоровт Ине Отечественной войнасо Изнямонь 75 иетнень юбилеенть кувалма. Арсетяно кеме шумбрачи, эрямосо уцяска ды кадык икелепелевгак те мазый, менелень тюссо артовт кудосо эрямось поладови свал.

Валентина ЮДИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».