Вторник, марта 19, 2024
Важное

Неть читнестэ, зярдо весе мирэсь тюри короновирусонь инфекциянть каршо, врачтнень ды медицинской сестратнень лангс, конатне эрьва чистэ лиснить важодеме больницятнес, поликлиникатнес, медпункттнэс, путозь стакадояк стака канст.
Ламотнень эйстэст полавтовсь важодемань лувост, седеяк пек покшолгадсть вешематне: кода седе куроксто редямс сэредицятнень, саемс эрявикс анализт, сермадомс виде лецямонь лувонть, а менстямс стака орманть.

Медсестратне велетнесэяк ней важодить башка режимсэ. Ламот тей састь ормадонть тандадозь покш оштнестэ ды сынст мельга истя жо эряви пштистэ ваномс. Аволь умок якинек Отяжелень ёнксонь Сабанцеле велев ды совсинек тосонь медпунктов, косо ламо иень перть роботыть кавто мазый ды седеймариця ават: медпунктонь прявтось Анастасия Васильевна Игушкина ды медсестрась Елена Васильевна Палькина.

Сабанцелень медпунктось ашти велентень совамсто кавто азорс кудонть юрсо. Зярдо-бути сон аштесь веленть куншкасо, ютазь пингень 80-це иетнестэ медпунктось ютавтозель од таркас. Колхозось сестэ строясь важодицянзо туртов од кудот ды вейкенть пелензэ арсизь максомс медицинантень. Се шкастонть ютасть 30 иеде ламо. Теке марто велень предприятиясь, конань прявтсо ней Д.Н.Игушкин, эзизе кадно лецямонь тарканть лезкстэме. А весть тесэ теезель ремонт, сэредицянь примамонь кабинеттнэ ванськавтозельть, артозельть, вальматне полавтозельть пластиковойс, путозельть од кенкшт. Ансяк, велень эрицятнень валост ды мелест коряс, вадряль бу теемс эште од крыльця ды явомс кудонть эйстэ медпунктонть чачонзо, невтемакс, чавомс сонзэ сайдингсэ ды неявиксстэ сермадомс «Медпункт» валонть марто табличка. Нама, сонзэ а содыцянзо арасть, ялатеке мельспаро.

Тесэ, кода эрявияк весе медицинской учреждениятнесэ, свал ванькс, валдо ды моли надобиянь чине. Эрьва чистэ медпунктонтень молить велень эрицятне. Неть читнестэ, паряк, аволь истя, код свал. Теке марто, лия сэредькстнэ эпидемиянть шкасто а маштнить. Велесэнть седе ламо эрицятне – пенсионерт ды сынь лиясто а савить медпунктов, секскак тенст медсестратне яксить кудова. Чинь сменазост велень медсестратне примить 15-20 ломанть: путнить тенст уколт венас ды пукшос, тапарить керявкст, максыть эрявикс таблеткат.

Анастасия Васильевнань ды Елена Васильевнань содамочист покш, сынь важодить медицинасо малав 40 иеть.
Анастасия Васильевна Игушкина 1981 иестэ прядызе Саранскоень медучилищанть ды велявтсь тиринь велень медпунктов. Елена Васильевна Палькинаяк сась эсь велев Орданьбуень медучилищанть прядомадо мейле. Кода ледстни А.В.Игушкина, сестэ велесэнть эрясть 2,5 тёжат ломанть, школасонть тонавтнесть 250 эйкакшт. Медпунктсонть ульнесть профилакторий, пеень лецямонь ды таргамонь кабинет, теевильть массаж ды физиопроцедурат. Ней жо сынь, нама, арасть. Ялатеке тесэ, кода свал, онкстави санонь давлениясь, температурась, миевить ды усковить вешемань коряс эрявикс надобият, бути ломанесь а молеви рамамост Отяжелев. Ней медсестратнень вановт ало 650 ломанть, 51 эйкакш чачомасто саезь 18 иес. Мелят велесэнть чачсть 2 эйкакшт, тедеде уш ули эште вейке. Медсестратне сынст ванкшномо вейке иес яксить эрьва ковсто. Велесэнть ламо эйкакшонь триця кавто семият, конатне трить-кастыть 13 эйдеть. Сынь, кода корты Игушкина, веленть вандынь чизэ. Малав весе эйкакштне яксить эйдень кужов ды тосояк сынст эрьва чистэ валске рана ванкшны дежурной медсестрась.

Медпунктов ковозонзо весть сакшны участковой терапевтэсь Г.А.Живаева ды графикень коряс тесэ ютавтовить диспансеризациясь, флюорографиясь ды профосмотратне. Коронавирусонь инфекциянть кувалма неть тевтне зярс лоткавтозь. Ялатеке сехте сеедьстэ вастневиця сэредькстнэнь: инфаркттнэнь, инсульттнэнь, гипертониянть, онкологиянь профилактикась ды лецямось поладови. Медсестратне ваныть ней 245 пенсионертнэнь шумбрачист мельга. Кода ёвтни Анастасия Васильевна, велесэнть седе ламо сыре аватнеде, сынь седе ваныть пряст мельга. Цёратне сеедьстэ кемить «авосенть» лангс, сэредьксэст кекшнить, профилактикань кисэ надобият а симнить ды секскак, сынст коряс статистикась а кенярдовтыця: 60 иес эрить пек аламот. Мартост ютавтневить кортамот, кармавтомат, лиясто тандавтнемат, ансяк бу чарькодевельть.

Анастасия Васильевна тешкстызе, Сабанцелесэ эрицятнестэ малав весе шумбрачист мельга ваныть кеместэ, медосмотратнеде а кекшнить, бути врачтне мерить молемс эрявикс анализэнь максомо, УЗИ-нь тееме – сыргить сеске, ансяк лиясто костояк марить превспутома ды ушодыть сынсь лецямо. «Тень вана теемс а эряви, ансяк врачось соды, мезе ды зярдо сёрмадстомс, лади а лади те эли тона средствась тынк туртов», – корты Игушкина. Ды те алкускак истя! Ванстодо эсь прянк ды шумбрачинк! Стяко илядо куваяк яксе, аштеде кудосо! Кода ней кортыть медицинасо важодицятне: «Минь роботатано тынк кисэ, аштеде кудосо минек кисэ!»

Марина Девятова
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».