Шкась а марявияк, кода ливти. Мерят, ансяк-ансяк панжовсь ютазь иень театрань сезонось, минь капшинек Национальной театрав од путовксонь ваномо. Ней вана сезонось прядовсь. Актёртнэ ды театрань важодицятне аламос оймсить ды таго чопавтить эсь тевтнес: режиссёртнэ – спектаклянь путомо, художниктне – арсеме-тееме декорацият, актёртнэ – налксеме, костюмертнэ – од оршамопелень стамо… Кода Национальной драмань театрась эри течи, миненек пачтясь театрань прявтось Светлана Дорогайкина.
– Театранть туртов ютазь иесь сюпаволь. Минь ульнинек зярыя фестивальсэ, ардтнинек гастрольга, путынек од спектаклят, ютавтынек эрьва кодат мельстуиця вастовомат. Башка валт ёвтавлинь спектаклятнеде. Невтинек В. Мишанинань «Эрьзя. Валдос ливтиця» (реж. Б. Манджиев), А. Островскиень «Не все коту масленица» (реж. А. Анисимов), В. Красногоровонь «Его донжуанский список» (реж. А. Егранов), Д. Сидеросонь «Чёрный апельсин» (реж. А. Анисимов) ды эйкакштнень туртов од иень путовкст. Ваныцятне сынст вастызь парсте, ёвтасть тенек ламо лембе валт, – ёвтни Светлана Ивановна. – Ардтнинек «Волжская сказка» театрань VI-це фестивалев, кона ютась Чебоксары ошсо. В. Мишанинань «Эрьзя. Валдос ливтиця» спектаклянть марто тешкстымизь ниле номинациянь коряс: «Сехте паро сценография» (артыцясь Анна Репина), «Сехте паро музыка» (Аркадий Манджиев), башка дипломсо казевсть актрисатне Марина Аверкина ды Нина Абросимова. Седе тов теке жо путовксонть невтинек Йошкар-Оласо «Майатул» финнэнь-угрань театратнень XIV-це фестивальсэ. Изнинек колмо номинациява: «Цёрань сехте вадря роль» (Павел Михайлов), «Омбоце планонь цёрань сехте вадря роль» (Антон Саранкин) ды «Омбоце планонь авань сехте вадря роль» (Евгения Акимова).
Гастрольсэ ульнинек Самара ошсо ды Самарань ёнкссо, Курганонь областень Шадринск ошсо. Сынь ютасть «Покш гастрольть» программанть вельде. Ней вана театрась туи отпусков. Аламос оймсетяно ды таго од вийсэ кундатано тевс.
– Светлана Ивановна, кодат меленк-арсеманк театрань од иентень? Мейсэ кецявтсынк ваныцятнень?
– Неень шкане важодтяно кавто спектакля лангсо. Васенцесь – «Масторава», сон эрзянь эпосонть коряс, кода чачсь-теевсь модамасторось, путови-невтеви од лувсо. Путыцязо – Московсто Анна-Ксения Вишневская. Васня арсинек теемс сонзэ ансяк туристтнэнь туртов. Мейле рединек, кодамо лиссь мазый ды мельстуиця, невтьсынек весенень. Артисттнэ тосо сынсь морыть, налксить музыкальной седямопельсэ. Сон карми ютамо колмо кельсэ. Невтеви уш сентябрянь васенце читнестэ.
Омбоцесь – А. Гринэнь «Алые паруса». Режиссёрось Алексей Истомин (сон уш путокшнызе минек кедьсэ «Ромео и Джульетта» невтеманть), мартонзо хореографось Евгения Лисина, художникесь Ольга Фарафонова. Сынь – Санкт-Петербургонь. Те спектаклясь алтави школань тонавтницятненень, од ломантненень. «Алые паруса» спектаклясь невтеви октябрянь 5-6-це читнестэ.
Теде башка, арсетяно путомс В. Мишанинань «Менелень нурямот» (реж. Борис Манджиев) ды Н. Гоголень «Роштувадо икеле чокшне» эрзянь кельсэ (реж. Ольга Парфенова) спектаклятнень.
– Састь-эзть юткозонк од налксицят?
– Видеяк, минек театрань семиянтень састь кавто од актёрт – Кристина Масенина и Михаил Канаев. Сынь содасызь тиринь келест.
– Ков мольтядо гастролев ды театрань фестивалев?
– Сентябрясто минек тердимизь Владикавказов «Балтийский дом» раськень театратнень фестивалев. Тосо невтьсынек «Его донжуанский список» путовксонть, вешематнень коряс, эряви аволь покш спектакля. Сентябрянь 17-це чистэ карматано важодеме Грозный ошсо «Федерация» фестивальсэ. Невтьсынек «Эрьзя. Валдос ливтиця» спектаклянть. Ноябрясто – Элистав Манджиевень фестивалев.
Арсетяно молемс гастролев Саратовань ды Пензань ёнкстнэс. Истя жо мольтяно Санкт-Петербургов, тосо кармить Мордовиянь Культурань чить. Невтьсынек «Куйгорож» ды «Эрьзя. Валдос ливтиця» спектаклятнень.
– Светлана Ивановна, кода невтизе прянзо Пушкинской картась?
– Те пек вадря тевесь. Седеяк ламо инжеть вастынек. Пушкинской картанть марто сакшныть школань тонавтницятне, студенттнэ. Картанть коряс миненек сакшность 14 тёжат ваныцят. Весе спектаклятнес мереви самс сонзэ коряс. Ней минек важоди од сайтэнек. Тосо рамави куш кинень билет ды Пушкинской карта мартояк. Прявт тевенек – теемс мельстуиця ды вадря репертуар, тердемс тенек од ломантнень. Ваныцятнень свал эряви мейсэяк кецявтомс ды дивавтомс.
– Улить истят спектаклят, конатнес а сатныть билеттнэ?
– Улить, сынст ютксо, саемга, У. Шекспирэнь «Ромео и Джульетта» путовксось, А. Линдгренэнь «Пеппидлинный чулок» эйкакшонь спектаклясь. Свал залось пешксе. Билетт а кадновкшныть.
– Светлана Ивановна, кода содатано, тынь ардтниде Россиянь Раськень театратнень конгрессэв. Ёвтнеде теде.
– Россиянь Раськень театратнень ассоциациясь пурнавсь-панжовсь тедеде. Ды уш июньстэ Якутиясо ютась конгресс. Тов сакшность театрань прявттнэ, режиссёртнэ, драматургтне. Ульнесть национальной 32 театрат (весемезэ 38 театрат). Россиянь кодамо таркасто ансяк эзть сакшно! Тосо минь вейкенек-вейкенек марто теевинек содавиксэкс. Неинек ялгатнень важодемаст. Конгрессэнть ютасть мастер-класст, режиссёронь питчингть, драматической ловномкат. Валскестэ саезь, чокшнес важодинек. Те пек вейсэнди! Кой-кинь марто кортынек вейсэнь гастрольде. Прынек ве мельс: келень содыця режиссёртнэнень седе шожда путнемс тиринь кельсэ спектаклят. Саемга, кодамояк лия раськень ломанесь путы спектакля национальной регионсо.
Якутск ошсо 11 театра! Ютксост кототне – национальнойть: эйкакшонь, някань ды седе тов. Тосо покш мель явови раськень тевтненень. Минек сайнимизь раськень мазый кенярксчис. Ды мезе меревлинь? Тосо тонь кияк а кармавты оршамс раськень оршамопельть. Ломантне сынсь, эсь мелест коряс оршнить покшчис, путнить эрьва кодат мазылгавтомапельть. Зяро энергетика ульнесь те кенярксчисэнть! Монень валткак а муевить, кода пачтямс тенк. Ули мель минекак тесэ ютавтомс мезеяк истямо. Тосто сынь лия ломанекс. Чачсть ламо мельть-арсемат, од тевть, теемс мезеяк лия ёнов а молиця. Чарькодинь, а эряви аштемс ве таркасо, эряви молемс икелев! Паро бу улевель Саранскойсэяк ютавтомс Россиянь раськень театратнень покш промкс.
– Сюкпря кортамонть кисэ. Парсте тенк оймсемс! Од вийсэ, паро ёжосо поладомс важодеманть!
Сентябрянь 21-25-це читнестэ Саранскойсэ карми «Худсовет» од ломанень театрань регионъютконь васенце фестиваль. Сонзэ арсицясь – минек ёнксонь Театрань деятелень союзонь прявтось, эрзянь ды мокшонь раськень театрань актёрось ды режиссёрось Андрей Анисимов. Проектэсь изнясь Культурань инициативань Президентэнь фондонь грант. Вете чинь перть невтевить 12 спектаклят. Весемезэ сакшность эрьва кодамо регионсто 67 яволявтомат. Спектаклятнеде башка, артисттнэнь туртов ютавтовить тонавтомань мастер-класст ды лезэнь кандыця тевть-валт. «Худсовет» фестивалесь ютавтови Национальной драмань театрасо.
Татьяна Маторкина