«Краевед» клубось, кона теезь А. С. Пушкин лемсэ раськень библиотекасо, эсь тевензэ а лоткавтни оймсема шкатнестэяк. Тов совицятне секе тев ютавтнить эрьва кодат чокшнеть, вастовомат.

Сынст эйс тердтнить эрьва мейсэ ёроков ломанть: сёрмадомо, морамо, киштеме, налкшкень-мезень тееме маштыцят ды истя седе тов. Сынст кедьсэ сеедьстэнь инжекс эрси Мордовия Республикань культурань заслуженной важодицясь, Лямбирень эйкакшонь искусствань школасо тонавтыцясь М. С. Громова. Мария Семёновнань Мордовиясо парсте содасызь, кода пектеяк пек ёроков, эсь тевень вечкиця ломаненть.

Сон тонавты эйкакшт ды од ломанть морамонь искусствантень. Мария Семёновнань кедьга ютасть аволь вейке кементь од ломанть. Ламот эйстэст теевсть пек паро морыцякс. Сонсь Мария Семёновна а лоткси дивавтнемеде весень морамонь эсь ёрокчисэнзэ. «Краевед» клубов сакшныцятнень марто сеедьстэ ютавтни мастер-класст, морамо вечкицятнень тонавты сенень, кода эряви видестэ таргамс вайгеленть, кода саемс верце эли алце нотатнень. Меельце вастовомасонть невтизе, кода эряви ладсемс вайгельтнень «Роман Акся» раськень кезэрень моронть серьгедемстэ.

Раиса Щанкина