Четверг, марта 28, 2024
Важное


Диабетэнть а стяко лемдить эпидемиякс. Те ормасонть сэредицятне ламолгадыть иестэ иес. Масторлангсо сондензэ майсить миллионт ломанть. Ризксэнтень, те шкас эште кияк эзь муе истямо надобия, конань вельде бу ломантне меневельть те кажодонть.



Нама, ацирьгалемс а эряви, эдь те ормась кирдеви ождясо. Васняяк неень шкантень ладиця медицинасонть улить сонзэ лангс ливтемань (диагностикань) лувтне. Эрьва сэредицянть кудосо уликс прибортнэнь вельде ванови те орманть мельга ды медицинань препараттнэнь вельде эрьвась сонсь леци эсь прянзо. Кода течи эряви ванстомс прянть те кажов ормадонть, мезе мереви теемс, бути тыненк врачтне путызь те орманть ды ламо лия кевкстематнень коряс толковамот максы «Республиканский врачебно-физкультурный диспансер» МР-нь государственной автономной учреждениянь здравоохранениянь отделениянь прявтось Е.А.Трофимова.

– Елена Александровна, кодамо тувталонь коряс ломантне ормалгадыть сахарной диабетсэ ды кодамо сонзэ стакачись?

– Сахарной диабетэсь – те орма, конась эрси кавто тувталонь коряс: васенцекс, зярдо ормалгадозенть организмасо аламолгады эсензэ инсулинэсь (те васенце типень), омбоце тувталось – инсулинэсь канды зыян киськентень (ткантнень лангс, те омбоце типень). Ломаненть организмасо инсулинэсь тееви поджелудочной железасо, сень ловозь, кинь улить колавкст те органсонть, эряви седе пштистэ ваномс шумбрачинть мельга.

Сеть ломантне, кить сэредить I типень сахарной диабетсэнть лемдевить «инсулинозависимойть» – сыненст эряви путомс инсулинэнь инъекцият, те ормась сеедьстэ мартост чачи. Сонзэ эйсэ, кода свал, сэредить эйкакшт ды од ломанть. II типень диабетэнть пингстэ, железась важоди парсте, клеткатне жо а примить гормонтнэнь. Те тувталонть коряс сахарось а пачкоди клеткатнес, кадови верень плазмантень, секс организмась бойкасто ёмавты виензэ (энергиянть). Те ормась юты стамбарнэ, васень шкасто кодаткак сельмс каявикс невтевкст а эрсить.
Текенень поладсынек, омбоце типень сахаронь диабетсэ сэредицятнеде 85% те ормасонть сэредицятнень эйстэ, сехте ламотне юткстост тейтерь-ават, кинень ведьгемень иеде седе ламо. Неть, васняяк, сеть ломантне, кинь покш сталмост эйстэст (70%) ды майсить куявчинь ормадонть. А стяко сонзэ сеедьстэ лемдить «сыре ломанень диабетэкс».

Диабетсэ сэредемань тувталтнэде ламо. Васень таркасо ашти ламо ярсамось, конась вети покш сталмос. Истя жо аутоиммунной орматне, тетянь-авань (наследственной) пельде тенст ютамось. Кода свал эрси, малавикс раськетнень ютксто кие-бути сэредсь те ормасонть. Истя жо те орманть сыргамосо чумокс эрсить вирусонь инфекциятне, конат колыть поджелудочной железань клеткатнень, конат сынсь теить инсулин. Теке шкастонть ванкшноматне невтить истят тевть, зярдо ломаненть малавиксэнзэ сэредсть те ормасонть, а сон, бути карми эсь прянзо мельга ваномо, шумбра лувонть эрямос совавтомо, видестэ ярсамо, врачонь превс путоматнень топавтомо, зярдояк те ормасонть сэредеме а карми.

– Инескеть, ёвтнеде, кода ломанентень чарькодема те ормасонть сэредемадонзо?

– Васняяк ломаненть коськи кургозо, свал тензэ эряви симемс. Сон седе куроксто карми сиземе, сы удомазо ды курго автни, прок виезэ машты. Теке шкасто сыявкстнэ кувать а пичкить, лекси седе сеедьстэ, лиясто кепетстить уксноманзо, киськезэ карми кинеме, лотки парсте неемадо.
Содадо, бути тынь эсь мельганкрвединк вере ледстязь ёжомарямотнень, сестэ шкань апак таргсе пшкадеде врачнень эли куш тынсь онкстынк верьсэнк сахаронть. Бути сон нормадо седе покш, сестэ эрямонк а стакалгавтомс теинк весементь.

Неень шкане сахаронь диабетэнь весе видтнэнь коряс, бути видестэ карматадо прянк ветямо, ярсамо ды лецямо – эрямосонк аламо мезе полавтови. Истя жо карматадо важодеме, эрямонтень кенярдомо!
Омбоце типень диабетэнть пингстэ физической нагрузкатне – те лецямонь лувтнестэ вейкесь. А вана васенце типень диабетэнть пингстэ физической упражнениятне эрявить ансяк а куялгадомань кисэ, лецямонь ёнксокс сынь тенк а арыть. Теке шкасто содадо:

физкультурань занятиятнень шкаст ды виевчист кортынк лециця врачонк марто, штобу а кандомс зыян организмантень. Эрьва истямо занятиядонть мейле марядо шожда сизема ды паро ёжомарямо парсте шканть ютавтомадо мейле. Текенень поладсынек, сеть сэредицятненень, кить симить таблеткат эли путнить инсулинэнь уколт, пек пштистэ ванома шумбрачинть мельга бассейнасо экшелямсто, штобу аволь лисе берянь тев укшномсто. Истя жо профилактикань правилатнень топавтомат физкультурань занятиятнень ютавтомсто.

– Елена Александровна, те ормасонть сэредицятненень кодат превс путомат ёвтатадо ярсамопелень коряс?

– Алкукскак, лецямонь гимнастикадонть башка, конань эряви теемс те ормасонть весе сэредицятненень, эряви эште покш мель ярсамопелентень.

Васняяк содадо, сахарной диабетэнть пингстэ эряви ярсамс свал теке жо шкастонть, чизэнзэ ветексть-котоксть. Тевс нолдадо седе аламо углевод марто ярсамопеленть, а белоктнень кадынк икеле ладсо.
Ярсамопельсэнть улест седе ламо витаминат ды минеральной веществат. Ярсамопеленть анокстадо пар лангсо. Илядо стувто: сахарной диабетсэ сэредемстэ васенце таркасо аштить видестэ ярсамось, нормань коряс кедь вийсэ важодемась ды спортонь занятиятнень ветямось. Уледе шумбрат!

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».