Врачтне свал кортыть: эрьва орманть седе шожда а нолдамс, ков седе стака сонзэ лецямс. Те седе пек кандови вирусонь орматненень. Сынст юткс сови коронавирусоськак. Те инфекциянть эйстэ прянть ванстомга, ВОЗ-сь, Роспотребнадзорось ды врачтне кармавтыть топавтомс зярыя вешемат.
1.Седе сеедьстэ шлядо кедтнень сапоньсэ. Те лезды «шлямс» весе вирустнэнь. Бути арась возможность – нардтнеде кедтнень спиртэнь кирдиця средстватнесэ эли дезинфекциянь салфеткатнесэ. Спиртэсь «куловты» вирустнэнь, конат понгить кедтнень лангс.
2. Аштеде кудосо. Бажадо седе чуросто лиснемс ушов, а ардтнемс общественной транспортсо ды а якамс лавкав. Бути эряви ковгак молемс – ютадо ялго эли ардодо эсенк машинасо. Ярсамопельть рамадо сеске ламо, сатост недлянь перть. Бути озыде общественной транспортс, аштеде ломантнеде ве ёно.
2. Рудазов кедьсэ илядо токше сельмтнень, судонть ды кургонть. Вирустнэ, истя жо коронавирусоськак, шождасто понгить рунгонтень самай сельмева, судова ды кургова. Бути козтадо эли кешнетядо, пекстынк судонк ды кургонк салфеткасо. Ды сеске ёртынк сонзэ. Бути арась салфетка – кешнеде ды козодо мендязь кенерепакарь, ансяк аволь кедькуншкас.
4. Ушосо содавиксэнк неемстэ, илинк пала, кутморда ды сюворда кедензэ!
5. Кандтнеде медицинской маска. Сон 80 процентс вансты рунгонть вирустнэнь эйстэ. Бути сэредтядо, ормась а пачтяви маласонк аштицятненень. Масканть эряви полавтнемс эрьва кавто часонь ютазь. Ансяк течи пек стака аптекатнесэ муемс медицинской маскат. Ламот стыть кудосо сынсь – коцтсто. Неть маскатнень истя жо мереви кандтнемс ансяк кавто част, мейле эрявить муськемс ды гладямс пси утюгсо.
6. Илядо ярса верек сывельде ды калдо.
7. Ветядо эрямонь шумбра лув. COVID-19 эйстэ арась кодамояк башка лецямо. Бути тынк вадря иммунитетэнк, рунгось цидярды. Вадрясто удодо. Седе ламо ярсадо белоксо, витаминсэ ды минералсо сюпав ярсамопельде. Покш мель яводо физкультурантень. Илядо тарга ды копорда иредстиця симемапельть. Врачтне кортыть: ней самай вадря шка кадомс таргамонть. Теньсэ пек лезды лексемань гимнастикась – воздушной шариктнень пувсемась. Путодо будильник, штобу а стувтомс теемс тень чизэнзэ колмоксть. Сетненень, кить ормалгадсть, пек вадря лексемс истя эрьва чассто. Те гимнастикась «сравтсынзе» тевелявтнень ды лезды куроксто изнямс воспалениянть.
8. Лавкатнесэ бажадо пандомс банконь картасо. ВОЗ-нь невтевкстнэнь коряс, коневонь ярмактнень лангсо вирусось эри 4 чинь перть. Пандоманть туртов тевс нолдадо мобильной телефонсо улиця приложениянть эли бесконтактной банконь картатнень, зярдо сынст а эряви ёвкстамс терминалонтень ды лепштямс пин-кодонть – пластикенть лангсо вирустнэ эрить 9 чить.
9. ОРВИ-нь васенце невтевкстнэнь пингстэ сеске тердеде врач. Лецицятне кортыть: ормалгадомань васенце чистэнть коронавирусонть арасть кодаткак башка тешксэнзэ. Бути беряньстэ марятадо прянк, аштеде кудосо. Илядо яка важодема таркав ды илядо совсе сеть кудотнес, косо эрить сыре ломанть. Сеске тердеде врач кудов, поликлиникасонть инфекциянь ламо кандтницят, тосо орманть кундамс седе шожда. Бути кепететсь покш температура, стака лексемс, сэреди мештесь – сеске гайневтеде медицинань лезксэнь куроксто максомань службантень.
Важодема таркасо
– Бути важодеманк топавтови кудосо, туеде дистанционкас. Те лезды киртямс коронавирусонь «кундамонть».
– Бути сави якамс важодема таркав, седе сеедьстэ нардтнеде кенкшень кундамотнень, столенть, компьютерэнь клавиатуранть, мобильной телефононть дезинфекциянь средстватнесэ.
– Аштеде ве ёно роботань коряс ялгатнень эйстэ. Ютксонк улезэ вейке метрадо аволь седе аламо.
– Бути важодтядо базарсо эли лавкасо, сеедьстэ шлядо кедтнень сапоньсэ. Эрьва чистэ нардтнеде дезинфекциянь средствасо важодема тарканть ды оборудованиянть. Оршнеде халат (фартук), перчаткат ды маска. Важодемань чинть прядовомадо мейле муськинк сынст.
Кудосо
– Вадрясто шлядо пенчтнень-вакантнэнь, седе пек верек сывельденть ды калдонть мейле. Теде мейле – кедтнень.
– Кирдеде керсемань башка лазнэть верек сывеленть, калонть ды анок ярсамопеленть туртов.
– Седе сеедьстэ шлядо киякстнэнь, нардтнеде пуленть.
– Бути семиясонк кияк ормалгадсь, кирдеде эйсэнзэ башка нупальсэ, андодо башка пенчсэ-вакансо. Бути арась возможность явомс башка нупаль – аштеде эйстэнзэ 1 метрадо аволь седе маласо.
– Мадеде башка удома таркас.
– Седе сеедьстэ муськеде оршамопельтнень, нардамотнень, тодов ды вельтявкс ланготнень.
– Панжтнеде вальматнень, нолдадо нупалентень ванькс кошт.
Ушов лисемстэ
– Тонгодо кувака ожа марто оршамопельть.
– Пурнынк чертнень. Каинк суркстнэнь, пилекстнэнь ды браслеттнэнь.
– Кисканть марто ушова молемстэ бажадо козоньгак а кундамс.
– Саеде мартонк салфеткат, сынст вельде панжодо кенкштнень
– Аштеде ломантнень эйстэ ве ёнов.
Общественной транспортсо
– Бажадо а токшемс кундамотнень. Седе вадря нежедемс ковгак. Бути кундыде – нардтнинк кедтнень спиртэнь кирдиця средстватнесэ.
Кудов совамсто
– Бажадо мезеяк а токшемс.
– Каинк карсемапеленк.
– Бути лисниде ушов киска марто, нардтнинк лапанзо дезинфекциянь средствасо.
– Сеске каинк оршамопеленк ды муськинк.
– Совамо кеншенть ваксс кадынк сумканть, ключтнень, кошелеконть ды истя седе тов.
– Шлядо. Бути арась истямо возможность, кедтнень, чаманть, кирганть эрявить ёрвалдомс.
– Дезинфекциянь средствасо нардтнемс телефононть, очкатнень шлямс сапонь марто ведьсэ.
– Сумканть нардтнемс хлоркасо (ведень вейке литрас каямс хлоркань 20 мл.). Тень теемс эряви перчаткасо.
– Састыне каинк перчаткатнень, ёртынк ды вадрясто шлинк кедтнень.
Уледе шумбрат!