«Эрзянь правда» газетань те иень васенце номерсэнть лиснесь 2024 иес ковкерьксэсь( календаресь). Лангсонзо аштесь эрзянь оршамопельсэ мазый тейтерь. Кувать арсинек ды вешнинек, кие фотографиясонть, кода лемезэ? Ды вана героинясь муевсь.
Од морыцясь Юлия Никишанина чачсь Саранскойсэ. Шкань ютазь семиянек кармасть эрямо Ицяло велесэ. Тейтернесь вишка шкасто саезь кармась морсеме, ладсеме стихть ды морот. Малавиксэнзэ тень лангс вансть мельспаросо. Ансяк эзть арсеяк, тейтерест эрямонь тевекс кочкасы творческой профессиянть.
Юлия сонськак кувать арсесь-кавтолдсь, ков молемс тонавтнеме. Изнясь музыкась. Ицялонь средней общеобразовательной школанть прядомадо мейле кармась тонавтнеме Н. П. Огарёв лемсэ МГУ-нь Национальной культурань институтонь народной морамонь искусствань коряс отделениясо. Сон школасо тонавтнемстэяк эрьва концертсэ свал ульнесь сцена лангсо. Теке тевесь поладовсь вузсояк. Эрьва иестэ эйсэнзэ тердтнесть «Шумбрат, Мордовия!» республикань раськень творчествань фестивалев.
Неень шкане Юлия важоди Ицялбуень Кемлянь Культурань центрасо од ломанень досугонь центрань ветицякс. Тесэ сон ветеце ие, мелезэнзэ тукшны. Анокстыть сценарийть, сёрмадыть грантт, эйкакштнень туртов теить налксемань программат, морсить. Кой-кинень, паряк, маряви артисттнэ важодить ансяк сцена лангсо ды весе лия тевенть, анокстамонть кияк а неи.
– Кизна гармонисттнэнь марто ардтнинек районсонок зярыя велеть. Минек ули «Гармонь» трионок. Невтинек велень эрицятненень «За душевность» программанть. Ломантне вастымизь покш мельспаросо. Путнесть самовар, каванясть чайде, ламо мезде кортнинек. Сеедьстэ сынь кортасть седе, кода мелест мольсь фонограммадонть, кодамо покш мелест кунсоломс баянсо, гармошкасо, балалайкасо седямот ды весёла морот, истя, кода ульнесь икелень шкатнестэ, мезесь кадовсь ледстнемазост вишка пингстэ саезь, – ёвтни Юлия.
Од тейтересь морси народной морот ды эсензэяк. Стихть сон сёрмады кото иестэ саезь. Эсензэ весемезэ 20 моронзо, сынст морси сцена лангсо. Ды улить эштёяк валморот, конатнень эрявить путомс музыка лангс.
– Юлия, мезде тонь моротне?
– Васенце мором – «Мой край родной», седе тов чачсь «Моя Россия», «Живи, Россия» моротне. Сынь алтавить тиринь масторонтень. Улить зярыя морот Ине Отечественной войнадо, Мордовиядо, Ицялбуеде, вечкемадо. Теде башка, сёрмалян частушкат, конатнесэ морсян гармонисттнэнь марто.
Мелят ды тедеде Юлия Никишанинань неизь Россиянь эрьва кодамо ёнксонь ваныцятне. Сон якась «Жар-птица» рузонь раськень телеканалов. Тосо ютась «Русская тройка» морамонь раськеютконь фестиваль-пелькстамо. Морынзе кавто моронзо – «За душевность» ды «Расцвела черёмуха». Жюрисэ ульнесть содавикс ломанть: Надежда Крыгина, Инна Каменева, Василий Овсянников. Весень сынст Юлия содылинзе телевизоронь ды интернетэнь коряс.
– Эзинь арсеяк, саян кодамояк тарка. Бажинь невтемс прям, ваномс лиятнень лангс. Миненек ютавтсть мастер-класст, кортасть мартонок башка-башка. Мерсть, а кадомс те тевенть ды молемс ансяк икелев, – ёвтни тейтересь.
Юлия Никишанина лиссь 3-це степенень лауреатокс. Теде мейле тердизь морамо «Жар-птицань» Од иень концертс. Сон теевсь содавиксэкс «Садко» группасо морсицянть Александр Бардин марто, кона чачсь истя жо Мордовиясо (цёрась малав эрьва оймсема чистэ седи Андрей Малаховонь передачатнесэ). Седе тов Юлиянь тердизь «В гостях у «Жар-птицы» передачав, кона лисни недлязонзо колмоксть. Тосо од тейтересь ёвтнесь творчествадонзо ды морызе «Дороженька» од моронзо. Лездыцякс тензэ ульнесь программань ветицясь ды гармонистэсь Николай Падуков. Нама, талноськак, весемесь жо ютась пек парсте.
Юлия Никишанина эсь моротнень лемди «Авторонь морот раськень лувсо». Кода сынь чачить? Эрьва кода. Юты важодема таркав – прясонзо чарыть-велить валтнэ, рисьметне. Сон сеске сёрмадсынзе сынст, мотивенть сёрмадсы диктофонс. Лиясто валтнэ сыть музыка марто. Юлия машты седямо фортепианасо, балалайкасо. Бажи тонавтнемс седямо бубенсэ, пенчсэ. Ды седеяк покш мелезэ тонадомс седямо гармошкасо. Истя жо ули мелезэ нолдамс стихень пусмо.
Юлия морси ськамонзо ды ансамблясояк. Бути эряви морамс эрзякс эли мокшокс – теньгак тейсы мельспаросо, кадык кельтнень а содасынзеяк. Мезе жо сонсь вечки кунсоломо? Валонзо коряс, пек вечкевить раськень моротне. Мелезэнзэ тукшны «Садкось», Инна Каменева, Оптинань казачей хорось, «Талицась»… Семиясост сон ськамонзо, кие яви покш мель музыкантень. Васня малавиксэнзэ дивсесть, ней – кецнить ды аштить кувалманзо каштанчисэ.
Татьяна Маторкина