2014 иень мартсто ютась референдум, конадонть мейле Крымесь ды Севастополесь одс кармасть Россиянь пельксэкс. Сестэ ломантнень эйстэ ламот ёвтызь мелест совамс Российской Федерацияс. Мартонь 18-це чистэ минек масторсо тешкстави од кенярксчи – Крыменть ды Севастополенть Россиянть марто вейсэндявомась.
Саранскоень Эень дворецэнть вакссо ютась «Россия, Крым, Севастополь. 10 лет в родной гавани» концертэсь. Тей сакшность студентт, эрьва кодамо таркасо важодиця ломанть. Инжетненень лембе вал марто пшкадсь МР-нь Прявтось Артём Здунов:
– 10 иеть ютасть, кода Крымесь ды Севастополесь велявтсть тиринь ёнксов. Зяро иеть тюринек неть таркатнень кисэ, зяро минек ломанть тень кис максызь эрямост. Ледстинк историянть, Ине Отечественной войнанть. Ней Новороссия, Донбасс – неть таркатнень кисэяк минь ламо верь валынек. Зяро паро тосо теинек, зяро кеж тосо ней изнятано! Минь пурнавинек тей, штобу кирдемс минек Президентэнть. Вечкевикс ялгат, ёвтан тенк покш сюкпря кочкамотнес самонть кисэ. Минь вечксынек тиринь масторонок, сон лия ёнов а молиця, тесэ ванстовить раськень койтне-кирдатне. Тесэ эрясть покштянок-бабанок ды нейгак эрить семиянок. Течи эряви лездамс минек боецтнэнень, конат аштить зярыя фронтка, эряви лездамс сынст семиятненень. Весе те минек вейсэнди.
Вал истя жо сайнесть «Народный фронт «За Россию» весероссиянь общественной движениянь минек ёнксонь отделениянь штабонь сопредседателесь Людмила Нарбекова, боевой действиянь ветеранось, СВО-нь участникесь Иван Михеев. Сон васенцетнень ютксоль, конат сёрмадстсть контрактт ды тусть СВО-в эсь олясо.
– Кияк а соды, мезе улевель, бути 2014 иестэ Крымесь а соваволь Россияв. Кодамо уцяскаст ды эрямост улевель рузонь ломантнень?! Ней Крымесь теевсь мазыйдеяк мазый регионокс. Кие пачколесь тов – эсь сельмсэ неизе. Крыменть кисэ тюрсть минек содавикс зярыя земляконок: полководецэсь П.А. Румянцев-Задунайский, адмиралось Ф. Ф. Ушаков, «мода потмонь гарнизононь» Аджимушкаень каменоломнянь командирэсь П.М. Ягунов. Течияк Крыменть ды Мордовиянть сюлмить кеме сюлмот. Эрьва иестэ тосо ютни «Шумбрат» фестивалесь, – кортась Эрзянь ды мокшонь раськень регионъютконь вейсэндявксонь прявтось Юрий Мишанин.
Весе пурнавозтнень туртов Мордовиянь государственной филармониянь артисттнэ невтсть пек паро концерт, ломантне аштесть флаг марто ды седейшкава цяпасть.
Эряви меремс, «Крымень тундонтень» республикасонок алтавсть зярыя вастовомат. С. Д. Эрьзя лемсэ музейсэ ютась «Крымский мост» акциясь. Тесэ видеоконференцсвязь вельде сюлмавкшность Саранскоесь, Московось, Симферополесь ды Феодосиясь. Кортнесть Феодосиянь Мария ды Анастасия Цветаеватнень лемсэ музеенть марто. Мартонь 19-це чистэ музейсэнть панжовсь «Все формы, все цвета…» выставкась. Тесэ невтевить рузонь художникенть ды поэтэнть Максимилиан Волошинэнь картинанзо. Эйсэст эрьва ёндо невтеви Крымень мазычись.
Татьяна Маторкина