Елена Ивановна Артемьева ветеце ие важоди Ромодановань Культурань кудосо стамонь мастерскоень прявтокс. Теде икеле госслужащеель. Стамонь тевенть жо вечкилизе вишка пингестэ саезь – няканзо туртов сонсь тейнесь оршамопельть. Ды зярдо савсь туемс васенце важодема таркастонть, уцяскась ветизе Культурань кудов.
Тесэ «Мастерица» стамонь кружоконь ветямсто эйкакштнень марто кармась тейнеме эрьва кодат някат ды шкань ютазь чопавтсь те тевентень прянек. Ней сонзэ пурнавсть байтяк чевте налкшкеть, раськень някат, паннот ды ламо лия мезть. Кармась явомо мель рузонь ды минек раськень някатнень историянтень. Домкасто ванкшнось-тонавтнесь кезэрень эрзянь ды мокшонь оршамотнень ды мейле стакшнось някатненень.
«Някатнеде ловнан-ванкшнан эрьва косто: фотонь, видеонь коряс, башка сайттнэваяк. Эйкакштнень марто тейнетяно апаро вийде ванстыця някат-ванстайкат, конат тенст теевить седе шождасто. Сынь лисить вишкинеть – 7-8 см. сэрьсэ. Мейле поволевить сёлгомка (прищепка) вельде эчке сурес. Вишка классонь эйкакштненень пек вечкеви те тевесь.
Теде башка, тейнетяно някат иень шкатнень коряскак. Нетнестэ эрьванть эсензэ историязо. Саемга, Мастянь някатне эрсить – вишкинеть ды покшт. Покштне анокставить Мастянь недлястонть ушосо пултамонь кис. А вана вишкинетне теевить кудосо ташто нуласто. Кезэрень шкатнестэ истямо някась тейневсь палкине лангсо ды путневсь пазава ваксс. Лововсь, сон вансты сельмедемадо, апаро вийде. Сонзэ эрявсь кирдемс иень перть ды пултамс телень меельце чистэ – весе иень перть таштавозь беряненть саилизе мартонзо. Ды истя тейнильть эрьва иестэ.
Няканть теемстэ сехте эрявиксэсь – паро ёжось. Някань-ванстайкань тееме озыльть сестэ, зярдо авась вадря ёжосо ды кияк тензэ а мешиль. Цёратне те тевентень а нолдавильть. Лангсонзо важодемань шкастонть авась ёвтни озномань валткак», – домкасто ёвтнесь Елена Ивановна.
Сонзэ валтнэнь коряс карминек содамо лия смустень кандыця някадонзо. Вана «Сюпавинькась» («Богатушка») ашти кавто сырнень ведрыне марто. Лововсь, кудосо ярмаконь улемга эрьва ведрантень эряви каямс трёшникке. Вакссост аштить – «А явовицятне» («Неразлучники») – кавто някат кодазь вейс, сынь зярдояк а явновить. Кезэрень тешкстнэнь коряс истямо някась казеви урьвакстыцятненень-венчицятненень, улезэ эрямост кувака ды уцяскав.
Кемень кедь марто славянонь някась («Десятиручка») тейневсь сёксень ковтнестэ. Лововсь азоравантень кудоютконь тевтнень теемстэ лездыцякс. Лиякс сонзэ а сатыть кедензэ эрьва тевс. Кезэрень ёвксонть коряс, Макошь славянонь Пазонь авась макссь авантень кавто кедть. Ансяк, шкань ютазь, авась лоткась кенереме тевензэ тееме ды вешсь кедьстэнзэ эштё веенст кедть. Истя, вейке-омбоце мельга авась таго вешсь колмонст, ниленст ды, окойники, ветенст кедть. Ансяк теяк сонзэ эзизе иде весе тевтнеде. Кежиявтокшнось Макошь ды нельгинзе казнензэ. Кадсь авантень ансяк кавто кедть. Истя вана, Макошонь пельде появаськак кемень кедь марто някась. Лововсь, эрьва азораванть, кона кирдсь «Кемень кедненть» кудосо, тевензэ мольсть парсте ды прялевстькак шкастонзо.
Елена Артемьевань ламо минек раськень няканзояк. Сельмс сехте пек каявицясь – «Эрзянь семиясь», косо невтезь чамавтомо колмо някат – тетясь, авась, эйкакштне. Чамавтомо тейнесть весе някатнень-ванстайкатнень.
– Някань теемс молить кедь алов понгозь весе ташто нулатне. А уш бути понгить джинсат, сестэ фантазиясь саты эрьва ков, – мизолдозь корты Елена Ивановна.
Нама, ёроков кедь авантень савкшны рамсемс ламо од материалткак, эдь ансяк ташто нулатнень тевс нолдазь ламо-мезе а теят. Джутось, човалятне, эрьва тюсонь коцтось кудоюртсо аволь свал муевить…
Някадо башка авась сты сувенирт, эрьва кодамо мероприятиятнес сценической костюмт. Неень шкас сон стась «Тундо», «Сёксь», «Снегурочка» рольтнень туртов оршамот. Истя жо анокстась раськень костюмт – татаронь ды эрзянь. Елена Ивановна сонськак налкси эрьва кодат рольть Культурань кудонь мероприятиятнесэ. Вана тедеде Мастянь чистэ налксесы скоморохонь роленть.
Елена Артемьевань важодевксэнзэ аволь весть невтнезельть «Шумбрат, Мордовия!» фестивалень выставкатнесэ, косо сынст туртов путозель покш питне.
Марина Агафонова