Мордовиясо ламо мезе тееви «Комплексное развитие сельских территорий» федеральной программанть, «Культура» ды «Здравоохранение» нацпроекттнэнь коряс. Меельце иетнестэ вановт алов понгсть велетнеяк.
Отяжелень Ламбаськесэ уш теезь фельдшерско-акушерской од пункт, ней витневи-петневи Культурань кудось, конась стявтозель 55 иеде теде икеле ды пек учось одкстомтома, паролгавтозель Ине Отечественной войнасо чавовозтненень памятникенть икеле куншкакурось, путозельть тозонь оймсеманть туртов эземнеть, фонарть. Теде миненек ёвтнесь Киржеманонь поселениянь прявтось (тозонь сови Ламбаське велеськак) Геннадий Николаевич Азоркин, зярдо минь сакшнынек инжекс те эрзянь кезэрень велентень.
Ламбаськентень мелят топодсть 420 иеть, ды кодашка тосо кенярксчи ульнесь Троицянь чистэ, те шкас а стувтови эрицятненень. Геннадий Николаевич тешксты, лия велетнеяк а кадовить вановттомо. Сыця иестэ ушодыть одкстомтомо Трокс Кужонь куншкакуронть, косо ашти воинтнэнень кеврунгось, путыть од плитка ды озамопельть.
Велень прявтокс Геннадий Азоркин важоди кото иеть, сон тескень, Трокс Кужонь, теде икеле комсь иеть ульнесь те ёнкссонть участковоекс ды содасынзе весе эрицятнень педе-пес. «Ломантне минек вадрят, – корты прявтось, – мартост можна роботамс. Нама, эрсить стакачитькак, эдь весе минь а вейкеть. Зярдо тевтне молить парсте – ёжомарямоськак вадря».
Азоркинэнь лавтов лангсо кемень велеть ды посёлкат: Ламбаськесь, Трокс Кужось, Тазалесь, Гаваевась, Цёлпановась, Пенькозаводось, Ахматовась, Дадысь, Вечерлеесь ды Пиченейкась. Таркатне пек мазыйть, певтеме паксят, вирть, пандот. Зяро тесэ кизна кстыйть, мастумарть ды пангот касыть – валозь валовкшныть! Ансяк пурнамс пек а кинень – чамить велетне иеде иес ды те лувось кодаяк а лоткавтови. Сыретне кулыть, одтнэ велесэ эрямо а капшить. Тедеде Ламбаськесэ чачсь ансяк вейке эйкакш – ламо эйдень триця Деровтнень семиясо, ды пек паро, сынь кармить теске од кудонь стявтомо. Лисни, ули кинень якамс эйдень кужов ды мейле школав.
Неень шкасто кужосонть ансяк кото эйкакшт. Ламбаськень школасонть ведьгеменде аламо ды сетненьгак усксить весе шабра велетнестэ автобуссо. Школась ней – Козловкань средней школань филиал. Аволь умок сонзэ вакссо стявтозель цёрынетненень-тейтернетненень налксема площадка, ды ней тозонь кизэнь каникуласто весе эйкакштне сакшныть калярдомо. Таркась паро, васоло покш киденть, ды тетятне-аватне тень кувалма мельспаросот. Лисни, велесэнть кирдеви эрявикс инфраструктурась. Теде башка, улить кавто лавкат, церькова, почта, ды меельце иетнестэ тесэ пек виензась «Восток» велень хозяйствань предприятиясь, конась максыяк эрицятнень туртов важодема таркат, ды те пек паро весень туртов. Ули косо роботамс – карми эрямо велеськак!
Велень прявтось кеми, ломантне мекев кармить само тиринь велезэст. «Неян, ламот а кадныть тиринь кудост, сеедьстэ сакшныть ошсто эйкакшост ды нуцькаст марто. Арсян, сы шка, ламот велявтыть эли рамить тестэ кудот. Велень хозяйствань предприятиясонть важодеме ней ардтнить ламот Отяжелестэ, Чаунзасто, Ицялсто ды пароль бу тенст теске теемс «пизыне». Маласо ды коштоськак ванькс эйкакшост туртов. Ансяк велесь а вечки нузякс ломанть, тесэ эряви чилисемане стямс ды позда чокшне мадемс. Важодят виень апак жаля – кармить ярмакот ды ярсамопелеть», – тешкстась прявтось.
Марина Девятова