Войнадо икеле Орданьбуень Ташто Орданьбие велесэ ульнесть 300 кудот. Малав эрьвастонть цёратне тукшность фронтов. Кой-конатнестэ сыргакшность зярыя, тетянек-цёранек. Ансяк аволь весе велявтсть кудов. Романовтнень семиясто ятонть каршо тюрсть колмо ялакст: Матвей, Иван ды Андрей. Пазось ванстынзе, велявтсть кудов. Кортыть, сынь весе тусть фронтов кирьгасост крёст марто.
Течи ули меленек ёвтнемс ловныцянок туртов Ине Отечественной войнань участниктенть Матвей Матвеевич Романовдо. Сон чачсь Ташто Орданьбиесэ 1912 иестэ, ульнесь ниле классонь образованиязо. Армиясо служась Читасо. Тетядонзо ледстни ды ёвтни тейтерезэ Елена Матвеевна ШИШКИНА, кона эри Волгоградсо:
– Тетянь саизь фронтов 1941 иень июльстэ. Сон ютызе весе войнанть. Ушодсь тюреме фашисттнэнь каршо Эстониясо. Мейле, шкань ютазь, пачколесь Москов алов. Свал ледстнесь Волоколамскоенть. Весть ульнесь атака. Тетям чии, ваны – икелензэ чииця солдатонть прязо уш арась… Сонгак сестэ ранязель, ансяк, валонзо коряс, кодамояк сэредькс эзь маря. Варштась – кедезэ нулакс новольсь. Понгсь Ивановав госпиталев. Теде мейле ульнесь Сталинградонть кис тюремасонть. Те оштонть сон ламо ёвтнесь.
Румыниядо ёвтниль, кода ломантне тосо эрясть вачочисэ ды арасьчисэ. Югославиясо пурныльть полевой кухня. Перькаст свал чийнесть эйкакшт, сынь эйсэст андсть. Венгриядо кортамсто сон кувакасто лекстиль. Тосояк ютасть стака тюремат. Кода ледстнесь ветеранось, сынь сестэ пек пансть немецтнень.
Уш войнадо мейле казезель «За освобождение Будапешта», «За освобождение Белграда» медальтнесэ. Австриянть олякстомтызь апрельстэ. Мон кевкстия, содыльть минек изнямодонть? Нама, мери, содынек. Аштинек окопсо автомат марто, киньгак арасель мелезэ куломс. Войнасто велявтсь 1945 иень август ковсто. Эшелонтнэ тусть Дальней Востоков седе тов тюреме ды ванстомо минек масторонть. Сонзэ демобилизовизь, семиясонзо ульнесть ниле эйкакшт. Мерсть, минек масторсо истякак пек ламо уроз эйдеть.
Ёвтнесь, весть ульнесь виев бомбёжка. Сынь аштесть блиндажсо. Тосо сонзэ кедьс понгсь пурнавиця (складной) вадря пеельне. Сон кевкстинзе ялгатнень, кинь те пеельнесь. Азорозо эзь муеве ды саизе эстензэ. Кить ульнесть мартонзо блиндажсо – мейле войнанть прядовомс весе чавовсть. Пеельнесь ёмась войнанть прядовомсто истя жо апак учне, кода появаськак. Сон, теке мерят, ванстсь эйсэнзэ. Тетям ледстнесь, кода фронтсо кармавтсть совамс партияс. Сон эзь сова. Яла кортыль мелявтозь: «Стяко калавтызь церьковатнень, стяко…» Пек ризнэсь тень кувалма.
Мон кевкстния, мекс аламо медалензэ, эдь ютызе весе войнанть. Каршон мерсь истя: «Мезекс сынь монень? Мон живстэ велявтынь». Сыненст эзть эряво медальтне. Сон, кода лия ветерантнэяк, кить ютасть войнань толонть пачк, а вечкиль теде ледстнеме. Паряк, войнанть прядовомадо мейле комсь иетнень ютазь ансяк кармась мезть-бути ёвтнеме. Сестэяк а кирдевильть сельведензэ ды лоткиль. Кортыль: «Вай, зяро од ломанть тосо чавовсть!..» Школавгак тердтнизь вастовомо тонавтницятнень марто, ёвтнеме войнадонть. Ансяк эзь яксе. Стакаль тензэ ледстнемс.
Валсо а ёвтавияк, мезе савсь печтямс войнань шкасто ломантненень, кить тюрсть фронтсо, кить ульнесть тылсэ. Авам ськамонзо трясь-кепедсь ниле эйкакшт. Теде башка, тетянь колмо ялакстнэньгак кастынзе, ловт, весемезэ сисем. Ды весень ванстынзе! Арсян, те алкуксонь подвиг. Госпитальсэ аштемадо мейле тетянь зярс-бути нолдакшнызь кудов. Истя, 1942 иестэ чачсь Анна сазоронок. Ды эдь муевсть ломанть, конат пачтясть тетянень манчемат авань лангс. Тетям кучсь каршо вал, косо кармавтсь а токшемс эйденть. Кучнесь кавтошка посылкат. Ансяк кучозенть килангсо таргилизь, кудов пачколесть а маштовикс ули-парот.
Матвей Матвеевичень низэ – Просковья Семёновна Романова (Гусева). Сон чачсь шабра Орозбие велесэ. Ульнесь пек мазый. Кортыть, кода лиссь мирденень, велень эрицятне натой сакшность лангозонзо варштамо. Сельме удалга чевтинестэ мерсть тензэ Вирява – сон сэреель, виевель, покшоль. Мирдензэ марто сынь чачтсть-кастсть сисем эйкакшт: Николай чачсь 1933 иестэ, Мария – 1936 иестэ, Наталья – 1939 иестэ, Анна – 1942 иестэ, Григорий – 1947 иестэ, Елена – 1951 иестэ, Матвей – 1955 иестэ.
Васенце цёраст Николай Матвеевич ульнесь морской пехотань батальононь командирэкс, омбоце рангонь капитанокс. Сон тонавтнесь Орданьбуень культпросветучилищасо, Мордовской пединститутсо, Рязанень артиллерийской училищасо, прядсь «Выстрел» СССР-нь высшей офицерэнь курсат. Эрямонзо перть служась Сахалинсэ, Приморьясо, Калининградонь ёнкссо, Севастопольсэ. Цёразояк тусь тетянзо киява, кармась военноекс.
Фотосонть Николай Матвеевич
Григорий Матвеевич цёраст казезель Трудовой Славань III-це степенень Орденсэ. Сонзэ эрямозо апак учне сезевсь 1982 иестэ.
Ней ютксонок кадовсть ансяк Анна Матвеевна, кона эри Мордовиясо, ды Елена Матвеевна.
– Весе пингем перть, 1969 иестэ саезь, эрян Волгоградсо. Самай се моданть лангсо, конань кисэ тюрсь тетям. Сон ульнесь кедьсэнь ды ламо ёвтнесь Сталинградонь тюремадонть. Казевсь «За оборону Сталинграда» медальсэ. Сон тюрсь омбоце ударной армиянь 73-це гвардейской стрелковой дивизиянь 211-це гвардейской стрелковой полксо (Украинань фронтонь омбоце составсо).
– Мон тетянь пек вечкилия. Кудосо минь тензэ мерилинек старшина. Авам эйсэнзэ ванстсь, жалясь. Сон ульнесь сэтьме, аволь покшкавтниця, чевте седей ломанекс. Эзь позорякшно. Эйкакш лангс а вайгель, а кедь эзь кепсе. Зярдояк минек эзимизь покордакшно. Кидеяк беряньстэ эзь корта. Войнадо мейле сон уш кудосо эзь печксе а сараз, а туво, а цидярдыль. Контузиядо мейле суронзо паро ладсо эзть менчеве. Ялатеке ламо важодсь, тевтеме зярдояк эзь аште, понань лембе кемть кевердсь эстенек ды лияненьгак. Важодсь килангонь бригадирэкс. Лейстэ-латкосто таргильть кевть – истя теильть кить. Эринек аволь сюпавсто, ярсамс ульнесь а мезде. Ды сеть шкатнестэ кие парсте эрясь?! – ёвтни Елена Матвеевна.
М. М. Романовонь ялаксонзо истя жо велявтсть кудов. Андрей Матвеевич – младшей лейтенант, казезь «За победу над Германией в Великой Отечественной войне 1941-1945 гг.» медальсэ, Якстере Тештень орденсэ. Сон пачкодсь Берлинс. Ульнесь миномётчикень взводонь командирэкс. 1945 иеде мейле служась армиянь штабсо. Кудов сась 1948 иестэ. Эрясь Саранскойсэ, важодсь заводсо парткомонь секретарекс, мейле – МВД-сэ.
Фотосонть Андрей Матвеевич
Иван Матвеевич понгонесь пленс. Войнадо мейле сон важодсь Ташто Орданьбиесэ школань тонавтыцякс, школань прявтокс. Калмазь Орданьбуе ошсо.
Матвей Матвеевич ульнесь старшей сержантокс. Сон тюрсь Западной фронтсо, Сталинградонь фронтсо, Южной фронтсо, Украинань омбоце фронтсо. Немецко-фашистской захватчиктнень марто тюремстэ кавксть ранязель. Казезь «За отвагу», «За победу над Германией в Великой Отечественной войне 1941-1945 гг.» медальтнесэ, кавксть – «За боевые заслуги» медальсэ, Отечественной войнань I-це степенень орденсэ. Вана мезе сёрмадозь каземань конёвсонзо (саезь «Память народа» сайтстэ):
«При форсировании реки Днестр 13 апреля 1944 года ст. сержант Романов проявил храбрость, мужество и отвагу. Для быстрого движения 9 тонного парома через реку Днестр, скорость которого достигала 2 м в сек, необходимо было через русло реки перебросить трос и по тросу направлять паром. Эту задачу поручили ст. сержанту Романову. На лодке, поперек быстрого течения реки, под ураганным обстрелом противника, рискуя своей жизнью, тов. Романов перетянул трос на правый берег и закрепил его там. Задание было выполнено. Тов. Романов энергично действовал в составе расчета этого парома и только за одну ночь на 14 апреля сделал 12 рейсов, переправил на правый берег 16 пушек с расчётами и боеприпасами и свыше 300 человек пехоты. Ст. сержант Романов М. М. достоин правительственной награды медали «За отвагу».
Фронтовикесь тусь эрямосто 1991 иень октябрянь 14-це чистэ, калмазь Орданьбуень Октябрьский посёлкасо. Вечкевикс тетядост ды покштядост ледстнематнень свал кирдить седейсэ малавиксэнзэ. Матвей Матвеевичень 8 нуцьканзо, 13 правнуконзо, 4 праправнуконзо. Весе сынь эрить Россиянь келес ды Украинасо. Изнямонь чистэ, маень 9-це чистэ, ламот юткстост ютакшныть портрет марто «Бессмертной полксо». Те чись сынст туртов алкуксонь покш чи.
Татьяна Маторкина