Четверг, марта 28, 2024
Важное

НЕЕНЬ ШКАНЕ ДОНБАССОНЬ ОЛЯКСТОМТОЗЬ ОШТНЕСЭ УШОДОВСЬ АЛКУКСОНЬ ТУНДОСЬ. КОДА НЕВТИТЬ ФЕДЕРАЛЬНОЙ КАНАЛТНЭ, СЕТЬ ТАРКАТНЕСЭ, КОСО АРАСТЬ ЛЕДНЕМАТ ДЫ ТЮРЕМАТ, ТОСОНЬ ЭРИЦЯТНЕ ВАНСЬКАВТЫТЬ УЛЬЦЯТНЕНЬ, ВИТНИТЬ КУДОТНЕНЬ. ВИДЬСТЭ МЕРЕМС, УШОДЫТЬ ОД ЭРЯМО.
СЫНЕНСТ ЗЯРДОЯК А СТУВТОВИТЬ ИКЕЛЕНЬ РАУЖО ЧИТНЕ. ЭДЬ ЭШТЁ ОВСЕ АВОЛЬ УМОК ДОНБАССОНЬ ОШТНЕСЭ ДЫ ВЕЛЕТНЕСЭ АПАК ЛОТКСЕ ВАЛОВСЬ МЕЙСЭЯК А ЧУМО ЭРИЦЯТНЕНЬ ВЕРЕСТ, ЗЯРДО СЫНСТ ЛАНГСО НАРЬГАСТЬ АПАК ПЕЛЕ.

ТЕЧИ ЛАМОТ ЮТКСТОНОК ВИДЬСТЭ ЁВТЫТЬ МЕЛЕСТ-АРСЕМАСТ ДОНБАССОНЬ ДЫ ЛУГАНСКОЕНЬ ЛОМАНТНЕНЬ ИДЕМАСТ КОРЯС СПЕЦОПЕРАЦИЯНТЬ КУВАЛМА.
ТЕЧИ МИНЕК РЕДАКЦИЯНЬ ИНЖЕСЬ – МОРДОВСКОЙ РЕСПУБЛИКАНСКОЙ «ПОИСК» ПАТРИОТИЧЕСКОЙ ВЕЙСЭНДЯВКСОНЬ ПРЯВТОСЬ, 1941-1945 ИЕТНЕНЬ ВОЙНАНЬ ДЫ ТРУДОНЬ ПОДВИГЕНЬ МЕМОРИАЛЬНОЙ МУЗЕЕНЬ ПРЯВТОСЬ НИКОЛАЙ АНДРЕЕВИЧ КРУЧИНКИН. МАКСТАНО СОНЕНЗЭ ВАЛ.

– Неень шкане ютавтовиця спецоперациясь ушодовсь шкастонзо. Паро, масторонь Прявтось Владимир Путин икельдинзе яттнэнь. Бути шкась таргаволь кавто-колмо недляс, сестэ минек ёндо ёмавкстнэде улевельть ков седе ламо. Тень коряс ледстяса Ине Отечественной войнанть, конась ушодовсь масторонок туртов апак учо. Немецтне жо кенерсть тееме весементь, штобу эрьва ёндо каявомс лангозонок. Куш минектне неть анокстамотнеде содасть икелепелев, ялатеке эзть кеме. Бути 1941 иень июнень 22-це чистэ сынь улевельть анокт каявомантень, сестэ минек ёндо ёмавкстнэде ков седе аламо улевельть ды войнаськак, паряк, прядоволь седе курок.
Украинань фашисттнэ, а пелян сынст истя лемдемс, ков седе пек кежейть ды аксунт немецтнень коряс. Куш меельцетне истя жо нарьгасть минек солдаттнэнь лангсо, ялатеке неенсетне пек седе ёмавтызь чачост. Сынь кекшнить мирной эрицятнень удалов, теить эйстэст живой щитт.

Тень ловозь, бути шкастонзо РФ-нь Президентэсь аволь яволявто спецоперациянть ушодовомадо, сестэ сынь минек икельдявлимизь ды аволь ансяк Донбассонь оштнень нардавлизь, истя жо кенеревельть каявомо Ростовонь, Курскоень, Белгородской областтнень лангс. Виде, улить ёмавкст минек ёндояк, офицертнэ ды солдаттнэ теить весементь тосонь ломантнень эрямост ванстомга. Невтемакс, сеть кудотнесэ, конатнень латотнесэ аштить боевикть, васенце этажтнесэ жо мирной ломанть, сынь эйсэст эзть тока. Лиякс жо маштовольть весе. Эштё эзь стувтово, кода американецтнэ Ливиясо ды Ирансо апак кочксе куловтсть весень, киньгак эрямост апак вансто.

Минектне жо максыть шка ды ки лисемс ломантненень палыця таркатнестэ. Теде башка, покш мель явови сыненст гуманитарной лезксэнь пачтямонтень, медицинской лезксэнь максомантень.
– Николай Андреевич, неень шкане кодат паро примерт улить минек од ломантненень, кинь пельде тонавтнемс патриотизмантень?
– Истят примертнэде ламо. Мартонь меельце читнестэ ракетно-зенитной дивизиянь командирэнтень, капитанонтень Алексей Панкратовнень, кинь ундоксонзо минек республикань, максозь Россиянь Героень лемесь. Тешкстасынек, сонзэ малавиксэнзэ Мордовиянь Торбеевской райононь Салазгорь велестэ. Алексей Панкратов аволь весть тосо ульнесь покштянзо-бабанзо кедьсэ, мейле сакшнось калмост лангс.

Тетязо апак учо маштовсь ки лангонь зыянов тевсэ. Авазо тусь эрямо ве ёнов. Сон чачсь 1990 иестэ Оренбургонь областень Переволадской райононь Донецкое велесэ. Цёрынесь «ветес» прядызе школанзо ды ушодсь тонавтнеме Оренбургонь зенитной училищасо. Васенце курсонть прядомадо мейле тонавтнеманзо поладызе Советской Союзонь Маршалонть Василевскоень лемсэ Смоленскоень противовоздушной высшей военной академиясо.

Донбассо специальной военной операциянть ушодовомань васень читнестэ саезь сон кармась ванстомо отдельной мотострелковой бригаданть ятонь авиациядонть. Алексей Станиславович вейсэ ялганзо марто эзинзе нолда менельстэ ятонь атакатнень, истя ванстынзе минек позициятнень. Панкратов васенцекс сынст рединзе. Сонзэ мереманзо коряс дивизионось аноколь а нолдамс ятонь леднематнень. Истя, боевой заданиянть топавтомсто мужестванть ды героизманть кисэ масторонь Президентэнть Указонзо коряс сонензэ максозь Россиянь Героень лемесь.

– Варштавксонк коряс, неень шкане кода виевгавтомс патриотической лувонть од ломантнень ютксо?

– Алкукскак, неень шкане те тевенть эряви тенек пек седе виевгавтомс. Эдь эштё кавксоньгеменце иетнестэ саезь Украинасо ветявсь виев пропаганда минек каршо, эрьва кодат оймсемань ды шумбрачинь витемань лагертнесэ од ломантнень тонавтсть тюреме, ломанень маштомо. Весе инструктортнэ ульнесть омбо масторсто. Нама, советской шкатнестэ ульнесть пионерт, комсомолецт… Седе тов те тевесь, кода весе содатано, лоткавтовсь, тарказонзо аламо мезе сась. Эряви тенек седе домкасто тонавтнемс историянть, содамс эсенек геройтнень, кинь эйстэ саемс пример.

Невтемакс, аволь умок минек музеев сась сыре ломань ды пшкадсь истямо мель марто, штобу Саранскоень Изнямонь куросонть, Свал палыця толонть вакссо, аштевельть минек школатнесэ тонавтницятне, кода эсь шкасто савкшнось теемс тень сыненст. Виде, те арсемась пек паро. Икелень од ломантнень ледстнемаст коряс, самай те таркасонть улемстэ сынь тонадсть цидярдомо псинть ды якшамонть, седе ламо арсемс эрямосонть таркадост, ледстнемс покштядост, кить маштовсть Ине Отечественной войнасонть. Ламотненень сась мель седе домкасто тонавтнемс Отечествань историянть.

Неень шкане минек республикань кой-кона школатненень пек паро улевель максомс Советской Союзонь Геройтнень лемест. Невтемакс, Мордовия Республикань Инсарской районсо чачозенть-касозенть Иван Бибишевень лемесь, кие Ине Отечественной войнанть шкасто ульнесь штурмовой авиациянь лётчикекс, максозь Волгоградской областень Городищенской райононь Россошинской школантень. Инсарсо жо сонзэ лемесь максозь вейке куронтень, Героень Аллеясонть путозь бюстозо. Койсэнь, пек паро улевель, бути лия Геройтнень лемсэ лемдевельть аволь ансяк ульцят, истя жо минек республикасо максовольть сынст лемест школатненень. Кодашка каштанчи саевлизь эйкакштнень, зярдо каземстэст, сцена лангс лисемстэ ёвтавлизь, кинь лемсэ школасонть сынь тонавтнить. Самай истят примертнэ лездыть виевгавтомс патриотизмань ёжомарямонть.

Тешкстаса, кодаяк аволь сеть ломантне, кить миить раськест, кить оргодсть тиринь таркатнестэ, кода содавикс Болькинэсь, улест од цёратнень-тейтертнень туртов «тонавтыцякс». Нама, пек берянь, улить истят апаро ойме ломанть, кить манчить эсь лангаст, ловить пряст «инязорокс», куш кияк тенст те лементь эзизе максо. Кодаяк ды зярдояк сынь а улить примерэкс минек ломантненень! Иляст теде арсеяк!

Валентина Юдина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».