Ковдо икеле монь покштянтень Николай Константинович Приставкиннэнь чачома чистэнзэ саезь топодсть сядо иеть. Эйкакш шкань ледстнематнес кадовсь, кода сон нурсесь эйсэнь нурямотнесэ, пиче вирев сайнесь кстый мельга, конань сон зярдо-бути озавтокшнызе тонавтницянзо марто, ды кода сон ламодояк ламо важодсь. Сельме икелев свалшкас кадовсь столь велькссэ комадо аштиця чова рунгозо.
Велькссэнзэ тусто качамо, конась мольсь таргамопельстэнть. Столенть лангсо ламо книгат, эрьва кодат конёвт, печатыця машинка… Мельсэнь кирдян, кодамо покш каштанчисэ аштилинь покштянь кувалма: эдь сон важодсь Покш Игнатовань райононь Ташто Селища тиринь велень школасо директорокс, сёрмадсь книгат, печатавсь газетатнесэ ды журналтнэсэ! Пек преевель покштям, парсте содылинзе ды вечкилинзе рузонь ды эрзянь кельтнень!
Эсензэ эрямонзо Николай Константинович алтакшнызе эйкакшонь тонавтомантень-кастомантень. 18 иесэ уш ушодокшнось тонавтомо вишка класстнэсэ. Зярыя ковонь ютазь, 1940 иень ноябрясто, саезель Якстере Армияв. Трудовой книжкасонзо седе тов сёрмадовксось тешкстазель 1945 иень ноябрясто, зярдо ушодокшнось важодеме Покш Игнатовань райононь Ташто Селища велесэ физикань ды математикань коряс тонавтыцякс.
Важодемань стажонзо вете иес сезекшнизе войнась, конась, теке танкокс, ютакшнось масторонь весе ломантнень уцяскаст ланга. Приставкинтнэнь семиясь эзь кадовкшно теде ве ёнов. Куш покштям эзь аште окоптнесэ, ансяк Изнямонтень покш путовксозо. Покштянь сазорозо, Анна, ёвтнематнень коряс, сеть иетнестэ сон важодсь специализированной военно-политической курсатнесэ, лездась анокстамс политрукт.
Войнань шкасто войскатнесэ эрявсть кода седе ламо партийной ды комсомольской вийть. Ротатнесэ, батареятнесэ, эскадрильятнесэ должностной лицятнень институтось совавтозель 1941 иестэ. Сындест 1942 иень мартонь 22-це чинь номерсэнть «Правда» газетась сёрмадсь: «В историю Великой Отечественной войны, как одна из славных и почётных её фигур, войдет фигура политрука».
Эрьва иестэ Ине Изнямонтень Николай Константиновичнень казезь медальтнень вансттано каштансто. Покштям эсь кавксо эйкакштненень зярдояк эзь ёвтне войнань иетнеде, мик зярдо уш сынь касокшностькак. «Тетям эзь вечке ёвтнемс эседензэ, минь жо, эйкакшпревсэнек, эзинек кевкстнеяк, – ледстни патям Валентина Краснова, кона эрямонзо перть тонавтсь Ромодановань райононь Красный Узел школань вишка класстнэсэ. – Ней тетям арась, кевкстематнеде жо пурнавсть пек ламо: кода ютась од шказо, кода служась тиринь масторонтень…»
Войнадонть мейле ды сыредемазонзо Николай покштям сеедьстэ ёвтнесь паксясо, фермасо важодиця эсь велень эрицятненень политикадонть, партиянть тевтеемадонзо ды рольдензэ, масторлангсонть молиця тевтнеде. Лекциятнес анокстакшнось домкасто. Покштянень велень эрицятне явсть покш мель. Ломантне учость эйсэнзэ, кунсолость пштистэ, мейле макснесть ламо кевкстемат.
1946 иень августсто саезь сон важодсь Ст.Селищенской сисем иень школасо директорокс. Те таркасонть сон роботась 25 иеть.
Тедедень апрельстэ велень Культурань кудонь прявтось Галина Сеняйкина пурнакшнось чокшне, конась алтазель МАССР-нь школань заслуженной учителентень Николай Константинович Приставкинэнь 100 иетненень. Тосонь эрицятне пек лембестэ ды сюкпрянь ёвтазь ледстнесть сондензэ. Покштянь икелень тонавтницянзо ледстнесть сонзэ мельстуиця уроктнеде, кенярксчитнес алтазь мероприятиятнеде, походтнэде. Сон пек вечкилизе пертьпельксэнть, тиринь ёнксонть, тенень тонавтсь эйкакштненьгак. Школанть ваксс сынь вейсэ озавтсть сад. Эрьва тонавтницянть ульнесь эсензэ умариназо, конань мельга сон вансь-якась тонавтнеманзо перть, школанть прядомадо мейле жо чувтонть лангсо шефстванть максылизь васенце классос сыцятненень. «Те шкас сакшнан школань садс ды вешнян эсь умаринам. Сон ней покш, сэрей. Зяро эйкакшт андсь тантей умарьсэнзэ…» – мизолдозь корты Светлана Начарова, монь патятнестэ сехте покшось. Кода Краснова Валя патямгак, сон пингензэ перть важодсь вишка классонь тонавтыцякс.
Приставкинтнэнь тонавтыцянь династиясонть монь патянгак – рузонь келень ды литературань тонавтыцятне Галина Таванкова, Ирина Королева ды монь сырькаем Лидия Максимовна. Монень ней а лововитькак вишка классо тонавтницянь зяро поколеният нолдась Лида сырькаем. Коля покштям марто сынь важодсть пингест перть Ташто Селищань школасо. Сынь трясть-кастсть кавксо эйкакшт.
«Минь эрьва чистэ неинек тетянь столь экшсэ сёрмадомсто, артомсто, печатамсто, – ёвтни Валентина Краснова. – Мартонок седе ламо озясь авам».
Велесэнть пропагандистэнь тевтеемадонть, школасо тонавтыцянь тевденть башка, покштям свал кеме сюлмот кирдсь печатной изданиятнень марто. Ламо сёрмадсь велесэ эрямодонть, тосо эрицятнеде – важодиця ломантнеде, школань историядонть, экологиядонть, сад- ды эмежпирень кастомадо. Сонзэ сёрмадовксонзо печатавсть «Советская Мордовия», «Учительская газета» газетатнесэ, «Русский язык в школе», «Педагогика» журналтнэсэ. Сон ульнесь «Эрзянь правда» газетань внештатной корреспондентэкс, «Восход» райононь газетань собкорокс. Примазель СССР-нь Журналистэнь союзс.
Монь покштянь эрямосо башка тарка саи Мордовиянь национальной школатнень туртов рузонь келень ды эрзянь келень учебниктнень сёрмадомась. Эйкакшпингстэ монь вечкевикс книгакс ульнесь «Занимательная грамматика» учебникесь, конань анокстызе ды нолдызе Николай покштям. Содан, сон аштесь башка лався лангсо аволь ансяк монь, истя жо лия кемень нуцькатненьгак. Покштям учинзе правнуцьканзояк, ней эйстэст уш кемзисемге! Кулось жо покштям эштё вейке тонавтнемань пособиянть лангсо важодемстэ.
Малав колоньгемень иеде икеле тусь эрямосто монь покштям Николай Константинович Приставкин. Зяро полавтомат теевсть масторсонть, ломантнень эрямосо неть иетнень перть. Сонзэ, зярдо-бути покш, тиринь велензэ эйстэ аламо мезе кадовсь. Велесь аламонь-аламонь лепами, кулы. Покштям тень эзизе нее, те бу улевель сонзэ туртов покш вачкодьксэкс. Ялатеке кармить эрямо парос бажамонь, видечинь, важодиця ломантненень мелень явомань, пертьпельксэнь вечкемань принциптне, конатнень сон эрямонзо перть путсь эсь тонавтницятнень седейтнес.
Кода кортась Николай покштям, тонавтыцянть каштанчизэ сонзэ тонавтницятнесэ. Ламотне сонзэ тонавтницятнестэ сынсь кармасть тонавтыцякс. Покштяй, содак: тонеть ули кинь кувалма кирдемс мельспаро. Миньгак тонь кувалма кирдтяно покш каштанчи!
Наталья НОВИКОВА