Покш Березникбуень Парынзэлень культурань кудосо панжовсь «Цветы земли» лементь ало выставка. Те – «Притяжение» регионъютконь творческой пелькстамонь изницятнень важодемаст. Конкурсось мольсь «Приземление» проектэнть вельде, кона изнясь Культурань инициативань Президентэнь фондонь грант.

Н. П. Огарёв лемсэ МГУ-нь архитектурно-строительной факультетэнь, Саранскоень Ф. В. Сычков лемсэ художественной училищань, Пензань К. А. Савицкий лемсэ художественной училищань ды Ульяновскоень культурань ды искусствань колледжень студенттнэнь туртов ютасть мастер-класст, пленэрт, фотосессият. Од ломантне зярыяксть сакшность Парынзэлев, вастневсть тосонь эрицятнень марто, якизь-пакизь велень мазый таркатнень. Ды аволь стяко – весе неезенть невтизь важодемасост. Те – фотографият, артозь картинат, архитектурань вишка формань дизайнт.

– Минек колледжев сась сёрма, косо эйсэнек тердсть пелькстамо. Конкурсось мелезэнек тусь, ульнесь покш меленек теевемс содавиксэкс веленть марто, кона ашти покш оштнеде васоло. Сыргасть 10 од ломанть. Ульнинек васенце группакс, кона сась Парынзэлев. Тенек ютавтсть экскурсия. Студенттнэ сеске кундасть тевс, кие кочкизе живописень ёнксонть, кие жо – фотографиянть, сынь чоп яксесть фотоаппарат марто. Омбоце чистэ тейнесть портретт. Важодсть парсте, секскак 6 теевксэст лиссть изницякс. Сынь ламо мезе несть од, кадовсть покш мельспаросо, – ёвтни Ульяновскоень культурань ды искусствань колледжень тонавтыцясь Татьяна Инейкина.

Од ломантнень фотографиятнесэ ды картинатнесэ «Парынза» фольклорной ансамблянь аватне, велень гармонистэсь Николай Дмитриевич Белов, Парынзэлень мазыйдеяк мазый пертьпельксэсь.
Башка валт эряви ёвтамс вишка архитектурной форма номинациядонть. Важодематне совавтовить эрямос. Сынь кармить навигациянь объектэкс, велев совамо тарка тешксэкс. Весе изницятне казевсть премиясо.

Сентябрясто С. Д. Эрьзя лемсэ республикань изобразительной искусствань музейсэ панжови выставка, косо невтевить од ломантнень сехте вадря важодевкстнэ.

Татьяна Маторкина