Четверг, июня 13, 2024
Важное

Татьяна Петровна Прокина – минек республикасо содавикс искусствовед, МР-нь культурань заслуженной роботник, МР-нь Государственной премиянь лауреат, «Мордовский народный костюм» (1990) ды «Мордовский костюм» (2007) альбомтнень автор. 2013-2014 иетнестэ Константин Шапкарин книгоиздателесь нолдынзе сонзэ «Мордовский костюм» ды «Русский и татарский костюм мордовского края» эйкакштнень туртов иллюстрация марто книгатнень.



Ниленьгеменде ламо иеть Татьяна Прокина важодсь С. Д. Эрьзя лемсэ музейсэ минек раськень кезэрень кедьёнкстнэнь тонавтомаст лангсо. Сонзэ содамочитне раськень оршамотнень коряс дивавтыть весень. Татьяна Петровнанень саты ансяк весть варштамс раськень оршамопеленть лангс ды сеске ёвтасы, косто сон, кодамо велень эли буень. Валонзо коряс, минек раськень викшневксэсь – те салавачинь сёрма, кона «ёвтни» эсь «чачома таркадонзо». Сонзэ ланга ламоксть сёрмадозель Мордовиянь СМИ-тнесэ. Наукасо важодеманзо туртов арась питнепе. Ды нейгак, пенсиясо улемстэ, те ёроков авась а ашти ве таркасо. Вана мелят, малав пельиень перть, сон важодсь вейке пек мельстуиця проект лангсо: тердекшнизь Татарстанов, косо кезэрень пачтямотнень вельде (фотографиятнень, статьятнень, артовкстнэнь, музеень экспонаттнэнь) эрявсь вешнемс ды одс теемс каратайтнень раськень оршамопелест. Каратайтне – те мокшэрзянь раське, конась эри Татарстан Республикасо. Ней Тетюшской районсо эйстэдест кадовсть ансяк сядошка. Келест човорявсь татаронсенть марто ды лемдить эйсэнзэ «мишарской диалектэкс». Сынст ульнесть эсест башка культураст ды оршамопелест. Бути эрзянь, мокшонь ды шокшонь оршамотнень минь содасынек, каратаенсесь тенек кадови содамоёвксокс. Ды сонзэ панжомга минь вастовкшнынек Татьяна Прокина марто, кона паро мельсэ ёвтнесь тенек, кода мольсь важодемась каратаень костюмонть лангсо. Сон истя домкасто ёвтнесь тенек оршамопелень стамонь башка ёнкстнэде, чопавтнесь историяс ды археологияс, конатнеде сёрмадомс сатовольть зярыя газетань страницат. Кунсоловлинек эйсэнзэ ды кунсоловлинек. Макстано ансяк, истя меремс, кортамонь фрагмент. Ламос содамо бажицятненень ёвтатано: Татьяна Петровна «ВКонтакте» социальной сетьсэ вети «Мордовский костюм. Традиции» куронть.

– «Традиционный костюм народов Казанского Поволжья вт. пол. XIX – перв. пол. XX вв.» историко-этнографической проектэсь, кона марто ушодсть важодеме «Татарстанонь раськетнень Ассамблеясь ды Ояксчинь кудось» – лиятнень ёнов а молиця. Истямос эзь пачколе кияк ды зярдояк. Реконструктортнэде эрьва косо, нама, ламо. Ансяк тесэ эрявсть башка содамочить. Монь тердимизь проектэнтень научной консультантокс, кода содыця экспертэнть. Эйстэнь тенст ёвтнесь историкесь, этнографось, наукань докторось Г. А. Корнишина. Промксонть пингстэ сеске стясть кевкстемат: кие карми стамо, викшнеме, човалясто мазыльмань тееме… Тенень эрявсть башка ломанть. А вана пурнамс-сэрнямс весе костюмонть эрявсь эстень, эдь кияк теньс эзь чарькоде.
Музейсэ важодезь, кедьган ютасть ламодояк ламо раськень костюмт, савкшось тонавтнемс те тевенть нучк-пачк. Мон ваннынь, кода стазь-теезь оршамонь эрьва пельксэсь, эрьва викшневксэсь. Муезь ташто оршамопельтнень ламоксть эрявкшнось муськемс-ванськавтомс. Тень кис ютынь реставраторонь курсат – эрявсь содамс, кода муськемс, ды мейсэ. Оршамопельтне сеедьстэ рудазовольть. Лиясто саразонь кардостояк савкшнось таргсемс. Сестэ прям маринь крепостной крестьянкакс – пацьказь нулатнень эсень ваннасо муськилинь (мизолды). Паро, бути горобиясто таргилизь, седе ваньксстэ ванстовильть…

А тесэ (проектэнть лувсо) эрявсь костюмонть вельмевтемс, ловт, челькестэ. Эдь кодамоль каратайтнень костюмост, пачтямотне эзть ванстово. Тесэ карминь арсеме, мезе мон Татариядо содан. Содаса Заволжьянть. Ды те заволжской комплексэсь колмо куросто ашти. Эйстэдест вейке пельксэсь вейсэндявсь сазь мокшотнень марто ды кармась човор кортамо мокшонь ды татаронь кельтнесэ. Истя теевсь мишарской кортавксось. Кортавкстнэнь коряс чарькодеви, кода раськесь понгсь те эли тона таркантень.
XIV пингестэ ульнесь татаронь-монголонь шкась. Те шкастонть теевсть од колоният, конатне кортасть те эли тона кельсэнть, ды, нама, сынст ульнесь эсест культурасткак. Каратаень племась, неяви, понгсь татаронь хантнэнь кедь алов. Мейле колониясо эрицятнень ютксо ульнесть урьвакстомат-венчамот. Бути а муевить эсь эрицятнень ютксо сатышка одирьват, сынст вешнить лия поселениясто. Истя лисни човорявомась. Кода содатано, аватне трить раське! Саить татарава – кудос совась татаронь культурась, саить эрзява – эрзянь, мокшо – мокшонь ды седе тов. Каратайтнень пек куватьс ульнесь эрзянь культураст. Мокшонсесь понгонесь тия-тува. Бути ваномс Тетюшской райононь картанть, тосо муевить мокшонь, эрзянь ды каратаень велеть. Бути вантано костюмонть – неявить эрзянь ды каратаень викшневкстнэ. Каратаенсесь сеске редяви викшневксэнть ды икельга пацянть коряс. Эрзятнень аламодо лиякс стазь панарось. Каратайтнень элесь седе келей.

Чарькодемс ставксонть монень лездась викшневксэсь, кона свал моли ставкстнэва ды явовкстнэва. Каратайтнень викшневкссэ седе пек тевс нолдавиль раужо-сэнь суресь. Эрзянь викшневксэсь якстере, а вана каратайтнень якстересэ теезель орнаментэсь (кавонзазь алашинеть, яксяргинеть). Чопода-сэньстэ викшнильть мокшотне, ансяк меремс – те панарось мокшонь, карми а виде, викшневксэнь таркатне – эрзянь, теезь кумбо (ковёр) ладсо, эчкестэ. Мокшонсесь – сееде. Лисни, оршамопелест човорязь.

Истя, Казанской Поволжьянь тетюшской мокшотнень (каратайтнень) оршамосо одс теезельть 12 элементт: алга ды верьга панар, икельга паця «запон», пряс путомка «чичера», алгапаця, паця, пилекст, сюлгамо, эрьгекерькс, каркс, кушак, карть, пракстат. Татьяна Прокина тешкстынзе каратаень оршамосо башкачитнень пулайтнесэяк, панго ёнов молиця пряс путоматнесэяк, кирьгасо мазыльматнесэяк. Ансяк янкси, апак тее кадовсь руцясь, конадо тосо мерильть чиба.
Ванномс-тонавтнемс каратайтнень оршамопелест Татьяна Петровнанень лездасть финнэнь содавикс учёноенть, этнографонть, археологонть Аксель Гейкелень (1851–1924) артовкстнэ, конат ванстовить РЭМ-сэ (Россиянь этнографиянь музей, Санкт-Петербург ош). Каратаень оршамонь кой-кона пелькскетне муевсть Кунсткамерасто: нардамо, раздезь цёкот, чоботт ды пряс путомка, кона пек моли эрзянсенть ёнов. Истя жо костюмось тонавтневсь К. Т. Софоновонь фотографиянзо коряс, конатне муевсть М. Е. Евсевьевень «Мордва Татреспублики» (ХХ пингень 30-це иетне) статьястонзо. Лисни, костюмонть теемстэ кепедезель-ваннозель кезэрень шкань цела история.

– Костюмось лиссь мазый, башка ёнкс марто. Сонзэ максомсто сельменек-седеенек кецнесть! Мартонок проектсэнть ульнесь финнэнь-угрань мастертнэнь важодевксэст коряс кураторось, удмуртось Павел Александров, кона натой нусманясто мерсь: «Мон арсинь, удмурттнэнь костюмост сехте мазый, а ней неян, эрзятне ды мокшотне икельдимизь…»

Ютазь иень майстэ прядынек проектэнть. Августсто теинек каталогонть ды те оршамопеленть путызь Казанень Кремляс, косо сон аштесь те иень мартс. Апрельстэ выставкась ускозель Московонь Федерациянь Советэнь залонтень. Маень 2–12-це читнестэ Московонь «Гостиной дворсо» ютась «Уникальная Россия» выставкась. Проектэнек невтевсь тосо ды теде мейле сонзэ велявтсызь свалшкань таркас – Татарстанонь «Дом дружбы народов» раськень кудонтень.
Покш питне проектэнтень путсь РФ-нь сенаторось Пётр Тултаев. Сон гайгстась Татьяна Прокинанень, ёвтась покш сюкпря ды ламо мельспаронь валт теезь тевенть кис.

Минь кевкстинек Татьяна Петровнань: мезе сон арси неень шкань сцена лангсо невтневиця од лувсо теезь оршамотнень ланга? Кода учнинекак, каршо валось ульнесь пшти:
– Неень шкань искусствантень эряви эрямс эсензэ лувонзо коряс, ансяк а эряви сайнемс истямо «маркетинговой ход», ды максомс тень раськень искусствань таркас. Раськенсесь тесэ ансяк вейке – сон теезь Мордовиясо. Ансяк эрзянь ды мокшонь оршамотнень койдест а эряви кенгелемс. Истякояк тесэ тапавкстнэде сатыть. Саемс пряс путоманть. Сон максови гротескенть ёндо – покшолгавтозь ды полавтозь, прок кодамо-бути клоунонь колпак. Ды невтитькак тень прок кодамо-бути театральной карнавал. Да, сынь невтить эйсэнзэ мазыйстэ, ансяк те – неень шкань искусства, ды а эряви сонзэ човорямс раськенсенть марто…

– Тынь ней оймсетядо важодемадонть. Косо ютавттадо шканк?
– Ней мон оймсян Чаунзабуень Репакуши велесэ. Тосо ули кудынем, конань максызь малавикстнэ. А ёвтавияк, кодамо тень тосо мельспаро! Вана улкоть прялкине кудопрясто муинь, теде икеле чувтонь очко ды революциядо икелень горобия, конань, ёвтнематнень коряс, Матвей атя Тольяттистэ ялго пачтякшнызе… Ламо салавачи перьканок, эрьва кедьёнкстонть, зярс тосо улить сыре ломанть, карман кевкстнеме, пурнамо…
Кода нетяно, содамочитнес бажамось Татьяна Прокинань а кады пенсиясояк. Нама, бажамодонть башка, сонсэнзэ ули тиринь ёнксонтень певтеме вечкемась, сонзэ эрямо кинзэ содамось-тонавтнемась. Арсетяно Татьяна Петровнанень теемс тагояк аволь вейке историянок салавачинь панжовкс!

Марина Агафонова
Фототне саезь
Татьяна Прокинань архивстэ.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».