Неть читнестэ республикань Пресс-центрасо пурназель промкс, косо кортавсть Мордовиясо августсто финнэнь-угрань раськетнень Весероссиянь форумонть ды «Минь вейсэ!» од ломанень раськень культуратнень Весероссиянь фестиваленть ютавтомань кевкстематне. Кода молить анокстамотне ды кенярксчинь программадонть журналисттнэнень ёвтнесь МР-нь Культурань, раськень политикань ды архивень тевень министрась Светлана БАУЛИНА.
Августонь 17-18-це читнестэ Мордовиясо ютавтови финнэнь-угрань раськетнень Весероссиянь II-це форумось. Сон карми прявт мероприятиякс Российской Федерациянь раськень политикань ёнкссонть. Программанть юрсо арсеви пленарной промкс ды секциятнень важодемась. Сынь алтавить этнокультурной сюпавчитнень, IT-технологиятнень, регионъютконь важодемань, проекттнэнь сёрмадомань ды эрямос совавтомань кевкстематненень.
Пурнавозтне ванносызь раськень государственной политикань талновтыця кевкстематнень, государственной властень органтнэнь ды аволь коммерческой организациятнень вейсэнь важодеманть. Истя жо арсеви сюпав культурной программа. Арсематнень коряс, форумось панжови И.М. Яушев лемсэ государственной музыкальной театрасонть.
«Те покш ды эрявикс мероприятия Российской Федерациянь культурань ёнкссонть, – мерсь Светлана Баулина. – Финнэнь-угрань раськетнень Весероссиянь II-це форумонь участникекс кармить 2,5 тёжадо ламо ломанть масторонь 42 регионтнэстэ. Делегаттнэ явить покш мель республикантень ды бажить невтемс минек раськень культуранть сюпавчинзэ, мезесь пек кенярдовты. Минек туртов жо истямо покш кенярксчись – вадря тев невтемс раськенек сюпавчинть, конанть коряс аштетяно каштанчисэ».
Эштё вейке покш мероприятиякс карми «Минь вейсэ!» од ломанень раськень культуратнень Весероссиянь фестивалесь. Сон ютавтови августонь 17-19-це читнестэ Культурань инициативатнень Президентэнь фондонть лезксэнзэ вельде.
«Те фестивалесь ютавтови васенцеде. Сон кармась изницякс Культурань инициативатнень Президентэнь фондонь грантонь пелькстамосонть. Нама, эрявикс ёнксось, штобу фестивалесь кармаволь свалшкань. Ёвтан покш сюкпря Культурань инициативатнень Президентэнь фондонтень ды сонзэ прявтонтень Роман Кармановнень Мордовиясо истямо покш мероприятиянть ютавтоманть ды ламот лия мельстуиця проекттнэнь анокстамонть кисэ», – мерсь Светлана Никитовна.
«Минь вейсэ!» од ломанень раськень культуратнень Весероссиянь фестивалесь ютавтови Саранск ошонь кото площадкатнесэ ды республикань районтнэсэ. Сонзэ юрсо карми «Звёзды народного искусства» арт-марафонось, косо эсь шкинемаст невтьсызь Россиянь раськень содавикс коллективтне. Сынст ютксо – «Скрыня» (Краснодар), «Владимирские рожечники» (Владимир) государственной ансамблятне, «Айкай» моронь ды киштемань государственной театрась (Ижевск), «Агидель» моронь ды киштемань государственной ансамблясь (Казань) ды лиятне.
Фестивалень площадкатнесэ кармить: «#Время_возможностей» шкинемань мельтнень-арсематнень форумось, «Мордовия многонациональная» Мордовиянь районтнэнь локальной брендтнэнь ды раськень куротнень невтемась, «ТЕВ» художественной промыслатнень ды ремеслатнень раськеютконь выставкась, «Масторланга» раськень оршамопельтнень невтемась, «Морыця чувто» чувто ланга керсицятнень регионъютконь фестивалесь-пелькстамось.
Истя жо шкинемань коллективтнень ёрокчист невтемань кенярксчить кармить Отяжелень, Орданьбуень, Дубёнкань, Кочкуровань, Краснослободскоень, Лямбирень, Темниковань ды Торбеевань районтнэсэ.
«Фестивалень площадкатне кармить важодеме истямо лувсо, штобу од ломантне кочкавольть эстест шкинемань ёнкс мелень коряс ды саевельть эсест туртов мезеяк од. Фестивалесь карми эсь содамочитнеде лиятненень ёвтнема таркакс, косо чачить шкинемань од проектт», – тешкстась Светлана Баулина.
Юлия Еремина