Эрзянь ды мокшонь национальной драматической театрасо меельце шканть перть моли виев важодема. Тесэ анокстыть путомс «Побег из ада» спектаклянть. Сонзэ премьерась карми ванды, октябрянь 26-це чистэ, ды октябрянь 27-це чистэ. Путовксось алтави лётчикенть, Советской Союзонь Героенть Михаил Девятаевень ледстнемга.
Пьесанть сёрмадызе МР-нь народной писателесь, мокшонь драматургось Валентина Мишанина. Сон парсте содылизе лётчикенть, аволь весть мартонзо вастневсь ды кортнесь. Пьесанть юрокс, нама, саезь М. П. Девятаевень «Побег из ада» автобиографиянь книганть материалтнэ. Режиссёрось-путыцясь Санкт-Петербургсто Ольга Парфёнова. Сон уш путнесь минек театрасо «Пеппи длинный чулок» ды «Роштовань историят» спектаклятнень.
Эряви меремс, Эрзянь ды мокшонь национальной театрась изнясь РФ-нь Культурань министерствань «STOP Фашизм» проект. Сонзэ вельде путови те спектаклясь, театрань фойесэ карми важодеме выставка, косо невтевить Ине Отечественной войнань ды концлагерень фотографият. Выставканть пурнамс лезды 1941–1945 иетнень войнань ды трудонь подвигень Мемориальной музеесь. Выставкась невтеви спектаклянть эрьва невтемстэнзэ. Теде башка, артисттнэ тейсть «STOP Фашизм» видеоролик. Театрань Вишка залсо ютавтовить школань тонавтницятнень марто вастовомат.
Театрась полады «Мордовиянь ине цёрат» проектэнть. Теде икеле путозель скульптордонть С.Д. Эрьзядо спектакля. Ней – М.П. Девятаевде. Сонзэ арсеви невтемс Мордовиянь районтнэсэ ды Татарстансо.
– Васенцеде важодян автобиографиянь материал марто. Монь туртов те – од эскелькс икелев, талнома ды – мельстуиця важодема. Васняяк, эрявсь ловномс художественной литературанть, архивень документтнэнь. Икеле мезе-бути аламошка марсекшнинь Девятаевде. Ней жо седе домкасто карминь ванкшномо материалтнэнь. Мельспароль содамс, лётчикесь-истребителесь стажировканзо ютась Тверской областень Торжок ошсо (монь чачома таркам). Кадык спектаклясь малав анок, те шкас ловнан те ломанденть ды мукшнан од информация. Важодтяно вейсэ драматургонть В. И. Мишанинань марто. Те покш уцяска. Спектаклянть путомсто кой-кона сценатнень полавтынек эли совавтынек одт. Бажатано невтемс ваныцятненень, кодамо ломанекс ульнесь Девятаев. Мезе ды кие теизе сонзэ истямокс. Пленстэ оргодемстэ сталмозо ульнесь ансяк 32 килограммат. Пиштевтсь вачочиденть, якшамодонть ды нарьгамотнеде. Косто мусь вийть ды превть кепедемс менельс а содавикс маркань покштояк покш самолётонть? – ёвтни режиссёрось Ольга Парфёнова.
– Кить налксить прявт рольтнень?
– Михаил Девятаевень налкси од актёрось Андрей Грызлов. Сон ансяк тедеде сась театрав, прядсь ГИТИС. Весемезэ спектаклясонть 24 актёрт, малав весе труппась. Невтеви лётчикенть вишка пингезэ, Казаньсэ тонавтнемазо, концлагересь… Бажинек невтемс весе хронологиянть. Васенце колмо сценатне ютыть мокшонь кельсэ, седе тов – рузокс.
– Девятаевде фильманть ванкшнынк?
– Ваныя ансяк седе мейле, кода прясон ладия спектаклянть. Фильмасонть а невтеви се, мезе тееви театрань сцена лангсо, ды, мекевлангт... Минь теинек покш важодема. Ушодынек лангсонзо важодеме майстэ саезь. Сёрмадозь музыка, теезь декорацият. Вейсэнь покш тев, конась, арсян, токасы ваныцянть оймензэ.
Кода уш ёвтынек, Ольга Парфёнова чачсь Тверской областень Торжок ошсо. Тонавтнесь Тверень театральной колледжсэ, Санкт-Петербургонь Культурань институтонь искусствань факультетэнь режиссурань ды актёронь мастерствань кафедрасо. Ней тосо жо тонавты студентт. Путнесь спектаклят Мичуринскоень, Самарань, Липецкоень, Саранскоень, Санкт-Петербургонь театратнесэ.
Татьяна Маторкина