Масторлангсонть кодат ансяк морот апак сёрмадо аватнень ланга ды эрьвасонть тиринь ломанентень седеень покш лембе ды вечкема. А маштан моронь сёрмадомо, казевлия бу тиринь аванень, конанень ванды, октябрянь 26-це чистэ, топодить 70 иеть. А вана Сашка ялаксом машты, сёрмады истят седейс токиця морот, ули репертуарсонзо тиринь авадояк, ды курок минь сонзэ вейсэ гайгстасынек чачома чинь тешкстамсто.
Малавикс ломанде сёрмадомс стакаяк-шождаяк. Шожда мекс? Содасак педе-пес. Стака жо сень кувалма, а весементь оймепотсто ули мель таргамс весень икелев. Секскак кадса тень башка ды ансяк роднятнень-раськетнень туртов. Монь авам, Нина Евгеньевна Тикшайкина (тейтерькс – Михайлова), Сабанцеле велень простой эрзянь ава. Чачсь войнадо мейле ламо эйкакшонь триця семиясо, зярдо минек масторось ансяк стиль-виензыль, ды авань мельсэ эштё кирдевить сеть стака шкатне. Вачодо эзть аште, ялатеке школав пурнамоськак сестэ а шождаль. Портфелень таркас – «доска-мешок», истя икеле мерсть Сабанцелесэ. Формась стазь шабра «шивечень» кедьсэ. Авам ёроковоль, ёжоволь, тонавтнемась мольсь шождасто.
Ансяк сехте пек мелезэнзэ кадовсть эйкакш порань налксематне, шабра эйкакштнень марто ялгаксчитне, тетянзо-лесникенть марто кордонсо кизна эрямось. Покш семиясонть авам омбоце эйкакшоль, секскак вишка сазортнэнь-ялакстнэнь трямось-кастомась ульнесь сонзэ лангсо, эдь авазо чинь-чоп важодсь колхозсо. Вишка Нина зярдояк а пелиль тевде, тонадсь весементь тееме: кши паниль, помидорт-куярт салтыль, кудот урядыль, пиресэ кочкиль, свал лездась Вера патянстэнь велеванть почтань кандтнеме. Истя ютась эйкакшчись. Школадо мейле тусь тонавтнеме Орданьбуень торговой училищав товароведэкс. Зяро савкшнось ялго яксемс паксянь-паксянь трокс – а ёвтавияк! Велявтсь тиринь велев ды малав весе эрямонзо алтызе лавкасо микшницянь тевентень. Васняяк роботась райпо лангс, мейле ютась вейке азоронь лавкас. Сабанцелесэ сон лиссь мирденень колхозонь бригадирэнть Николай Тикшайкинэнь экшс. Чачтсть-трясть колмо эйкакшт: кавто тейтерть ды цёра. Ней сынст вете нуцькаст. Эрямось мольсь, кода весеньгак, састынькине. Эрьва мезе эрси эрямонь кияванть ютамсто: парояк, беряньгак. Ансяк мезе сисем иеде икеле савсь печтямс Нина Евгеньевнанень Николай Васильевич марто – ятнэньгак а арсесак. Од иень васенце цят якшамо чистэнть электричествань тувталдонть палсь сынст весе кудоюртост: кардазнэк, банянек-мезнек. Кода кортыть, ворось салатанзат – стенат кады, а толось овсе штапо кадтанзат. Кода печтизь те зыянонть – сынсь содыть! Кода ледстясызь – нейгак соракадыть. Ламо вийть ды шумбрачи савсь путомс од кудонть стявтомс, лездасть эйкакштне, роднятне-раськетне, Сабанцелень эрицятне. Весенень сынь те шкас ёвтыть покш сюкпря.
Тетянь-авань кудось – те таркине, козонь свал пурнавкшныть эйкакштне ды нуцькатне, косо свал учить эйсэнек тантей ям ды каймак марто. Мезезэ бу а улевель авань, мезе бу а таштаволь, сон весементь яви колмо эйкакшонзо семиятнень ланга. Тетямгак эйстэнзэ а яви – маряви, меельце панаронзояк максовлизе, бути эряволь. Тетянь-авань кудось – те чопода вене валдо теште, конась, теке маяк, невти ки, максы вийть, оймсема, оймень таргамо. Авам – истямо ломанесь, конась машты кунсоломо ды максомо виде превть. Сонзэ превс путоматне пурназь эрямостонть, покштятнень-бабатнень пельде, сюлмсезь теке човалинеть ве карькскес ды таргсевить эрямонь мелявкстнэнь коряс, сетне, конатне эрявить те эли тона шкастонть.
Эштё авам, теке мекш, сондензэ уш а мерят «нузякс», сон свал тевсэ, чоп писки-сокари кудоюткова, пирева, тингева. Три тувот, саразт, касты модамарть, якстерькайть, дынят, арбузт, бажи андомс эйкакштнень ванькс ярсамопельде, зярс сатыть виензэ. Авань мельспарозо – кудонть перька ды вальма лангсо касыця цецянзо. Сонзэ кудосо весемесь касы парсте: цецятнеяк виензыть ды цветить, эйкакштнеяк каникуласто седеяк виемить ды сэрь венстить. Истямо тосо паро аравтлувось, ёжомарямось, секскак весе нуцькатне бажить седе сеедьстэ сакшномс инжекс ды васькавтневтемс прянть бабаст пельде. Кадык истя карми ламо-ламо иеть!
Марина ТИКШАЙКИНА
Вечкевикс аванок, бабанок, низанянок, ававтонок! Минь седейшкава ёвтатано теть поздоровт юбилееть кувалма ды арсетяно кеме шумбрачи, валдо мельть-арсемат, свал паро ёжо! Тон минек сехте мазый ды превей ава, сехте питней ды вадря ломань мирсэнть-масторсонть, конась свал кази тенек оймень лембе ды чевте мизолкс. Минек сехте тиринь ломаненек, ульть свал истямо вечкиця, чарькодиця авакс ды сырькаекс. Кадык эрьва чись карми кенярксовокс, уцяскавокс ды эрьва иесь канды вийть ды ёрокчи! Минь тонь пек вечктядызь!
Тикшайкинтнэ, Девятовтне,
Денисовтне.
Мельвановикс, вечкевикс патянок-сазоронок, урьванок, ялганок-оянок, роднянок-раськенек, Нина Евгеньевна! Кучтано теть седейшкавань поздоровт чачома чить кувалма. Ульть свал истямо валдо ды панжадо седеекс, свал эрьва мейсэ лездыцякс, кеме нежекс весе роднятнень-раськетнень туртов, виде превень максыцякс. Чачома чистэть арсетяно кеме шумбрачи, а сыредемс ды а сэредемс! Ансяк икелев ды моро марто, конатнень тон пек вечкат морсеме! Уцяска теть, парочи ды ламо кенярксчить!
Нестеркинтнэ, Михайловтне, Учеваткинтнэ, Устимовтне ды Олёшкань Нина Митя марто