Велень хозяйствань ковкерькссэнть сёксень шкась мокшотнень ды эрзятнень ушодови васень урожаенть пурнамосто – августсто, ды поладови декабряс. Икелень шкатнестэ, кода прядовильть весе тевтне, велетнесэ ушодовильть кенярксчитне, конатнестэ ламотне алтавильть урожаень ванстыцянтень – Норовавантень.
Раськень койтнень коряс, Норовавась кизна ды сёксня ульнесь пек мазый платиясо, оршазь сырнес ды сияс. Верепазось Нороваванть сехте пек вечксь важодеманзо ды ломантнеде арсеманзо кис, ды ансяк сонензэ казизе виенть максомс ломантненень кши.
А. С. Пушкин лемсэ библиотекань раськень ды краеведениянь литературань куронь важодицятне анокстасть «Норовавань чи» фольклоронь кенярксчи. Эйкакштнень марто кармить ветямо хороводт, налксеме раськень налксематнесэ ды весе инжетне каванявить Норовавань анокставкстнэсэ. Карми гайгеме «Норовава» эрзянь кезэрень морось.
Мероприятиясь ютавтови сентябрянь 27-це чистэ, 13.00 чассто А. С. Пушкин лемсэ раськень библиотекасо. Мереви самс Пушкинской картанть коряскак.