2023 иесь РФ-нь Президентэнть Указонзо коряс яволявтозь Тонавтыцянь иекс. Тень коряс масторонь весе школатнесэ ютыть ламо мероприятият. Эдь эрьванть эйстэнек ульнесь истямо тонавтыцязо, кона сыремтсь седейсэ бажамо содамочитненень.
Истямокс ульнесь эрзянь содавикс сёрмадеесь, Мордовиянь заслуженной тонавтыцясь Илья Петрович Кривошеев (Илька Морыця поэтэсь), конань эрямонзо ды шкинеманзо коряс сентябрянь 14-це чистэ Ицялбуень педагогической колледжень студенттнэ ютавтсть «Кривошеевень ловномат». Сынст пурныть-ютавтнить Илья Петровичень нуцьказо Анжелика Горбунова ды поэтэнть тейтерезэ Ольга Ильинична.
Те мероприятиянть ютавтома таркась кочказель а стяко: сонсь Илья Петрович 1940 иестэ саезь пенсияв лисемс важодсь те колледжсэнть тонавтыцякс. Сонензэ максозель «Заслуженный учитель МАССР» лемесь, казезь «Отличник народного образования» тешкссэ. 1934 иестэ кармась СССР-нь Писателень союзонь членэкс. Кулось 1967 иень сентябрянь 11-це чистэ. Калмазьгак Ицялсо. Колледженть икеле аравтозь поэтэнтень кеврунгось.
Тедеде И. П. Кривошеевнень чачома чистэнзэ саезь топодсть 125 иеть. Студенттнэнень ёвтнезель Илья Петровичень аволь шожда эрямодонзо. Поэтэсь чачсь 1898 иень июлень 19-це чистэ Саратовской губерниянь Петровской уездэнь Пылковской волостень Маяк хуторсо (ней – Пенза ёнксонь Лопатинской район) сокицянь-видицянь семиясо. Авазо – Ефимия Петровна содавикс сказительницась, конань пельде Илья Петрович кармаськак содамо эрзянь фольклордонть, мезесь сыремтизеяк тиринь келентень вечкеманть. Эрямонзо перть поэтэсь тонавтнесь – церковно-приходской школасто саезь университетс.
Ловноматнесэ васняяк кортась поэтэнть нуцьказо Анжелика Горбунова, кона ёвтнесь эсь малавикстэнзэ: «Монень пек а шожда кортамс Илья Петровичте, эдь сон монь покштям. Монень эзь саво сонзэ неемс чистэ-пингстэ, ансяк сондензэ пек ламо тень ёвтнесть малавиксэнзэ ды студентэнзэ. Мейле монськак карминь ламо важодеме эрямопингензэ лангсо ды сёрмадынь зярыя статьят. Истя жо ланганзо сёрмалесть ламо критикть ды литературоведт…»
Седе тов максозель вал Ольга Ильиничнанень, кона ёвтнесь Илья Петровичень важодемадо: «Сон пек вечкиль эйкакшт ды тонавтыця ялганстэнь свал мериль: «Зярдо киньгак сёвнотадо, илядо стувтне: а бути таркасонзо улевель тынк цёранк эли тейтеренк?!» Весть ульнесь истямо тев. 7-це классонь вейке тонавтницясь а кунсолыцяль. Кидеяк эзь пеле, натой директоронть эйстэяк, конадо сорнось весе школась. Илья Петрович вешизе те цёрыненть эсензэ классос ды уроксто тердизе доска икелев. Кевкстизе: «Ютават кедь лангсо классонть кувалт?» Тона мери: «Ютаван». Зярдо ютызе, тонавтыцясь мерсь: «А эштё весть ютат?» – «Ютан». Ды истя ульнесь колмоксть, зярс тона эзь сизе. «Озак, максык дневникеть, путан теть «вете» сень кис, што тон истямо виеват. Минек армиянть туртов эрявить истят виев ды эряза ломанть… Вандынень тонавтнек минек мастордо валморо…» Шкань ютазь те од ломанесь кармась военноекс ды ёвтась покш сюкпря Илья Петровичнень».
Истят тевтне-валтнэ Илья Петровичте кортыть, кода алкуксонь тонавтыцядо, кона эрьва эйкакшонтень бажась ансяк паро, макссь тенст седейлембензэ ды путсь весе виензэ сень кис, штобу кастомс эйстэст тиринь масторонь вечкиця ломанть.
Седе тов кортась А.С. Пушкин лемсэ Национальной библиотекань краеведениянь литературань отделэнь библиотекаресь Альфия Маланчева, кона анокстась мельстуиця презентация Илья Петровичень эрямо кидензэ.
Инжетнень ютксо ульнесть Писателень союзонь Правлениянь прявтось Татьяна Швецова ды «Чилисема» журналонь прявт редакторось Елена Барцаева, кона тешкстась: журналсонть ламоксть печатавкшность Илья Кривошеевень валморонзо.
Педколледжень студенттнэ ёвтнесть Илья Кривошеевень валморонзо. Вастовомась ютась пек лембестэ.
Марина Агафонова